फलटण: भारतीय राज्यघटनेचे शिल्पकार डॉ. बाबासाहेब आंबेडकर यांच्या जयंतीनिमित्त फलटण शहरात उत्साहपूर्ण वातावरण पाहायला मिळाले. यानिमित्त त्यांच्या पुतळ्यास पुष्पहार अर्पण करून भावपूर्ण व विनम्र अभिवादन करण्यात आले.
फलटण नगरपरिषदेचे लोकनियुक्त नगराध्यक्ष समशेरसिंह नाईक निंबाळकर यांच्या हस्ते महामानवाला आदरांजली वाहण्यात आली. यावेळी उपस्थित मान्यवरांनी डॉ. आंबेडकर यांच्या पवित्र स्मृतींना उजाळा देत त्यांनी दिलेल्या सामाजिक समता, शिक्षण आणि प्रगतीच्या विचारांना पुढे नेण्याचा तसेच संविधानातील मूल्यांचे जतन करण्याचा संकल्प व्यक्त केला.
या अभिवादन कार्यक्रमासाठी विविध राजकीय व सामाजिक क्षेत्रातील मान्यवरांची उपस्थिती होती. यामध्ये बांधकाम सभापती सोमशेठ जाधव, भाजपा नेते जयकुमार शिंदे, ज्येष्ठ नगरसेवक सुदाम (अप्पा) मांढरे, नगरसेवक रोहित नागटिळे, नियोजन समिती सभापती संदीप चोरमले, नगरसेवक अशोकराव जाधव तसेच सामाजिक कार्यकर्ते दत्तराज व्हटकर व अमोल सस्ते यांचा समावेश होता.
या सर्व मान्यवरांसह शहरातील विविध पक्षांचे पदाधिकारी, सामाजिक कार्यकर्ते आणि नागरिकांनी एकत्र येत डॉ. बाबासाहेब आंबेडकर यांच्या महान कार्याचे स्मरण करून त्यांना अभिवादन केले.
फलटणमध्ये डॉ. बाबासाहेब आंबेडकर जयंती उत्साहात साजरी
