संत ज्ञानेश्वर महाराज पालखी सोहळ्यात MAG Finserv व MAG Multistate चा सेवाभाव; ५ हजार वारकऱ्यांना प्रेमाने अल्पोपहार वाटप
फलटण | प्रतिनिधी : विशाल पाटील :- आषाढी वारीच्या पावन वातावरणात संत ज्ञानेश्वर महाराजांच्या पालखी सोहळ्यानिमित्त MAG Finserv Company Ltd. आणि MAG Multistate Co-operative Credit Society Ltd. यांच्या संयुक्त विद्यमाने वारकरी बांधवांसाठी भव्य अल्पोपहार वाटपाचा सेवाभावी उपक्रम राबविण्यात आला. या उपक्रमात सुमारे ५,००० वारकरी माऊलींना प्रेमपूर्वक व सन्मानाने अल्पोपहाराचे वाटप करण्यात आले.
पालखी सोहळ्यात हजारो वारकरी पायी प्रवास करत असताना त्यांना वेळेवर अल्पोपहार मिळावा आणि त्यांच्या प्रवासातील थकवा काही प्रमाणात दूर व्हावा, या उद्देशाने हा उपक्रम आयोजित करण्यात आला. सेवाभावाला सर्वोच्च स्थान देत कंपनी आणि संस्थेच्या पदाधिकारी, अधिकारी तसेच कर्मचाऱ्यांनी स्वतः उपस्थित राहून वारकऱ्यांना अल्पोपहाराचे वाटप केले. प्रत्येक वारकऱ्याचे हसतमुखाने स्वागत करत अत्यंत शिस्तबद्ध पद्धतीने ही सेवा पार पडली.
अल्पोपहार स्वीकारताना वारकरी बांधवांनी आयोजकांच्या या सेवाभावी वृत्तीचे कौतुक केले. “वारकऱ्यांची सेवा हीच विठ्ठलाची सेवा” या भावनेतून राबविण्यात आलेल्या या उपक्रमामुळे पालखी सोहळ्यातील भक्तिमय वातावरण अधिकच मंगलमय झाले.
यावेळी संस्थेच्या वतीने सांगण्यात आले की, संत ज्ञानेश्वर महाराजांच्या पालखी सोहळ्यात सेवा करण्याची संधी मिळणे हे मोठे भाग्य असून, सामाजिक बांधिलकी जपत अशा सेवाभावी उपक्रमांचे आयोजन भविष्यातही सातत्याने केले जाईल. समाजसेवा, मानवता आणि वारकरी परंपरेप्रती असलेली निष्ठा जपण्याचा संस्थेचा कायम प्रयत्न राहील, अशी भावना पदाधिकाऱ्यांनी व्यक्त केली.
या उपक्रमामुळे हजारो वारकऱ्यांना प्रवासादरम्यान दिलासा मिळाला. सेवाभाव, सामाजिक उत्तरदायित्व आणि वारकरी संप्रदायाविषयीची श्रद्धा यांचा सुंदर संगम या कार्यक्रमातून अनुभवायला मिळाला. उपस्थित वारकरी बांधवांनी आयोजकांचे मनःपूर्वक आभार मानत अशा उपक्रमांचे स्वागत केले.
