बारामती :- पुणे जिल्ह्यातील बारामती तालुक्यातील पळशी गावातील ग्रामसेवक कांता बापूराव काळाणे (वय ५७) यांना लाच घेताना अंमलबजावणी विभागाने रंगेहाथ पकडल्याने ग्रामपंचायतीतील भ्रष्टाचाराचा मुद्दा पुन्हा एकदा ऐरणीवर आला आहे. बुधवारी (८ मे) एसीबीने रचलेल्या सापळ्यात २५ हजार रुपयांची लाच घेताना त्यांना अटक करण्यात आली.
पळशी ग्रामपंचायतीच्या हद्दीत ठेकेदाराने केलेल्या सिमेंट बंधाऱ्याच्या कामासाठी १६ लाख ४६ हजार रुपयांचे बिल मंजूर झाले होते. या कामाच्या बिलासाठी ग्रामसेवक काळाणे यांनी ठेकेदाराकडे ४ टक्क्यांप्रमाणे तब्बल ६० हजार रुपयांची मागणी केली होती. यातील १४ लाख ९६ हजार रुपयांचा पहिला धनादेश देताना त्यांनी आधीच ३० हजार रुपये रोख स्वरूपात स्वीकारले होते.
उर्वरित १ लाख ५० हजार रुपयांच्या बिलाच्या मंजुरीसाठी उर्वरित ३० हजार रुपये घेण्याच्या प्रयत्नात असताना ठेकेदाराने लाचलुचपत प्रतिबंधक विभागाकडे तक्रार नोंदवली. त्यानंतर बुधवारी पळशी गावात एका रस्त्याच्या बाजूला ठरल्याप्रमाणे २५ हजार रुपये घेताना काळाणे यांना एसीबीच्या अधिकाऱ्यांनी पकडले.
या प्रकरणी वडगाव निंबाळकर पोलिस ठाण्यात गुन्हा दाखल करण्यात आला असून ग्रामसेवकाच्या अटकेने संपूर्ण ग्रामपंचायत प्रशासनात खळबळ उडाली आहे.
