फलटण : सोशल मीडियावर बनावट इन्स्टाग्राम आयडी तयार करून एका महिलेविषयी आक्षेपार्ह व अश्लील फोटो, व्हिडिओ तसेच संदेश प्रसारित करून बदनामी करणाऱ्या दोन आरोपींना फलटण शहर पोलिसांनी अटक केली आहे. या प्रकरणामुळे परिसरात खळबळ उडाली आहे.
पोलिसांनी दिलेल्या माहितीनुसार, पीडित महिलेच्या तक्रारीवरून फलटण शहर पोलीस ठाण्यात भारतीय न्याय संहिता (BNS) तसेच माहिती व तंत्रज्ञान अधिनियमांतर्गत गुन्हा दाखल करण्यात आला होता. तपासादरम्यान आरोपींनी दुसऱ्या व्यक्तीच्या नावाने सिमकार्ड घेऊन बनावट इन्स्टाग्राम खाते तयार केल्याचे उघड झाले.
या बनावट खात्याद्वारे संबंधित महिलेचे मॉर्फ केलेले फोटो तसेच अश्लील संदेश फेसबुक, इन्स्टाग्राम आणि व्हॉट्सअॅपवर प्रसारित करण्यात येत होते. यामुळे संबंधित महिला आणि तिच्या पतीची सामाजिक बदनामी करण्याचा प्रयत्न करण्यात आल्याचे तपासात निष्पन्न झाले.
तांत्रिक तपास आणि डिजिटल पुराव्यांच्या आधारे पोलिसांनी प्रमोद सनद कांबळे (वय ३२, रा. लक्ष्मीनगर, फलटण) आणि सुनील बाळू मोहिते (वय ३४, रा. वाठार निंबाळकर, ता. फलटण) यांना ताब्यात घेतले. तपासात सुनील मोहिते हा एका टेलिकॉम कंपनीचा सिमकार्ड विक्रेता असल्याचे समोर आले असून, त्याने दुसऱ्या व्यक्तीच्या नावावर सिमकार्ड उपलब्ध करून दिल्याची माहिती पोलिसांनी दिली.
या कारवाईदरम्यान पोलिसांनी आरोपींकडून ४ मोबाईल हँडसेट, ६ सिमकार्ड आणि सुमारे २३ हजार ५०० रुपयांचा मुद्देमाल जप्त केला आहे.
ही कारवाई पोलीस अधीक्षक सातारा यांच्या मार्गदर्शनाखाली फलटण शहर पोलीस ठाण्याचे पोलीस निरीक्षक अरविंद काळे आणि त्यांच्या पथकाने यशस्वीरीत्या पार पाडली.
बनावट इन्स्टाग्राम आयडीद्वारे महिलेची बदनामी; फलटण शहर पोलिसांकडून दोन आरोपी अटकेत
