भीमोत्सवानिमित्त राजाळे येथे विज्ञान प्रदर्शनातून वैज्ञानिक दृष्टिकोनाचा जागर
फलटण : राजाळे येथे डॉ. बाबासाहेब आंबेडकर जयंती महोत्सव महिला समितीच्या वतीने विज्ञान प्रदर्शनाचे आयोजन मौजे राजाळे येथे करण्यात आले. महामानव डॉ. बाबासाहेब आंबेडकर यांच्या वैज्ञानिक, तर्कशुद्ध आणि विवेकनिष्ठ विचारांचा समाजामध्ये प्रसार व्हावा, तसेच अंधश्रद्धा, अनिष्ट रूढी आणि अवैज्ञानिक समजुतींना छेद देण्यासाठी या उपक्रमाचे आयोजन करण्यात आले होते.
भीमोत्सवासारख्या सामाजिक-सांस्कृतिक उत्सवाला वैज्ञानिक विचारांची जोड देत समाजप्रबोधनाचा संदेश देण्याचा स्तुत्य प्रयत्न यानिमित्ताने करण्यात आला. या विज्ञान प्रदर्शनात जिल्हा परिषद प्राथमिक शाळा, राजाळे येथील विद्यार्थ्यांनी विज्ञानावर आधारित विविध उपकरणे, मॉडेल्स आणि प्रयोग सादर केले. विद्यार्थ्यांनी दैनंदिन जीवनातील वैज्ञानिक तत्त्वे, ऊर्जा बचत, पर्यावरण संरक्षण, पाण्याचे व्यवस्थापन, शेतीतील आधुनिक तंत्रज्ञान, आरोग्यविषयक संकल्पना तसेच विविध वैज्ञानिक प्रक्रियांवर आधारित आकर्षक प्रात्यक्षिके मांडली. विद्यार्थ्यांच्या कल्पकतेतून साकारलेल्या या मॉडेल्समधून त्यांची वैज्ञानिक जिज्ञासा, निरीक्षणशक्ती आणि सर्जनशीलता स्पष्टपणे दिसून आली.
या प्रदर्शनात जि. प. केंद्र शाळा, राजाळे तसेच श्री जानाई हायस्कूल, राजाळे येथील विद्यार्थ्यांनी उत्स्फूर्त सहभाग नोंदविला. विद्यार्थ्यांनी मोठ्या उत्साहाने आपले प्रयोग सादर करत विज्ञान विषयाबद्दलची आवड आणि अभ्यासू वृत्ती प्रदर्शित केली. प्रदर्शन पाहण्यासाठी आलेल्या नागरिकांनीही विद्यार्थ्यांच्या सादरीकरणाचे कौतुक केले.
विज्ञान प्रदर्शनाचे परीक्षण काजल सावंत मॅडम आणि रेणुका निकोडे मॅडम यांनी केले. त्यांनी प्रत्येक विद्यार्थ्याच्या प्रयोगांचे बारकाईने निरीक्षण करून त्यामागील वैज्ञानिक तत्त्वे, सादरीकरणाची पद्धत, कल्पकता आणि उपयुक्तता यांचे मूल्यमापन केले. विद्यार्थ्यांना प्रोत्साहनपर मार्गदर्शन करत त्यांच्या प्रयत्नांचे कौतुकही केले.
डॉ. बाबासाहेब आंबेडकर यांनी शिक्षण, विज्ञाननिष्ठा, तर्कबुद्धी आणि समतावादी विचारांचा पुरस्कार केला. त्यांच्याच प्रेरणेने आयोजित करण्यात आलेल्या या विज्ञान प्रदर्शनामुळे विद्यार्थ्यांमध्ये वैज्ञानिक दृष्टिकोन विकसित होण्यास मदत झाली. तसेच समाजात विवेक, विज्ञाननिष्ठा आणि प्रबोधनाची भावना रुजविण्यासाठी हा उपक्रम अत्यंत उपयुक्त ठरला.
भीमोत्सवाच्या निमित्ताने आयोजित या विज्ञान प्रदर्शनाने केवळ विद्यार्थ्यांच्या कलागुणांना वाव दिला नाही, तर डॉ. बाबासाहेब आंबेडकर यांच्या वैज्ञानिक विचारांचा जागर घडवून समाजाला प्रगल्भ आणि विवेकनिष्ठ दिशादर्शन करण्याचे महत्त्वपूर्ण कार्य केले.
यावेळी डॉ.बाबासाहेब आंबेडकर जयंती महोत्सव महिला समितीच्या सर्व पदाधिकारी, सदस्य, ग्रामस्थ विद्यार्थ्यांनी या विज्ञान प्रदर्शनाचा आनंद घेतला.
