फलटण प्रतिनिधी : फलटण नगरपरिषदेच्या 2025 च्या निवडणुकीची रणधुमाळी आता चांगलीच रंगात आली आहे. अजून एकही उमेदवारी अर्ज दाखल झालेला नसला, तरी शहरात राजकीय हालचालींनी तापमान वाढले आहे. अनेक इच्छुक उमेदवार गट बदलत असल्याने त्यांचं गणित बिघडले आहे. काही दिवसांपासून तयारीला लागलेले कार्यकर्ते आता संभ्रमात पडले आहेत.
रामराजेंचा गड, रणजितसिंहांचे आव्हान
गेल्या 30 वर्षांपासून फलटण नगरपरिषदेवर आमदार श्रीमंत रामराजे नाईक-निंबाळकर यांची सत्ता आहे. पण यावेळी माजी खासदार रणजितसिंह नाईक-निंबाळकर यांनी त्यांना टक्कर देण्यासाठी तयारी केली आहे. दोन्ही गटांकडून बैठका, सभा आणि प्रचाराचे सत्र सुरू आहे.
महायुतीत नगराध्यक्षपदासाठी रस्सीखेच
महायुतीमध्ये नगराध्यक्ष पदासाठी दोन मोठे नेते प्रयत्न करत असून, कोणाला उमेदवारी मिळणार याकडे फलटणकर जनतेचे लक्ष लागले आहे.
रामराजेंकडे उमेदवारांची मोठी रांग
रामराजे यांनी स्वतः इच्छुक उमेदवारांच्या मुलाखती घेतल्या असून त्याला चांगला प्रतिसाद मिळाला आहे. त्यांच्या गटात उमेदवारांची संख्या जास्त असल्याने उमेदवारी ठरवताना त्यांना अडचण येऊ शकते. काही सहकाऱ्यांनी विरोधी गटात प्रवेश केला असला तरी, राजेंकडे अजूनही प्रबळ उमेदवारांची मोठी फौज आहे.
अनिकेतराजे की नवखा उमेदवार?
राजे गटातून युवराज अनिकेतराजे नाईक-निंबाळकर यांचे नाव नगराध्यक्षपदासाठी चर्चेत आहे. मात्र, शेवटच्या क्षणी श्रीमंत रामराजे नवख्या चेहऱ्याला संधी देतील, अशीही चर्चा आहे. सध्या ते बाहेरगावी असून ते फलटणमध्ये परतल्यावरच गटाची खरी निवडणूक रणनीती ठरणार आहे.
आयाराम-गयारामचा खेळ अजूनही सुरू
एका गटातून दुसऱ्या गटात जाण्याचे सत्र अजूनही थांबलेले नाही. उमेदवारी मागे घेण्याचा शेवटचा दिवस येईपर्यंत या हालचाली सुरू राहतील असे दिसते. खरे चित्र शेवटच्या क्षणीच स्पष्ट होणार आहे.
