दिवंगत नंदकुमार मोरे यांच्या कुटुंबीयांचे आमदार बापूसाहेब पठारे यांच्याकडून सांत्वन; ‘दुःखाच्या प्रसंगी आम्ही तुमच्या पाठीशी’
फलटण | प्रतिनिधी :- फलटण येथील ज्येष्ठ सामाजिक कार्यकर्ते व राष्ट्रवादी काँग्रेस पक्षाचे कट्टर समर्थक दिवंगत नंदकुमार संभाजी मोरे यांच्या निधनानंतर त्यांच्या कुटुंबीयांवर दुःखाचा डोंगर कोसळला आहे. या पार्श्वभूमीवर आमदार बापूसाहेब पठारे यांनी मोरे यांच्या निवासस्थानी जाऊन कुटुंबीयांची सांत्वनपर भेट घेत त्यांच्या दुःखात सहभागी होत धीर दिला.
यावेळी आमदार पठारे यांनी नंदकुमार मोरे यांच्या निधनाबद्दल तीव्र शोक व्यक्त केला. त्यांनी मोरे कुटुंबीयांचे सांत्वन करत, या कठीण प्रसंगी आपण आणि आपल्या कार्यकर्त्यांची साथ कुटुंबास कायम राहील, अशी भावना व्यक्त केली. दुःखाच्या या क्षणी धैर्याने उभे राहण्याचे आवाहन करत त्यांनी दिवंगत मोरे यांच्या सामाजिक कार्याची आठवणही करून दिली.
सांत्वन भेटीदरम्यान उपस्थित मान्यवरांनी दिवंगत नंदकुमार मोरे यांच्या व्यक्तिमत्त्वाचा गौरव करत त्यांच्या समाजाभिमुख कार्याला उजाळा दिला. त्यांनी विविध सामाजिक, सहकार आणि सार्वजनिक उपक्रमांमध्ये दिलेल्या योगदानाची आठवण काढत त्यांना भावपूर्ण श्रद्धांजली अर्पण केली.
शेवटी सर्व उपस्थितांनी दिवंगत नंदकुमार संभाजी मोरे यांच्या आत्म्यास चिरशांती लाभावी तसेच त्यांच्या कुटुंबीयांना हे दुःख सहन करण्याची शक्ती मिळावी, अशी ईश्वरचरणी प्रार्थना केली.
