फलटण : प्रगत शिक्षण संस्थेने केंद्र सरकारच्या निपुण भारत अंतर्गत लातूर जिल्ह्याच्या औसा तालुक्यातील 205 व सातारा जिल्ह्यातील माण तालुक्यात 50 अंगणवाड्यांसोबत बालशिक्षणात उत्कृष्ट काम केले असून त्यांनी केलेल्या कामामुळे माण तालुक्यातील अंगणवाडीमध्ये अमुलाग्र बदल झाला असून बालशाळेची वर्गरचना ते बाल शिक्षणातील सेविका व मदतनीस यांची समज वाढली असून त्याचे परिणाम म्हणून अंगणवाडीमध्ये गुणवत्ता पूर्ण बालशिक्षण दिले जात आहे. म्हणून प्रगत शिक्षण संस्थेचे माण तालुक्यातील अंगणवाड्यांसोबतचे काम दिशादर्शक असल्याचे प्रतिपादन टाटा एज्यूकेशन विभाग महाराष्ट्राच्या प्रमुख मालविका झा यांनी केले आहे.त्या माण तालुक्यातील राजवडी गावातील राजवडी अंगणवाडी क्र. 142 व उमाजीनगर अंगणवाडी(राजवडी)च्या भेटी दरम्यान बोलत होत्या.
नुकतेच टाटा एज्यूकेशन विभाग महाराष्ट्र च्या प्रमुख मालविका झा, टाटा ट्रस्ट्सची एक सहयोगी संस्था असणारी कलिके संस्थेच्या प्रतिनिधीनी माण तालुक्यातील या दोन अंगणवाड्यांना भेटी दिल्या. कलिके समृद्धी उपक्रम (Learning Enhancement Initiative) राबविण्यासाठी नोडल एजन्सी म्हणून कार्य करते. कलिके कर्नाटकातील यादगीर या जिल्ह्यात कार्यरत आहे,जो सर्व विकास निर्देशांकांनुसार राज्यातील सर्वात मागास जिल्ह्यांपैकी एक आहे.
या भेटीत राजवडी गावातील उमाजीनगर अंगणवाडीच्या सेविका निलम दिपक जगदाळे व राजवडी अंगणवाडी क्र. 142 पल्लवी सुभाष यादव व अंगणवाडी मदतनीस जयश्री आकाराम भोसले यांच्याशी संवाद साधून चर्चा केली. या चर्चेदरम्यान कलिके टीम व श्रीम. मालविका झा यांनी अनेक गोष्टीबाबत माहिती घेतली.हे मुक्त खेळाचे कोपरे तुम्ही रोज मांडता का? कोपऱ्यावरील खेळ किती दिवसांनी बदलता? 5 ते 6 वयोगटातील विद्यार्थ्यांना तुम्ही अक्षरे शिकवता त्यावेळी इतर वयोगटातील मुले काय करतात? यावर सेविका ताई म्हणाल्या, प्रत्येक वयोगटातील मुलासोबत आम्ही नियोजन स्वतंत्र करतो. 3 ते 4 वयोगटातील मुले मुक्त खेळाच्या कोपऱ्यावर खेळतात. गोष्टीच्या पुस्तकाचा वापर कसा करता? पुस्तके कधी बदलता? मुलांना वेगवेगळी गाणी घेता की भिंतीवर लावलेलीच घेता. तर सेविका ताई म्हणाल्या, “आम्ही दर महिन्याला नवीन गाणे घेतो. वर्षेभर ही गाणी वापरतो. अक्षर दृढीकरण खेळ, वर्क शीट याही विषयी चर्चा केली.मुलांना आनंद व मनोरंजन अभिनय गीत घेतो. असे सांगण्यात आले.अंगणवाडीत घेण्यात येणारे उपक्रम, सेविका व मदतनीस यांना प्रशिक्षणे, ऍक्टिव्हिटी किट, इतर साहित्य, प्रकल्प सहाय्यक व प्रकल्प अधिकारी भेटी, प्रगत शिक्षण संस्थेचा बालशिक्षण कार्यक्रम व त्यांचा प्रत्यक्ष वापर यावर या भेटीदरम्यान मार्गदर्शन करताना प्रकल्प समन्वयक तथा संस्थेचे कार्यकारी अधिकारी प्रकाश अनभुले यांनी माहिती दिली.यावेळी प्रकल्प सहाय्यक नम्रता भोसले याही पूर्णवेळ उपस्थित होत्या.
यावेळी टाटा शिक्षण विभाग महाराष्ट्राच्या प्रमुख मालविका झा,कलिके संस्थेतून जिल्हा व्यवस्थापक अशोक के, माल्लामा बी,तारासिंग जे,वरिष्ठ समन्वयक गिरीश आर, तालुका समन्वयक शांताम्मा, मुद्देश, बालक शिक्षण कार्यक्रम अधिकारी कोटरेश वाय,बाल विकास विभाग प्रमुख चिटकालांबा एन, प्रगतीची उपस्थिती प्रकल्प समन्वयक तथा कार्यकारी अधिकारी प्रकाश अनभुले, प्रकल्प सहाय्यक नम्रता भोसले, उमाजीनगर अंगणवाडीच्या सेविका निलम दिपक जगदाळे व राजवडी अंगणवाडी क्र. 142 पल्लवी सुभाष यादव व अंगणवाडी मदतनीस जयश्री आकाराम भोसले उपस्थित होत्या.ही अंगणवाडी भेट यशस्वी होण्यासाठी प्रकल्प अधिकारी राहुल मुळीक यांनी विशेष प्रयत्न केले. त्यांनी वेळोवेळी अंगणवाडी सेविका व मदतनीस यांना मार्गदर्शन केले.