कालकथित जगुबाई तात्याबा भोसले यांचे अस्थि संकलन व पुण्यानुमोदन विधी पर्यावरण रक्षणाचा संदेश देत संपन्न
दहिवडी : मौजे पाचवड येथील कालकथित जगुबाई तात्याबा भोसले यांचे दि. २५ मे २०२६ रोजी वृद्धापकाळाने निधन झाले. त्यांच्या अस्थि संकलन व पुण्यानुमोदन विधीचा कार्यक्रम आज बौद्ध धम्म संस्कार पद्धतीने संपन्न झाला. भारतीय बौद्ध महासभेचे केंद्रीय शिक्षक तथा बौद्धाचार्य आयु. चंद्रकांत मोहिते यांनी हा विधी संपन्न केला.
यावेळी त्यांनी कालकथित जगुबाई तात्याबा भोसले यांच्या अस्थी नदी किंवा पाण्यात प्रवाहित न करता जमिनीत विसर्जित करून त्या ठिकाणी वृक्षलागवड करण्याचा संकल्प केला. पर्यावरण संवर्धनाचा संदेश देणाऱ्या या कृतीचे उपस्थितांनी कौतुक केले. कोणत्याही प्रकारच्या अंधश्रद्धा, कर्मकांड किंवा अवैज्ञानिक प्रथांचे पालन न करता बौद्ध धम्मातील वैज्ञानिक व पर्यावरणपूरक विचारांचा जागर त्यांनी आपल्या कृतीतून केला.
यावेळी बौद्धाचार्य आयु. चंद्रकांत मोहिते यांनी कालकथित जगुबाई तात्याबा भोसले यांना विनम्र अभिवादन करत उपस्थितांना मार्गदर्शन केले. आज त्यागमूर्ती माता रमाई आंबेडकर यांचा स्मृतिदिन असल्याने त्यांनी माता रमाई यांच्या त्यागमय जीवनकार्यावर प्रकाश टाकला.
ते म्हणाले, “माता रमाई या खऱ्या अर्थाने त्यागमूर्ती होत्या. त्यांनी आयुष्यभर डॉ. बाबासाहेब आंबेडकरांना खंबीर साथ दिली. समाजाच्या उद्धारासाठी त्यांनी स्वतःच्या संसारातील दुःख सहन केले. स्वतः लाकडाच्या मोळ्या व गवऱ्या विकून बाबासाहेबांच्या शिक्षणासाठी हातभार लावला. त्यामुळे आपण सर्वांनी त्यांच्या त्यागाचा आदर्श घेतला पाहिजे.”
या प्रसंगी भोसले परिवारातील नातेवाईक, ग्रामस्थ, धम्मबंधू-भगिनी मोठ्या संख्येने उपस्थित होते.यावेळी विजय तात्याबा भोसले, दीपाली विजय भोसले, आरोही भोसले, काव्या भोसले, दिया भोसले, मनिषा बनसोडे, आशिष बनसोडे, ज्योती खरात, तुळशीराम रणदिवे, दिव्या रणदिवे व इतर उपस्थितांनी बुद्ध वंदना करून कालकथित जगुबाई तात्याबा भोसले यांना भावपूर्ण आदरांजली अर्पण केली.
