फलटण | गेल्या अनेक दिवसांपासून फलटण आगारात बस कमतरतेमुळे प्रवाशांना मोठ्या अडचणींचा सामना करावा लागत होता. मात्र, माजी खासदार रणजितसिंह नाईक निंबाळकर आणि आमदार सचिन पाटील यांच्या प्रयत्नांमुळे ही समस्या आता सुटणार आहे. फलटण आगारात अशोक लेलंड बीएस-6 प्रकारातील १० नवीन बसेस दाखल होत आहेत.
फलटण आगार व्यवस्थापक राहुल वाघमोडे यांनी सांगितले की, पुणे येथील दापोडी आगारातून ह्या नवीन बसेस लवकरच प्रवाशांच्या सेवेत दाखल होतील. त्यामुळे प्रवाशांना वेळेवर व सुरळीत बससेवा मिळेल.
आमदार सचिन पाटील यांनी यावर प्रतिक्रिया देताना सांगितले की, “प्रवाशांच्या सोयीसाठी बसेसची कमतरता दूर करणे हे आमचे प्राथमिक उद्दिष्ट होते. माजी खासदार रणजितसिंह नाईक निंबाळकर यांच्या सहकार्याने ही सुविधा शक्य झाली आहे. नवीन बसेस आल्याने प्रवाशांना मोठा दिलासा मिळेल.”
ही नवीन बससेवा सुरू झाल्यानंतर प्रवाशांची गैरसोय दूर होईल तसेच फलटण आगाराची कार्यक्षमता वाढेल, असेही आगार व्यवस्थापकांनी सांगितले.
