फलटण: साखरवाडी येथे भव्य बुद्ध विहारासाठी शासकीय जागा मिळावी, या मागणीसाठी शेकडो भीमसैनिकांनी सोमवारी फलटण तहसील कार्यालयावर भव्य लॉंगमार्च काढला. प्रशासनाने निवेदन स्वीकारले असले तरी लेखी निश्चिती मिळेपर्यंत आंदोलन मागे न घेण्याचा निर्धार आंदोलकांनी व्यक्त केला आहे.
फलटण तहसील कार्यालयासमोर भीमसैनिकांचे ठिय्या आंदोलन सुरू झाले असून, जोपर्यंत बुद्ध विहारासाठी निश्चित जागेबाबत लेखी पत्र मिळत नाही, तोपर्यंत मागे हटणार नाही, असा ठाम निर्णय आंदोलकांनी घेतला आहे.
भीमसैनिकांची ठाम भूमिका – “लेखी निर्णय द्या, अन्यथा आंदोलन सुरूच राहील!”
भीमसैनिकांनी आपल्या मागण्यांबाबत प्रशासनासमोर ठोस भूमिका मांडली आहे. फक्त तोंडी आश्वासन नको, तर जागेबाबत प्रशासनाने अधिकृत लेखी पत्र द्यावे, अन्यथा ठिय्या आंदोलन तीव्र करण्यात येईल, असा इशारा आंदोलकांनी दिला आहे.
प्रशासनासमोर मागण्या स्पष्ट – अन्यथा संघर्ष तीव्र
- साखरवाडीत बुद्ध विहारासाठी शासकीय जागेचे लेखी आदेश द्यावेत.
- फक्त तोंडी आश्वासन नको, तर अधिकृत कागदपत्र हवे.
- प्रशासनाने वेळकाढूपणा केल्यास आंदोलन आणखी तीव्र होईल.
भीमसैनिकांच्या या निर्धारामुळे प्रशासनावर दबाव निर्माण झाला असून, पुढील काही तासांत यावर तोडगा निघण्याची शक्यता आहे.
