फलटण :- फलटण तालुक्यातील ढवळपाटी, वाखरी परिसरात 10 एप्रिल 2026 रोजी पहाटे सुमारे 1.20 वाजता घडलेल्या घटनेत 18 वर्षीय सोमनाथ संदीप जाधव याचा निर्घृण खून करण्यात आल्याची धक्कादायक घटना समोर आली आहे. मि-याचीवाडी कमानीजवळ ही घटना घडली.
या प्रकरणी संदीप उमाजी जाधव (रा. मि-याचीवाडी, ता. फलटण) यांनी फलटण ग्रामीण पोलीस ठाण्यात फिर्याद दाखल केली आहे. फिर्यादीत नमूद केल्याप्रमाणे, सोमनाथ हा एका अल्पवयीन मुलीशी मोबाईलवरून सोशल मीडियाद्वारे संवाद साधत असल्याच्या रागातून आरोपींनी त्याच्यावर लाथाबुक्क्यांनी मारहाण करून तसेच उचलून आपटत त्याचा खून केला.
या प्रकरणी आदित्य विजय शिंदे (वय 23), तेजस उर्फ चिक्या शिवाजी लोखंडे (वय 24) आणि प्रद्युम्न उर्फ पिंट्या पांडुरंग लोखंडे (वय 22), सर्व रा. ढवळ, ता. फलटण यांच्याविरुद्ध गुन्हा नोंद करण्यात आला आहे. गुन्हा दाखल होताच आरोपी फरार झाले होते; मात्र पोलिसांनी तातडीने तपास करून त्यांना अटक केली.
आदित्य शिंदे याला 11 एप्रिल रोजी अटक करून न्यायालयात हजर केले असता 16 एप्रिलपर्यंत पोलीस कोठडी सुनावण्यात आली आहे. तसेच उर्वरित दोन्ही आरोपींना 13 एप्रिल रोजी अटक करण्यात आली असून त्यांना 14 एप्रिल रोजी न्यायालयात हजर करण्यात आले.
ही कारवाई पोलीस अधीक्षक तुषार दोशी, अपर पोलीस अधीक्षक वैशाली कडुकर आणि उपविभागीय पोलीस अधिकारी विशाल खांबे यांच्या मार्गदर्शनाखाली, पोलीस निरीक्षक संदीप जगताप यांच्या नेतृत्वात पार पडली. या तपासात उपनिरीक्षक दिपक पवार, महिला उपनिरीक्षक ज्योती चव्हाण तसेच पोलीस कर्मचारी नितीन चतुरे, अमोल जगदाळे, श्रीनाथ कदम, वैभव सुर्यवंशी, तुषार नलवडे, हणमंत दडस आणि शिवराज जाधव यांनी सहभाग घेतला.
फलटणमध्ये तरुणाचा खून; तिघा संशयितांना अटक
