राष्ट्रवादीचे ज्येष्ठ कार्यकर्ते नंदकुमार मोरे यांच्या कुटुंबीयांची आ. शशिकांत शिंदे यांनी घेतली भेट; दुःखात सहभागी होत व्यक्त केला आधार
फलटण | प्रतिनिधी राष्ट्रवादी काँग्रेस पक्ष (शरद पवार गट) चे कट्टर समर्थक, ज्येष्ठ कार्यकर्ते आणि सामाजिक क्षेत्रात सक्रिय योगदान देणारे दिवंगत नंदकुमार संभाजी मोरे यांच्या निधनानंतर राष्ट्रवादी काँग्रेस पक्षाचे प्रदेशाध्यक्ष तथा आमदार शशिकांत शिंदे यांनी मोरे यांच्या फलटण येथील निवासस्थानी जाऊन कुटुंबीयांची भेट घेत त्यांचे सांत्वन केले.
यावेळी आ. शशिकांत शिंदे यांनी दिवंगत नंदकुमार मोरे यांच्या प्रतिमेस पुष्पहार अर्पण करून भावपूर्ण श्रद्धांजली वाहिली. त्यानंतर त्यांनी मोरे कुटुंबीयांशी संवाद साधत त्यांच्या दुःखात आपण सहभागी असल्याची भावना व्यक्त केली आणि या कठीण प्रसंगी धीर देण्याचा प्रयत्न केला.
यावेळी बोलताना आ. शशिकांत शिंदे म्हणाले की, दिवंगत नंदकुमार मोरे हे राष्ट्रवादी काँग्रेस पक्षाचे अत्यंत निष्ठावान, अभ्यासू आणि समर्पित कार्यकर्ते होते. पक्षाच्या प्रत्येक आंदोलनात, संघटनात्मक उपक्रमात आणि सामाजिक प्रश्नांवर ते कायम सक्रिय राहिले. त्यांच्या निधनामुळे पक्षाने एक प्रामाणिक, निष्ठावान आणि तळागाळातील कार्यकर्ता गमावला असून ही पक्षासाठी मोठी हानी आहे.
सामाजिक, सहकार, पर्यावरण आणि जनहिताच्या विविध विषयांवर सातत्याने आवाज उठवणारे नंदकुमार मोरे हे फलटण परिसरातील अनेकांसाठी प्रेरणादायी व्यक्तिमत्त्व होते. त्यांनी आयुष्यभर सामाजिक बांधिलकी जपत सर्वसामान्यांच्या प्रश्नांसाठी कार्य केले. त्यामुळे त्यांच्या निधनाबद्दल सर्व स्तरांतून हळहळ व्यक्त केली जात आहे.
आ. शशिकांत शिंदे यांनी मोरे कुटुंबीयांना भविष्यात कोणत्याही अडचणीच्या प्रसंगी पक्ष त्यांच्या पाठीशी ठामपणे उभा राहील, अशी ग्वाही दिली. तसेच दिवंगत मोरे यांच्या कार्याचा आदर्श पुढील पिढीने घ्यावा, असेही त्यांनी नमूद केले.
यावेळी राष्ट्रवादी काँग्रेस पक्षाचे पदाधिकारी, विविध आघाड्यांचे कार्यकर्ते, स्थानिक लोकप्रतिनिधी, सामाजिक कार्यकर्ते तसेच परिसरातील नागरिक मोठ्या संख्येने उपस्थित होते. उपस्थितांनी दिवंगत नंदकुमार मोरे यांच्या आठवणींना उजाळा देत त्यांना भावपूर्ण श्रद्धांजली अर्पण केली.
