मृण्मयी देशपांडे ही मुळची पुण्याची आहे. तिचा जन्म २९ मे १९८८ रोजी पुण्याच्या सदाशिव पेठेत झाला. तिथेच ती लहानाची मोठी झाली. ‘रेणुका स्वरूप मेमोरियल गर्ल्स हायस्कूल’मधून तिने शालेय शिक्षण पूर्ण केलं. तर, पुढे एसपी कॉलेजमधून तिनं महाविद्यालयीन शिक्षण पूर्ण केलं. अवघ्या सातवी इयत्तेत असताना मृण्मयी अभिनय करू लागली होती. तिला स्वतःला कथकची देखील प्रचंड आवड होती. त्यामुळे तिने मनीषाताई साठे यांच्याकडून कथकचे धडे घेतले. मृण्मयी देशपांडे ही कथक विशारद देखील आहे. कथक, लावणी, शास्त्रीय संगीत, सातर ते वीणावादन या सगळ्याचीच आवड असल्याने, अभिनयात तिला या सगळ्याचा चांगला उपयोग झाला. कॉलेजमध्ये असताना देखील तिने अनेक नाटकांमध्ये विविध भूमिका केल्या. इतकंच नाही, तर तिने नाटकांचे दिग्दर्शनही केले.
