HDFC SBI FD rate: घरातील मोठी मंडळी आजही आपले पैसे फिक्स्ड डिपॉझिटमध्ये ठेवतात. बॅंकेत पैसे सुरक्षित राहतात. तसेच गरजेच्या वेळी एफडी मोडता येते. त्यामुळे जुन्या ग्राहकांचा कल एफडी गुंतवणूकीकडे असतो. पण एफडीवरील व्याजदर खूप कमी असतो. बहुतांश बॅंका 6 टक्क्यांच्या आतच एफडीवर व्याज देतात. त्यामुळे पैसे वाढवू इच्छित असलेले तरुण ग्राहक एफडी गुंतवणूकीऐवजी एसआयपी, म्युच्यूअल फंड गुंतणुकीकडे वळलेला दिसतोय. पण आता एफडी गुंतवणूक करणाऱ्यांसाठी आनंदाची बातमी आहे. 

तुम्हीदेखील मुदत ठेवींमध्ये (FD) गुंतवणूक करत असाल तर तुमच्यासाठी ही महत्वाची अपडेट आहे. देशातील सर्वात मोठ्या 2 बँकांनी ग्राहकांना एफडीवरील व्याज वाढवण्याची घोषणा केली आहे. भविष्यात आणखी काही बॅंक यासाठी पुढाकार घेण्याची शक्यता आहे. कोणत्या आहेत या बॅंका? यामुळे कोणत्या ग्राहकांना होणार फायदा? याबद्दल सविस्तर जाणून घेऊया. 

SBI आणि सर्वात मोठी खासगी बँक एचडीएफसीने काही ठेवीदारांना गुड न्यूज दिली आहे. एसबीआयने 80 वर्षांवरील ज्येष्ठ नागरिकांची नवीन कॅटेगरी सुरू केली आहे. या कॅटेगरीतील ठेवीदारांना ज्येष्ठ नागरिकांपेक्षा 10 बेसिस पॉइंट अधिक व्याज मिळणार आहे. एचडीएफसी बँकेने बल्क डिपॉझिट्सवरील परताव्यात 5 ते 10 बेस पॉइंट्सने सुधारणा केली आहे.

ग्राहकांना एफडी गुंतवणूकीवर चांगले रिटर्न्स मिळवून देण्यासाठी एसबीआयनेदेखील आपली नवीन स्किम अपडेट केली आहे. यामाध्यमातून 80 वर्षे आणि त्याहून अधिक वयाच्या लोकांना त्यांच्या एफडीवर जास्त व्याज दिले जाणार आहे. यासाठी एसबीआय बँकेने त्यांच्या योजनेची पुनर्रचना देखील केली आहे. एवढेच नव्हे तर ग्राहक त्यांच्या बचतीचे उद्दिष्ट ठरवू शकतात आणि त्यानुसार आवर्ती ठेवींसाठी साइन अप करू शकतात. 

डिसेंबरच्या मध्यापर्यंत बँक ठेवी आणि बँक कर्ज 11.5% च्या समान गतीने वाढत असल्याचे आरबीआयच्या आकडेवारीवरून असे दिसून आले आहे. विकासाला चालना देण्यासाठी धोरणात्मक दरात कपात करण्याची मागणी आरबीआयकडे केली जात आहे. या पार्श्वभूमीवर बँकेच्या व्याजदरात सुधारणा करण्यात आली आहे.  

इतर बँकाही व्याज वाढवणार?

एसबीआय आणि एचडीएफसी बँकेचे व्याजदर वाढवल्यानंतर इतर बँकाही आपल्या एफडी व्याजदरात वाढ करण्याची शक्यता आहे.एचडीएफसी बँकेने इतर बँकांच्या बरोबरीने व्याजदरात बदल केल्याची माहिती सूत्रांनी दिली आहे. डिसेंबर 2024 मध्ये संपलेल्या तिमाहीसाठी व्यवसाय डेटा जाहीर करणारी पहिली मोठी बँक ही बँक ऑफ बडोदा आहे. त्याचे ग्लोबल ॲडव्हान्सेस 11.7% आणि ग्लोबल डिपॉझिट्स 11.8% ने वाढले आहेत.