वाकाव रेल्वे अंडरपासला मंजुरी; खासदार धैर्यशील मोहिते-पाटील यांच्या पाठपुराव्याला यश
माढा | प्रतिनिधी :- माढा तालुक्यातील वाकाव येथील रेल्वे मार्गावरील नागरिकांच्या दीर्घकालीन मागणीला अखेर यश मिळाले असून, येथे रेल्वे अंडरपास (सबवे) उभारण्यास रेल्वे प्रशासनाने मंजुरी दिली आहे. माढा लोकसभा मतदारसंघाचे खासदार धैर्यशील मोहिते-पाटील यांच्या सातत्यपूर्ण पाठपुराव्यामुळे हा महत्त्वाचा प्रश्न मार्गी लागला आहे.
यासंदर्भात मध्य रेल्वेच्या सोलापूर विभागातील अपर मंडल रेल प्रबंधक यांनी खासदार मोहिते-पाटील यांना पत्राद्वारे मंजुरीची माहिती दिली आहे. वाकाव येथील रेल्वे किलोमीटर क्रमांक 403/8-9 येथे पादचाऱ्यांसाठी सबवे बांधण्याचे काम PH-16 योजनेअंतर्गत मंजूर करण्यात आले असून, मार्च 2027 पर्यंत हे काम पूर्ण होण्याची अपेक्षा व्यक्त करण्यात आली आहे.
वाकाव परिसरातील नागरिकांना रेल्वे मार्ग ओलांडताना अनेक अडचणींचा सामना करावा लागत होता. विशेषतः विद्यार्थ्यांसह शेतकरी आणि ग्रामस्थांच्या सुरक्षिततेचा प्रश्न गंभीर बनला होता. याची दखल घेत खासदार धैर्यशील मोहिते-पाटील यांनी रेल्वे प्रशासनाकडे सातत्याने पाठपुरावा केला होता.
या मंजुरीमुळे परिसरातील नागरिकांच्या सुरक्षिततेचा प्रश्न सुटण्यास मदत होणार असून, ग्रामस्थांनी समाधान व्यक्त करत खासदारांच्या प्रयत्नांचे स्वागत केले आहे.
