[ad_1]
पुणे : पॅलेस्टाइनच्या समर्थनार्थ एका तरुणाने पत्रकाचे वाटप केल्याची घटना कर्वेनगर भागात घडली. या घटनेनंतर राजकीय पक्षाचे कार्यकर्ते आणि नागरिकांनी तरुणाला चोप दिला. या घटनेनंतर दाेन्ही बाजूंचे कार्यकर्ते वारजे पोलीस ठाण्यात तक्रार देण्यासाठी गेले. रात्री उशिरापर्यंत याप्रकरणी गुन्हा दाखल झाला नव्हता.
कर्वेनगर भागात काही तरुण पॅलेस्टाइनच्या समर्थनार्थ भित्तिचित्र दाखवून एका पिझ्झा विक्री दुकानासमोर पत्रके वाटत होते. इस्रायली कंपनी, तसेच उत्पादनांवर बहिष्कार घालावा, असा मजकूर या पत्रकात होता. या घटनेची माहिती मिळताच भारतीय जनता पक्षाचे स्थानिक कार्यकर्ते तेथे गेले. त्यांनी पत्रकांचे वाटप करणाऱ्या तरुणांना रोखून आक्षेप घेतला. त्यांना जाब विचारून त्यांनी मारहाण करण्यास सुरुवात केली. त्यानंतर या भागात जमलेल्या नागरिकांनी तरुणांना चोप दिला. माहिती मिळताच पोलिसांनी घटनास्थळी धाव घेतली. तरुणांना मारहाण करतानाची चित्रफीत समाजमाध्यमात प्रसारित झाली. पत्रकांचे वाटप करणाऱ्या तरुणांविरुद्ध गुन्हा दाखल करण्याची मागणी कार्यकर्त्यांनी केली.
दरम्यान, पाकिस्तान झिंदाबाद असा मजकूर समाजमाध्यमात प्रसारित करण्याची घटना कोंढवा भागात घडली. याप्रकरणी पोलिसांनी एका युवतीला अटक केली. तिला न्यायालयाने पोलीस कोठडीत ठेवण्याचा आदेश दिला. युवती एका शैक्षणिक संस्थेत शिक्षण घेत होती. तिला संस्थेतून काढून टाकण्यात आल्याची माहिती सूत्रांनी दिली.
[ad_2]
Source link
