महिला व ज्येष्ठ नागरिकांसाठी NCMC कार्ड वितरण मेळावा उत्साहात; 262 लाभार्थ्यांना कार्डांचे वाटप
श्रीमंत संजीवराजे नाईक निंबाळकर यांच्या हस्ते वितरण; लवकरच आधार नोंदणी व दुरुस्ती शिबिराचे आयोजन
फलटण | प्रतिनिधी. फलटण शहरातील महिला, ज्येष्ठ नागरिक आणि सर्वसामान्य नागरिकांच्या सोयीसाठी माजी नगरसेवक किशोरसिंह नाईक निंबाळकर यांच्या संकल्पनेतून व शिवसेनेच्या माध्यमातून प्रभाग क्रमांक ४ व ८ मध्ये आयोजित करण्यात आलेल्या NCMC (नॅशनल कॉमन मोबिलिटी कार्ड) वितरण मेळाव्यास नागरिकांचा उत्स्फूर्त प्रतिसाद लाभला. या उपक्रमांतर्गत नोंदणी केलेल्या 262 महिला व ज्येष्ठ नागरिकांची कार्डे ॲक्टिव्ह करून त्यांचे वितरण शिवसेना नेते तथा सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर यांच्या हस्ते करण्यात आले.
फलटण येथील प्रमुख बसस्थानकावर जाऊन NCMC कार्डासाठी नोंदणी करताना अनेक महिला व ज्येष्ठ नागरिकांना विविध अडचणींचा सामना करावा लागत असल्याची बाब लक्षात घेऊन हा विशेष मेळावा आयोजित करण्यात आला होता. त्यामुळे लाभार्थ्यांना घराजवळच सहज व सुलभ पद्धतीने ही सुविधा उपलब्ध झाली.
कार्यक्रमादरम्यान उपस्थित नागरिकांना NCMC कार्डाच्या वापराबाबत सविस्तर माहिती देण्यात आली. एकाच कार्डच्या माध्यमातून एसटी बस, मेट्रो तसेच विविध सार्वजनिक वाहतूक सेवांचा लाभ घेता येणार असल्याने नागरिकांमध्ये या सुविधेबाबत विशेष उत्सुकता दिसून आली.
यावेळी बोलताना श्रीमंत संजीवराजे नाईक निंबाळकर म्हणाले, “एसटी प्रवासाबरोबरच भविष्यात विविध सार्वजनिक वाहतूक सेवा आणि डिजिटल व्यवहारांसाठी NCMC कार्ड महत्त्वाची भूमिका बजावणार आहे. नागरिकांना आधुनिक सुविधा उपलब्ध करून देण्यासाठी आणि डिजिटल व्यवहारांना प्रोत्साहन देण्यासाठी अशा उपक्रमांची आवश्यकता आहे.”
यावेळी नगरसेवक पप्पूभाई शेख, माजी नगरसेविका सौ. प्रगती कापसे, अमरअप्पा खानविलकर, किशोरतात्या देशपांडे, गाडे साहेब, दळवी साहेब, विजय जाधव, मेघना सहस्रबुद्धे, पत्रकार काकासाहेब खराडे, भाऊसाहेब कापसे, संतोष वेलणकर आदी मान्यवर उपस्थित होते.
तसेच नागरिकांच्या सोयीसाठी आधार कार्ड दुरुस्ती व नवीन आधार नोंदणी शिबिराचे आयोजनही लवकरच श्रीमंत संजीवराजे नाईक निंबाळकर यांच्या मार्गदर्शनाखाली करण्यात येणार असल्याची घोषणा यावेळी करण्यात आली.
कार्यक्रमाचे सूत्रसंचालन सचिन कुलकर्णी यांनी केले, तर आभार वैभव विष्णूप्रत यांनी मानले. माजी नगरसेवक किशोरसिंह नाईक निंबाळकर मित्र मंडळाच्या वतीने या उपक्रमाचे आयोजन करण्यात आले होते.
महिला, ज्येष्ठ नागरिक आणि सर्वसामान्य नागरिकांना घराजवळच महत्त्वाची सुविधा उपलब्ध करून दिल्याबद्दल उपस्थित नागरिकांनी आयोजकांचे कौतुक केले. भविष्यातही अशाच लोकाभिमुख आणि जनहिताच्या उपक्रमांचे आयोजन व्हावे, अशी अपेक्षाही नागरिकांनी व्यक्त केली.
