सोलापूर, 20 जून – सोलापूर शहरातील कर्णिकनगर परिसरात एका युवक आणि युवतीने स्कार्फच्या सहाय्याने गळफास घेऊन आत्महत्या केल्याची धक्कादायक घटना घडली आहे. या दोघांनी आत्महत्येपूर्वी लिहिलेली चिठ्ठी पोलिसांना सापडली असून, “आम्ही दोघे भाऊ-बहीण आहोत, आमच्या मृत्यूनंतर नात्यावर कुठलीही शंका घेऊ नये,” असा स्पष्ट उल्लेख या चिठ्ठीत करण्यात आला आहे.
आत्महत्या केलेल्यांची नावे रोहित ठणकेदार आणि अश्विनी केशापुरे अशी आहेत. रोहित हा चालक म्हणून काम करत होता तर अश्विनी हिने बी. फार्मसीपर्यंतचे शिक्षण पूर्ण केले होते. मिळालेल्या माहितीनुसार, अश्विनी ही रोहितची मानलेली बहीण होती आणि त्यांच्यात भावनिक जिव्हाळ्याचं नातं होतं.
दोघांचे मृतदेह कर्णिकनगर येथील एका बंगल्याच्या दुसऱ्या मजल्यावर आढळून आले. प्राथमिक तपासात, दोघांनी स्कार्फच्या सहाय्याने गळफास घेतल्याचे समोर आले आहे. घटनेची माहिती मिळताच एमआयडीसी पोलीस ठाण्याचे अधिकारी तातडीने घटनास्थळी दाखल झाले व पंचनामा करून मृतदेह शासकीय रुग्णालयात शवविच्छेदनासाठी पाठवण्यात आले आहेत.
पोलीस तपासादरम्यान आत्महत्येसंदर्भात एक चिठ्ठी आढळून आली असून, त्या चिठ्ठीत लिहिले आहे की, “आम्ही एकमेकांसोबत शेवटपर्यंत आहोत. आमच्या नात्यावर कोणतीही शंका घेऊ नये.” विशेष म्हणजे, आत्महत्येपूर्वी दोघांनी आपल्या मोबाईल स्टेटसवरही ‘भाऊ-बहीण’ असा उल्लेख केल्याचे निष्पन्न झाले आहे.
या दुर्दैवी घटनेमुळे परिसरात हळहळ व्यक्त केली जात असून, दोघांच्या कुटुंबीयांनी मोठा आक्रोश केला.
दरम्यान, या प्रकरणी सोलापूर सिव्हिल पोलीस ठाण्यात गुन्हा नोंद करण्यात आला असून आत्महत्येमागील नेमके कारण काय, याचा शोध पोलीस घेत आहेत.
