कास्ट्राईब शिक्षक संघटनेच्या पुढाकारातून माण तालुक्यातील गुणवंत विद्यार्थ्यांचा गुणगौरव; शिष्यवृत्ती, नवोदय, प्रज्ञाशोध व मंथन स्पर्धांतील यशस्वी विद्यार्थ्यांचा सन्मान
दहिवडी | प्रतिनिधी :- कास्ट्राईब शिक्षक संघटनेच्या वतीने माण तालुक्यातील शिष्यवृत्ती, नवोदय प्रवेश, प्रज्ञाशोध आणि मंथन स्पर्धा परीक्षांमध्ये उल्लेखनीय यश मिळवलेल्या गुणवंत विद्यार्थ्यांचा गुणगौरव सोहळा शनिवारी (दि. १८ जुलै २०२६) दहिवडी जिल्हा परिषद शाळा क्रमांक १ च्या सभागृहात उत्साहात पार पडला.
कार्यक्रमाच्या अध्यक्षस्थानी सहाय्यक गटविकास अधिकारी खाडे साहेब होते, तर गटशिक्षणाधिकारी लक्ष्मण पिसे यांची प्रमुख उपस्थिती लाभली.
यावेळी नवमहाराष्ट्र विद्यामंदिर, बिदाल येथील विद्यार्थिनी आर्या गणेश माईनकर हिने राज्य गुणवत्ता यादीत तिसरा तर जिल्हा गुणवत्ता यादीत प्रथम क्रमांक मिळवल्याबद्दल विशेष सत्कार करण्यात आला. तसेच राज्य गुणवत्ता यादीत १४ वा व जिल्हा गुणवत्ता यादीत सहावा क्रमांक मिळवणारी सिद्धी राजेंद्र ढोक हिचाही मान्यवरांच्या हस्ते गौरव करण्यात आला.
याशिवाय जिल्हा गुणवत्ता यादीत ४८ वा क्रमांक मिळवणारे श्रीतेज माने (बिदाल हायस्कूल), नील जाधव व स्वराज खाडे (महात्मा गांधी हायस्कूल, दहिवडी), तसेच शिष्यवृत्ती व नवोदय परीक्षेत यशस्वी ठरलेले जय काटकर (जि. प. शाळा क्र. १, दहिवडी) यांचा सत्कार करण्यात आला.
प्रज्ञाशोध परीक्षेत यशस्वी विद्यार्थ्यांमध्ये अनुराग गलंडे (जि. प. शाळा शिंदी बु.), स्वप्नाली राऊत (जि. प. शाळा गोसावीवाडी), शिवम कोकरे, अवनी बोराटे व कार्तिकी माने (जि. प. शाळा वाघमोडेवाडी), अद्वैत ढोले (जि. प. शाळा पळशी) आणि यज्ञेश देवकर (गोसावी वस्ती) यांचा समावेश होता. सर्व यशस्वी विद्यार्थी, त्यांचे पालक आणि मार्गदर्शक शिक्षकांचा शिल्ड, पुस्तक आणि गुलाबपुष्प देऊन सन्मान करण्यात आला.
कार्यक्रमात मार्गदर्शन करताना गटशिक्षणाधिकारी लक्ष्मण पिसे यांनी कास्ट्राईब शिक्षक संघटनेच्या शैक्षणिक व सामाजिक कार्याचे कौतुक केले. तसेच संघटनेचे नेते संजय दिनकर खरात, उमेश गायकवाड आणि केशर माने यांच्या कार्याचा विशेष उल्लेख केला.
कार्यक्रमाचे प्रास्ताविक कास्ट्राईब शिक्षक संघटनेचे तालुका अध्यक्ष शैलेश बोराटे यांनी केले, तर सूत्रसंचालन केशर माने मॅडम यांनी केले. कास्ट्राईब महिला आघाडीच्या माण तालुका अध्यक्षा सुषमा सावंत मॅडम यांनी कार्यक्रमाचे उत्कृष्ट नियोजन केले.
विद्यार्थ्यांमध्ये वाचन संस्कृती रुजावी या उद्देशाने शैलेश बोराटे आणि तालुका संघटक वैभव झेंडे यांनी वैज्ञानिक, समाजसुधारक आणि संतांच्या विचारांची पुस्तके विद्यार्थ्यांना भेट देण्याचा उपक्रम राबवला. कार्यक्रमाच्या यशस्वी आयोजनासाठी तालुका खजिनदार संतोष पवार यांनी विशेष परिश्रम घेतले.
जिल्हा परिषद शाळा क्रमांक १ चे मुख्याध्यापक विजय खरात यांनी कार्यक्रमासाठी मोलाचे सहकार्य केले.
यावेळी संघटनेचे संस्थापक नेते संजय दिनकर खरात यांनी २०१२ मध्ये माण तालुक्यात कास्ट्राईब शिक्षक संघटनेची स्थापना करून महाड क्रांतीभूमीच्या समतेच्या विचारांचा प्रसार करण्याचे कार्य सुरू केले असल्याचा गौरवपूर्ण उल्लेख करण्यात आला.
कार्यक्रमाच्या शेवटी संघटनेचे नेते उमेश गायकवाड यांनी उपस्थित मान्यवर, शिक्षक, पालक आणि विद्यार्थ्यांचे आभार मानले.
विद्यार्थ्यांच्या गुणवत्तेला प्रोत्साहन देत त्यांच्यात आत्मविश्वास निर्माण करणारा हा गुणगौरव सोहळा प्रेरणादायी ठरला.
