सातारा: उंटाच्या डोंगर परिसरात जखमी बिबट्याला नैसर्गिक अधिवासात सोडण्याच्या मोहिमेदरम्यान बिबट्याने पथकावर हल्ला केला. या हल्ल्यात साताऱ्याचे वनक्षेत्रपाल डॉ. निवृत्ती चव्हाण यांच्यासह अन्य चार कर्मचारी जखमी झाले आहेत. सर्व जखमींवर साताऱ्यातील खाजगी रुग्णालयात उपचार सुरू आहेत.
वनविभागाला जखमी बिबट्याची माहिती मिळाल्यानंतर पथकाने घटनास्थळी धाव घेतली. मात्र, प्रशिक्षित कर्मचाऱ्यांची कमतरता असल्याने बिबट्याला पकडण्याच्या मोहिमेत अडथळे आले. वनविभागाने जाळी टाकल्यानंतरही बिबट्या जाळ्यात अडकला नाही. चवताळलेल्या बिबट्याने डॉ. चव्हाण यांच्यावर हल्ला करत गंभीर जखमा केल्या. या झटापटीत सुहास काकडे, महेश अडागळे, सचिन कांबळे आणि मयूर अडागळे हे वनरक्षकही जखमी झाले आहेत.
हल्ल्यानंतर बिबट्याला जेरबंद करण्यासाठी सातारा वनपरिक्षेत्र अधिकारी, रेस्क्यू टीम आणि स्थानिक युवकांनी प्रयत्न केले. ओमकार ढाले, मयूर तिखे, ओंकार अडागळे, हर्षल मदने, अनिकेत जंगम, आणि शुभम औंधकर यांनी एकत्रित प्रयत्न करून बिबट्याला पकडले. त्यानंतर जखमी बिबट्याला अधिक उपचारासाठी पुण्यात पाठवण्यात आले.
