सातारा, दि. ५ ऑगस्ट (साहस टाइम्स):पवित्र शिक्षण क्षेत्राला बोगसगिरीचा काळा डाग लावणाऱ्या बोगस शिक्षकांवर सातत्याने आवाज उठवणाऱ्या दैनिक पुण्यनगरीने उघड केलेल्या प्रकाराची जिल्हा परिषदेच्या मुख्य कार्यकारी अधिकारी याशनी नागराजन यांनी गंभीर दखल घेतली आहे. त्यांनी खोट्या दिव्यांग प्रमाणपत्रांवर बदली मिळवणाऱ्या व संवर्ग १चा लाभ घेणाऱ्या शिक्षकांविरोधात थेट कारवाईचा बडगा उगारत ‘याशनी पॅटर्न’च्या माध्यमातून खऱ्या अर्थाने न्यायाचा नवा अध्याय लिहायला सुरुवात केली आहे.
खोटी दिव्यांग सर्टिफिकेट, मेंदूविकार, घटस्फोट, दुर्धर आजार यासारख्या फसव्या कारणांनी प्राथमिक शिक्षकांनी संवर्ग बदल करून शिक्षण खात्याची व समाजाची फसवणूक केली. काहींनी तर ऑनलाईन बदली पोर्टलवरून नवीन शाळा स्वीकारल्या, तर काहींनी बदली नाकारून मूळ शाळेत राहूनच अनधिकृत लाभ घेतले.
या बोगसगिरीची वैद्यकीय फेरपडताळणी करताना अनेक शिक्षक अपात्र आढळून आले असून, त्यांच्या विरोधात कारवाईस सुरुवात करण्यात आली आहे. या शिक्षकांनी जे लाभ घेतले आहेत ते रद्द करून त्यांच्या जागा संवर्ग चारमधील पात्र शिक्षकांसाठी खुल्या करण्यात याव्यात, अशी शिफारस सीईओ नागराजन यांनी ग्रामविकास विभागाच्या प्रधान सचिवांकडे पत्राद्वारे केली आहे.
याशनी नागराजन यांच्या या धाडसी, पारदर्शक आणि निर्भीड निर्णयामुळे शिक्षण क्षेत्रात प्रामाणिकपणे कार्यरत असलेल्या शिक्षकांना न्याय मिळणार असून, जिल्हा परिषदेचे कार्य अधिक विश्वासार्ह व पारदर्शक ठरणार आहे.
राज्यभर कौतुकाची लाट!
याशनी पॅटर्नमुळे संपूर्ण राज्यात सातारा जिल्हा चर्चेत आला असून, त्यांच्या धडाकेबाज आणि न्यायिक कामगिरीचे अनेक स्तरांवरून कौतुक होत आहे. सातारा जिल्हा क्रांतिवीरांची भूमी असली, तरी आज तो प्रशासनिक क्रांतीची दिशा देणारा जिल्हा बनत आहे.
निष्कर्ष:
प्रामाणिक शिक्षकांना न्याय मिळवून देणाऱ्या या निर्णयामुळे शिक्षण क्षेत्रातील पारदर्शकतेला चालना मिळणार आहे. अपात्र शिक्षकांच्या जागा रिक्त करून त्या पात्र शिक्षकांसाठी खुल्या केल्यास, शिक्षण व्यवस्थेतील नैतिकतेला बळ मिळणार आहे.
याशनी नागराजन यांचा ‘याशनी पॅटर्न’ आता केवळ सातारा नव्हे तर महाराष्ट्रातही आदर्श ठरतोय!
