प्रभाग क्रमांक १२ मध्ये विकास काकडे सर यांना जनतेचा पाठिंबा; सामाजिक कार्यातून उभं राहिलेलं नेतृत्व
फलटण (प्रतिनिधी): फलटण नगरपरिषद निवडणुकीचे पडघम वाजू लागले असून प्रभाग क्रमांक १२ मध्ये विशेष लक्ष वेधून घेतले जात आहे. विविध राजकीय गटांमधून इच्छुक उमेदवारांची चर्चा सुरू असताना, जनतेतूनच एक नावलौकिक प्राप्त व्यक्तिमत्त्व म्हणून विकास वसंतराव काकडे सर यांचे नाव पुढे येत आहे.
सामाजिक कार्याची ठसठशीत पावले
विकास काकडे सर हे राजे गटाचे निष्ठावान व विश्वासू कार्यकर्ते मानले जातात. सामाजिक बांधिलकी जपत त्यांनी अनेक उपक्रम राबवले असून, साहस क्रीडा मंडळाचे अध्यक्ष म्हणून त्यांनी महापुरुष जयंती, रक्तदान शिबीर, श्रामणेर शिबीर, मोफत पाठ्यपुस्तक वाटप, तसेच गरीब व गरजू विद्यार्थ्यांना शैक्षणिक मदत पुरविण्याचे कार्य सातत्याने केले आहे.
कोविड काळातही मदतीचा हात पुढे
कोविडच्या संकटमय काळात सरांनी शाळकरी मुलांसाठी शिधा वाटप, आर्थिक मदत, तसेच ताथवडा आश्रमशाळा व वृद्धाश्रमातील नागरिकांची मदत करून सामाजिक भान जपले. अनुसूचित जाती-जमाती अत्याचार प्रतिबंधक जिल्हा दक्षता समितीचे सदस्य म्हणून त्यांनी अनेकांना मदत केली आहे.
शैक्षणिक व सहकार क्षेत्रातील समृद्ध अनुभव
विकास काकडे सर हे श्रीमंत मालोजीराजे शेती विद्यालयाचे माजी उपप्राचार्य असून, मुधोजी हायस्कूलमध्ये त्यांनी दीर्घकाळ सेवा दिली. तसेच, शिक्षक पतसंस्था व सहकारी संस्थांमध्ये ते व्हाइस चेअरमन म्हणून कार्यरत होते. सातारा सहकार बोर्डाचे ते संचालक आहेत.
सांस्कृतिक, साहित्य, व विचारमंथनातून समाज जागृती
हिंदी राष्ट्रभाषा प्रचारक म्हणून त्यांना पुणे हिंदी प्रचारक संस्थेचा पुरस्कार प्राप्त झाला आहे. शिक्षक, प्राध्यापक व विद्यार्थ्यांच्या संयुक्त समितीच्या माध्यमातून 1991 मध्ये फलटण येथे डॉ. बाबासाहेब आंबेडकर व महात्मा फुले स्मृती शताब्दी व्याख्यानमाला आयोजित करून त्यांनी सामाजिक विचारधारेची मुहूर्तमेढ रोवली.
राजघराण्याशी जिव्हाळ्याचं नातं
श्रीमंत रामराजे, श्रीमंत रघुनाथराजे आणि श्रीमंत संजीवराजे नाईक निंबाळकर यांच्याशी त्यांचे घनिष्ठ व विश्वासाचं नातं असून, राजे गटाचे खंदे कार्यकर्ते म्हणून त्यांची ओळख आहे. अनेक वर्षांपासून ते सामाजिक व सांस्कृतिक कार्यक्रमांचे नेतृत्व करत आले आहेत.
दलित चळवळीतील सक्रीय सहभाग
डॉ. बाबासाहेब आंबेडकर व तथागत गौतम बुद्ध जयंती महोत्सवाच्या माध्यमातून त्यांनी दलित व बहुजन समाजातील युवकांमध्ये जागरूकता निर्माण केली आहे. त्यांच्या नेतृत्वात स्वराज्यरक्षक छत्रपती संभाजीराजे यांची प्रतिमा मिरवणूक काढण्याच्या मान विकास काकडे सर यांच्या नेतृत्वाखाली भगवान गौतम बुद्ध जयंती महोत्सव समितीला मिळाला . तसेच जयंती मिरवणुका, सामाजिक विचारधारा रुजवण्यासाठी विविध उपक्रम यशस्वीरित्या पार पाडले गेले.
जनतेतून उमेदवारीची मागणी
प्रभाग क्रमांक १२ मधील नागरिकांमध्ये विकास काकडे सरांविषयी विश्वास व आदर आहे तसेच त्यांचा दांडगा जनसंपर्क आहे. त्यांच्या सामाजिक जाणिवा, तळागाळातील लोकांसाठी केलेले कार्य आणि सर्वसमावेशक दृष्टिकोन लक्षात घेता, त्यांना उमेदवारी मिळावी अशी सामान्य जनतेतून व कार्यकर्त्यांतून जोरदार मागणी होत आहे.
अष्टपैलू, अभ्यासू, आणि कार्यक्षम नेतृत्व असलेल्या विकास काकडे सरांसारख्या व्यक्तिमत्त्वाने स्थानिक राजकारणात प्रवेश केल्यास प्रभाग क्रमांक १२ मध्ये नक्कीच सकारात्मक बदल होऊ शकतो, अशी अपेक्षा मतदार व्यक्त करत आहेत.
—
