फलटण : फलटण शहरातील नागरिकांची दीर्घकालीन प्रतीक्षा लवकरच संपणार आहे. फलटण शहरात नूतन अत्याधुनिक बस स्थानक उभारण्यास राज्य सरकारने अधिकृत मान्यता दिली असून, लवकरच या कामाला प्रत्यक्ष सुरुवात होणार असल्याची माहिती आमदार सचिन पाटील यांनी दिली आहे.
पंढरपूर पालखी महामार्गावर वसलेले आणि सतत वाढणाऱ्या लोकसंख्येमुळे फलटण शहराची व्याप्ती वाढत आहे. प्रवाशांची वाढती संख्या, बस स्थानकावरील कमी सुविधा आणि नागरिकांच्या सातत्याने होणाऱ्या मागणीनंतर अखेर शासनाच्या संबंधित यंत्रणेकडून सकारात्मक निर्णय घेण्यात आला आहे. आमदार सचिन पाटील आणि खासदार रणजितसिंह नाईक निंबाळकर यांच्या सातत्यपूर्ण पाठपुराव्यामुळे हा निर्णय शक्य झाल्याचे त्यांनी सांगितले.
हा प्रकल्प सार्वजनिक-खाजगी सहभाग (PPP) तत्वावर उभारण्यात येणार असून, बसस्थानकासह एक आधुनिक व्यापारी संकुलदेखील तयार होणार आहे. त्यामुळे प्रवाशांसह स्थानिक व्यावसायिकांनाही याचा मोठा फायदा होणार आहे. लवकरच या प्रकल्पासाठी निधी वितरीत होणार असून, त्यानंतर कामास गती दिली जाणार आहे.
आमदार सचिन पाटील यांनी या निर्णयासाठी मुख्यमंत्री देवेंद्र फडणवीस, उपमुख्यमंत्री अजित पवार तसेच महाराष्ट्र राज्य परिवहन महामंडळाचे आभार मानले आहेत.
