तथागत गौतम बुद्ध जयंतीनिमित्त फलटणमध्ये खीरदान व खाऊ वाटप
फलटण, — भगवान तथागत गौतम बुद्ध यांच्या जयंतीनिमित्त फलटण नगरपरिषदेच्या वतीने म्युनिसिपल कामगार वसाहत (महात्मा फुले नगर) येथे उत्साहात कार्यक्रम साजरा करण्यात आला. यावेळी नगराध्यक्ष समशेरसिंह नाईक निंबाळकर, नगरसेवक सचिन अहिवळे, अशोकराव जाधव, नगरसेविका सुपर्णाताई अहिवळे, नगरसेविका मीनाताई काकडे तसेच सामाजिक व राजकीय क्षेत्रातील अनेक मान्यवर उपस्थित होते.
कार्यक्रमाची सुरुवात भगवान गौतम बुद्ध व भारतरत्न डॉ. बाबासाहेब आंबेडकर यांच्या प्रतिमांना अभिवादन करून करण्यात आली. यानंतर उपस्थित मान्यवरांनी बुद्धांच्या विचारांचे महत्त्व अधोरेखित करत समाजात समता, बंधुता आणि शांततेचा संदेश दिला.
फलटण-कोरेगाव विधानसभा मतदारसंघाचे आमदार सचिन कांबळे पाटील यांनीही कार्यक्रमास उपस्थित राहून अभिवादन केले. यावेळी कार्यकर्त्यांकडून खीरदान व जिलेबी वाटप करून जयंती महोत्सवाचा आनंद साजरा करण्यात आला. कार्यक्रमाला म्युनिसिपल कामगार वसाहतीतील उपासक-उपासिका मोठ्या संख्येने उपस्थित होते.
दरम्यान, बुद्ध पौर्णिमेच्या निमित्ताने लोकनियुक्त नगराध्यक्ष समशेरदादा नाईक निंबाळकर, आरोग्य सभापती सचिन अहिवळे व अशोक जाधव यांनी कामगार कॉलनीतील लहान मुलांना खाऊ वाटप करून सामाजिक बांधिलकी जपली. या उपक्रमाबद्दल स्थानिक नागरिकांनी सर्व मान्यवरांचे मनःपूर्वक आभार मानले.
संपूर्ण कार्यक्रम उत्साहपूर्ण वातावरणात पार पडला असून बुद्धांच्या शिकवणीप्रमाणे समाजात सौहार्द व मानवतेचा संदेश देण्याचा प्रयत्न करण्यात आला.
