फलटण : फलटण ग्रामीण भागातील मांडवखडक, ता. फलटण गावच्या हद्दीत हॉटेल बाणगंगाजवळ रस्त्यावरून ये-जा करणाऱ्या नागरिकांना लुटण्याच्या तयारीत असलेल्या संशयितांच्या टोळीवर फलटण ग्रामीण पोलिसांनी कारवाई केली. या कारवाईत दोन आरोपींना पोलिसांनी शिताफीने ताब्यात घेतले असून, अन्य तीन आरोपी फरार झाले आहेत.
फलटण ग्रामीण पोलीस ठाण्याचे पोलीस निरीक्षक राजकुमार भुजबळ यांना मांडवखडक परिसरात काही इसम नागरिकांना लुटण्याच्या तयारीत असल्याची खात्रीशीर माहिती मिळाली होती. या माहितीच्या आधारे गुन्हे प्रकटीकरण पथकाने तत्काळ घटनास्थळी जाऊन कारवाई केली.
पोलिसांची चाहूल लागताच पाचही संशयित आरोपींनी घटनास्थळावरून पळ काढला. पोलिसांनी सुमारे दोन किलोमीटर पाठलाग करून ऊसाच्या शेतातून तसेच कुरवली तलावाजवळून दोन आरोपींना ताब्यात घेतले. त्यांच्याकडून लुटमार व चोरीसाठी वापरण्यात येणारा मुद्देमाल जप्त करण्यात आला आहे.
अटक करण्यात आलेल्या आरोपींची नावे राहुल नाना घुले (रा. इंदिरानगर, मलटण, ता. फलटण) आणि नंदकुमार भागोजी सोनवणे (रा. झिरपवाडी, ता. फलटण) अशी आहेत. अन्य तीन आरोपी फरार असून, त्यांचा शोध सुरू आहे.
या प्रकरणी फलटण ग्रामीण पोलीस ठाण्यात गु.र. नं. ४८२/२०२६, भारतीय न्याय संहिता कलम ३१०(४)(५) अन्वये गुन्हा दाखल करण्यात आला आहे. अटक आरोपींकडून फलटण ग्रामीण भागातील आणखी काही चोरी व लुटमारीचे गुन्हे उघडकीस येण्याची शक्यता असून, पोलिसांकडून अधिक तपास सुरू आहे.
ही कारवाई पोलीस अधीक्षक निखिल पिंगळे, अपर पोलीस अधीक्षक वैशाली कडुकर आणि उपविभागीय पोलीस अधिकारी धन्यकुमार गोडसे यांच्या सूचनांनुसार पोलीस निरीक्षक राजकुमार भुजबळ यांच्या मार्गदर्शनाखाली करण्यात आली.
या कारवाईत सहायक पोलीस निरीक्षक प्रशांत सुबनावळ, पोलीस उपनिरीक्षक दिपक पवार, पोलीस हवालदार नितीन चतुरे, अमोल जगदाळे, श्रीनाथ कदम तसेच पोलीस कॉन्स्टेबल हनुमंत दडस व तुषार नलवडे यांनी सहभाग घेतला.
