Health Benefits Of Kissing: वेलेंटाइन वीकमधील रोज डे, प्रपोज डे, चॉकलेट डे, टेडी डे आणि हग डे नंतर आता शुक्रवारी (13 फेब्रुवारी 2026 रोजी) किस डे आहे. वेलेंटाइन वीकमधील हग डे आणि किस डे हे फक्त प्रेमाचे दिवस म्हणून नाही तर या दिवसांचे काही आरोग्यदायी फायदेही आहेत. हे ऐकून तुम्हाला आश्चर्य वाटले असेल, पण हे खरे आहे आवडत्या व्यक्तीला मिठी मारण्याचा आणि चुंबन घेण्याचा थेट संबंध तुमच्या मानसिक आणि शारीरिक आरोग्याशी असतो. असे अनेक अभ्यासातून स्पष्ट करण्यात आले आहे. चला तर मग जाणून घेऊया हे फायदे काय आहेत?

Add Zee News as a Preferred Source

आवडत्या व्यक्तीला Kiss केल्याने मिळणारे मानसिक फायदे कोणते? 

1. शरीरात हॅपी हार्मोनचे प्रमाण वाढते: आवडत्या व्यक्तीचे चुंबन घेतल्यास मेंदूमध्ये ऑक्सिटोसिन, डोपामाइन आणि सेरोटोनिन हे हार्मोन निर्माण होतात. जे मन प्रसन्न आणि आनंदी ठेवण्यास मदत करतात. 

2. ताण-तणाव कमी होतो: शरीरातील तणावाला कारणीभूत असणाऱ्या कोर्टिसोल या हार्मोनची पातळी कमी होण्यास होते. ज्यामुळे मानसिक थकवा कमी होऊन मनाला शांतता मिळते. 

3. सकारात्मक दृष्टिकोन वाढतो: सकाळी कामासाठी घरातून बाहेर निघताना तुमच्या जोडीदाराचे चुंबन घेतल्यास मन आनंदी होते. ज्यामुळे कामाच्या ठिकाणी ताण कमी जाणवतो, अधिक उत्साही आणि  सकारात्मक वाटते. 

आवडत्या व्यक्तीला kiss केल्यास शारीरिक आरोग्यास कोणते फायदे मिळतात? 

1. रक्तदाब नियंत्रणात राहतो: आवडत्या व्यक्तीचे चुंबन घेतल्यास हृदयाचे ठोके काही प्रमाणात वाढतात, ज्यामुळे रक्तवाहिन्या विस्तारतात. यामुळे रक्ताभिसरण सुधारते आणि उच्च रक्तदाब नियंत्रणात राहतो. तसेच डोकेदुखी किंवा मासिक पाळीदरम्यान होणारा त्रास कमी होतो. 

2. रोगप्रतिकारशक्ती वाढते: जेव्हा तुम्ही तुमच्या जोडीदाराचे चुंबन घेता तेव्हा लाळेची देवाणघेवाण होते. शरीराला नव्या जंतूंची ओळख झाल्यामुळे त्यांच्याशी लढण्यासाठी शरीर अँटीबॉडीज निर्माण करते. जे प्रतिकारशक्ती वाढवण्यास मदत करते. 

3. कॅलरीज बर्न होतात, चेहऱ्याचा व्यायाम होतो:  चुंबनामुळे एका मिनिटात अंदाजे 2 ते 26 कॅलरीज बर्न होतात. जे आरोग्यासाठी फायदेशीर मानले जाते. तसेच चुंबन घेताना चेहऱ्याचे अनेक स्नायू सक्रिय होतात. एकप्रकारे चेहऱ्याचा व्यायम होतो. ज्यामुळे त्वचा घट्ट राहते आणि सुरकुत्याही कमी होतात. 

(Disclaimer: वरील माहिती सामान्य संदर्भांवरून घेण्यात आली आहे. ‘झी २४ तास’ याची खातरजमा करत नाही. यामधून कोणत्याही प्रकारच्या उपचाराचा दावा केला गेलेला नाही. कुठलीही लक्षणं जाणवल्यास डॉक्टरांचा सल्ला घ्या.)

वंध्यत्वाचा परिणाम पुरुषांवर महिलांइतकाच होतो, परंतु असे आढळून आले आहे की पुरुष स्वतः त्याशी झुंजत नाही तोपर्यंत ते याबद्दल विचार करत नाहीत. खरं तर, काही घटक पुरुष वंध्यत्वाच्या जलद वाढीस कारणीभूत आहेत, ज्यात मद्यपान, धूम्रपान, खराब मानसिक आरोग्य आणि कामाच्या ठिकाणी हानिकारक रसायनांचा संपर्क यांचा समावेश आहे. डॉ. (प्राध्यापक), प्रसूती आणि स्त्रीरोगतज्ज्ञ, शारदाकेअर-हेल्थसिटीचे वरिष्ठ सल्लागार यांच्या मते, असे मानले जाते की वयाचा पुरुषांच्या प्रजनन क्षमतेवर कोणताही महत्त्वपूर्ण परिणाम होत नाही आणि पुरुष नंतरच्या आयुष्यात कोणत्याही जैविक समस्यांशिवाय वडील होऊ शकतात. परंतु आता वैज्ञानिक संशोधनातून असे दिसून येत आहे की पुरुषांचे वाढणारे वय त्यांच्या प्रजनन क्षमतेवर, गर्भधारणेच्या प्रक्रियेवर आणि त्यांच्या मुलांच्या दीर्घकालीन आरोग्यावर देखील परिणाम करू शकते.

Add Zee News as a Preferred Source

पुरुषांच्या वंध्यत्वावर वयाचा परिणाम

३० किंवा ३५ वर्षांच्या वयानंतर महिलांची प्रजनन क्षमता कमी होते, कारण त्यांच्या शरीरात मर्यादित संख्येत अंडी असतात आणि या वयापर्यंत, त्यांची संख्या आधीच संपलेली असते. दुसरीकडे, पुरुष आयुष्यभर शुक्राणू तयार करत राहतात आणि शुक्राणूंची संख्या मर्यादित नसते. तथापि, याचा अर्थ असा नाही की ते नेहमीच प्रजननक्षम राहतील. कारण शुक्राणूंची निर्मिती होत राहील, परंतु वयानुसार त्यांची गुणवत्ता कमी होत जाईल. विशेषतः ४० वर्षांच्या वयानंतर, शुक्राणूंची संख्या, गतिशीलता आणि आकार हळूहळू कमकुवत होतो. यामुळे नैसर्गिक गर्भधारणा विलंबित होऊ शकते आणि गुंतागुंत होण्याचा धोका वाढू शकतो.

शुक्राणूंच्या डीएनएवर वयाचा परिणाम

पुरुषाचे वय वाढत असताना, केवळ त्याच्या शुक्राणूंची संख्या कमकुवत होत नाही तर त्याचा त्याच्या शुक्राणूंच्या डीएनएवरही परिणाम होतो. वृद्धत्वामुळे शुक्राणूंमध्ये डीएनए नुकसान आणि अनुवांशिक उत्परिवर्तन होण्याची शक्यता वाढते. हे वारंवार पेशी विभाजन, वाढलेले ऑक्सिडेटिव्ह ताण आणि शरीराची दुरुस्ती क्षमता कमी झाल्यामुळे होते. अशा शुक्राणूंमुळे गर्भाधान होण्याची शक्यता कमी होऊ शकते, गर्भाच्या विकासात अडथळा येऊ शकतो आणि गर्भपाताचा धोका वाढू शकतो, अगदी आयव्हीएफ सारख्या तंत्रांचा वापर करूनही.

मुलांवर परिणाम

बहुतेक लोक याचा विचार करत नसले तरी, संशोधनात असे आढळून आले आहे की जर एखाद्या पुरूषाने मोठ्या वयात वडील होण्याचा प्रयत्न केला तर त्याच्या मुलांना अनेक आजारांचा धोका वाढू शकतो. संशोधनात असे आढळून आले आहे की या स्थितीमुळे मुलांमध्ये ऑटिझम आणि स्किझोफ्रेनिया सारख्या न्यूरोडेव्हलपमेंटल डिसऑर्डरचा धोका किंचित वाढू शकतो. याव्यतिरिक्त, काही जन्मजात आजार आणि बालपणातील कर्करोगाचा धोका वाढल्याचे पुरावे देखील आहेत, जरी अशा प्रकरणांची एकूण घटना कमी आहे. बहुतेक मुले पूर्णपणे निरोगी जन्माला येतात.

जीवनशैली आणि आरोग्य महत्त्वाची भूमिका बजावतात

वय हा एकमेव घटक नाही जो पुरुषांच्या प्रजनन क्षमतेवर परिणाम करतो; त्यांचे आरोग्य आणि जीवनशैली देखील महत्त्वपूर्ण भूमिका बजावते. जर एखाद्या पुरूषाला मधुमेह, हृदयरोग, हार्मोनल समस्या, लैंगिक आरोग्य समस्या किंवा लठ्ठपणा असेल तर ते त्याच्या शुक्राणूंची गुणवत्ता कमकुवत करू शकते.

हल्ली अनेक महिलांना असे वाटू लागले आहे की नको असलेली गर्भधारणा थांबवण्यासाठी ओटीसी गोळ्या घेणे हा एक सोपा, सुरक्षित असा वैयक्तिक मार्ग आहे. ऑनलाइन सहज उपलब्धत, सोशल मीडियावरील अपुरी माहिती आणि सामाजाच्या भीतीमुळे अनेक महिला डॉक्टरांचा सल्ला न घेता स्वमर्जीने औषधं घेतात. मात्र, हे भविष्यातील गर्भधारणेसाठी धोकादायक ठरू शकते.

Add Zee News as a Preferred Source

गर्भपाताच्या गोळ्या हे सर्दी- खोकल्याच्या औषधाप्रमाणे सामान्य नाहीत. त्या घेण्याआधी योग्य वैद्यकीय तपासणी, गर्भधारणेचा अचूक कालावधी आणि योग्य डोस घेणे गरजेचे आहे. डॉक्टरांच्या देखरेखीशिवाय किंवा चुकीच्या पद्धतीने गोळ्या घेतल्यास या गोळ्या अपेक्षेप्रमाणे काम करत नाहीत. अनेक वेळा अपूर्ण गर्भपात होतो, म्हणजेच गर्भाचे काही अवशेष गर्भाशयातच राहतात. यामुळे तीव्र रक्तस्राव, वेदना आणि संसर्ग होऊ शकतो आणि वेळीच उपचार न केल्यास जीवघेण्या गुंतागुंती निर्माण होऊ शकतात.

अनेक महिला दीर्घकाळ होणारा रक्तस्राव आणि वेदना “सामान्य” समजून दुर्लक्ष करतात आणि डॉक्टरांकडे जाण्यास टाळाटाळ करतात किंवा विलंबाने जातात. त्यामुळे अनेक रुग्ण गंभीर अ‍ॅनिमिया, संसर्ग किंवा अंतर्गत गुंतागुंतींसह रुग्णालयात दाखल होतात, जे योग्य वेळी उपचार घेऊन टाळता आले असते.

गर्भपाताच्या गोळ्यांचा शरीरावर होणारा परिणाम

अनेक महिला विचार न करता गर्भपाताच्या गोळ्या घेतात. डॉक्टरांच्या देखरेखीशिवाय या गोळ्यांचा वापर केल्यास हार्मोन संतुलन बिघडू शकते आणि त्यानंतर ३ ते ४ महिने मासिक पाळी अनियमित राहू शकते. गर्भपाताच्या गोळ्या नेहमी डॉक्टरांच्या सल्ल्यानुसारच घ्याव्यात. जास्त रक्तस्रावामुळे अशक्तपणा येऊ शकतो, थकवा, चक्कर येणे अशी लक्षणे दिसू शकतात आणि त्यासाठी तातडीने उपचारांची गरज भासू शकते.

गर्भाशयात गर्भाचे अवशेष राहिल्यामुळे होणारा संसर्ग पुढे गर्भाशय आणि आसपासच्या अवयवांपर्यंत पसरू शकतो. अशा परिस्थितीत शस्त्रक्रिया किंवा दीर्घकालीन उपचारांची गरज भासू शकते, ज्यामुळे महिलांवर शारीरिक आणि मानसिक ताण येतो. तज्ज्ञांच्या मार्गदर्शनाशिवाय या संपूर्ण प्रक्रियेतून जाताना अनेक महिलांना ताण, अपराधीपणा आणि नैराश्याचा सामना करावा लागतो.

भविष्यातील गर्भधारणेवर होतो परिणाम

वारंवार किंवा चुकीच्या पद्धतीने केलेल्या गर्भपातामुळे गर्भाशयाच्या आतील आवरणाला इजा होऊ शकते. यामुळे वंध्यत्व, वारंवार गर्भपात होणे किंवा भविष्यातील गर्भधारणेत गुंतागुंत निर्माण होण्याचा धोका वाढतो. संसर्गामुळे गर्भाशय किंवा फॅलोपियन ट्युबमध्ये जखमा निर्माण होऊ शकतात, ज्यामुळे भविष्यातील गर्भधारणेत अडचणी येतात. काही महिलांमध्ये गर्भाशयाबाहेरील गर्भधारणेचा (एक्टॉपिक प्रेग्नन्सी) धोका वाढतो, जी अत्यंत गंभीर आणि आपत्कालीन वैद्यकीय स्थिती आहे.

डॉक्टरांच्या देखरेखीखाली केलेला सुरक्षित गर्भपात आरोग्यासाठी धोकादायक ठरत नाही. गर्भपात पूर्ण झाला आहे का आणि शरीर नीट सावरत आहे का हे तपासण्यासाठी डॉक्टरांकडे फॉलोअप करणे अत्यंत महत्त्वाचे आहे. डॉक्टरांचा सल्ला न घेता ओटीसी गोळ्यांचा वापर करून गर्भपात करणे सोयीचे वाटू शकते, पण ते  योग्य नाही. योग्य वेळी तज्ज्ञांचा सल्ला घेतल्यास महिलांचे आरोग्य सुरक्षित राहते आणि भविष्यातील प्रजनन आरोग्य सुरक्षित व निरोगी राखता येते.

जेव्हा मेंदूच्या एखाद्या भागाला होणारा रक्तपुरवठा अचानक थांबतो किंवा मेंदूतील रक्तवाहिनी फुटते, तेव्हा स्ट्रोक येतो. उच्च रक्तदाब, मधुमेह, हृदयरोग, उच्च कोलेस्ट्रॉल, धूम्रपान आणि जीवनशैलीसंबंधी चुकीच्या सवयी ही त्यामागची सामान्य कारणं आहेत. स्ट्रोकची लक्षणे अचानक दिसून येतात.  त्यात शरीराच्या एका बाजूला अशक्तपणा, बोलताना अडखळणे, चेहऱ्याची एक बाजू लुळी पडणे, शारीरक संतुलन गमावणे, अंधुक दृष्टी किंवा तीव्र डोकेदुखी यांचा समावेश असू शकतो. अशी लक्षणे वेळीच ओळखणे गरजेचे आहे. स्ट्रोक ही एक वैद्यकीय आपत्कालीन स्थिती आहे आणि त्वरित उपचारांमुळे पुर्ववत आयुष्य जगता येऊ शकते.

Add Zee News as a Preferred Source

स्ट्रोकसाठी धोक्याचे घटक

* रक्तदाबात वाढ : बऱ्याचदा थंड हवामानामुळे रक्तवाहिन्या आकुंचन पावतात, रक्तदाब वाढतो आणि स्ट्रोकची शक्यता वाढते.

* निर्जलीकरणामुळे , पाणी कमी प्यायल्याने रक्त घट्ट होते आणि रक्ताच्या गुठळ्या होण्याचा धोका वाढतो.

* शारीरिक हालचालींचा अभाव : कमी हालचालींमुळे रक्ताभिसरण आणि हृदयाच्या आरोग्यावर परिणाम होतो आणि त्यामुळे स्ट्रोकची शक्यता असते.

* चरबीयुक्त आहार : तेलकट आणि गोड पदार्थांमुळे कोलेस्ट्रॉलची पातळी वाढते आणि स्ट्रोक येऊ शकतो.

* हृदयाच्या समस्या : हृदयावर अतिरिक्त ताण येणे विशेषतः हृदयरुग्णांमध्ये ही समस्या आढळून येते ज्यामुळे स्ट्रोक येऊ शकतो.

* अति मद्यपान : अल्कोहोलमुळे हृदयाची लय आणि रक्तदाब बिघडतो आणि स्ट्रोक येऊ शकतो.

* धूम्रपानाची सवय : धूम्रपानामुळे रक्तवाहिन्यांचे नुकसान होते आणि गुठळ्या होण्याचा व स्ट्रोकचा धोका वाढतो.

* वैद्यकीय उपचारांना विलंब : शारीरीक संतुलन गमावणे, बोलण्यात अडचण, चेहरा लुळा पडणे आणि हातामध्ये अशक्तपणा यांसारख्या लक्षणांकडे दुर्लक्ष करणे धोकादायक ठरू शकते. स्ट्रोकला वेळीच उपचारांची आवश्यकता असते.

स्ट्रोकच्या वेळी प्रत्येक मिनिट महत्त्वाचा असतो, कारण उपचारांना विलंब झाल्यास मेंदूला कायमचे नुकसान होऊ शकते किंवा मृत्यू देखील ओढावू शकतो. टिपीए इंजेक्शन आणि मेकॅनिकल थ्रोम्बेक्टॉमीसारख्या उपचारांमुळे जगण्याची आणि रुग्ण बरा होण्याची शक्यता वाढते. सुरुवातीची लक्षणे ओळखणे आणि विलंब न करता रुग्णालयात उपचारांसाठी  धाव घेणे गरजेचे आहे. हे एकाद्याचा अमूल्य जीव आणि मेंदूचे कार्य वाचवण्यासाठी एक महत्त्वाचे पाऊल ठरते. वेळीच केलेली कृती आणि वेळेवर मिळणारी वैद्यकीय सेवा हे स्ट्रोकपासून बचावासाठी सर्वात प्रभावी मार्ग आहे.

Snoring can Lead To Heart Attack: अनेकांना रात्री झोपताना घोरण्याची सवय असते. या सवयीमुळे इतरांच्या झोपेत तर अडथळा येतोच, अनेकदा या घोरण्याकडे ‘हे साधारण आहे’ किंवा ‘वयानुसार असे होतच राहते’ असे म्हणून दुर्लक्ष केले जाते. पण तुम्हाला माहित आहे का की, तुमच्या घोरण्याच्या समस्येचा थेट संबंध हृदयाच्या आरोग्याशी असू शकतो. संशोधनानुसार, जे लोक झोपेत मोठ्याने घोरतात; त्यांना हृदयविकाराचा झटका येण्याची शक्यता वाढतो. तुमच्या घोरण्याचा शारीरिक आरोग्यावर कसा परिणाम होतो? यावर उपाय काय आहेत? जाणून घेऊया. 

Add Zee News as a Preferred Source

झोपेत घोरण्याची मुख्य कारणे कोणती? 

1. श्वसनसंस्थेच्या समस्या: सर्दी किंवा अॅलर्जीमुळे नाक चोंदलेले असेल तर, श्वास घेण्यास त्रास होतो. यामुळे घोरण्याच्या समस्या उद्भवू शकते. तसेच घशात टॉन्सिल्स वाढल्यामुळे श्वसननलिकेचा मार्ग लहान झाल्यामुळे किंवा नाकाचे हाड वाकडे असल्यास एका नाकपुडीतून श्वास घेण्यास त्रास होतो. यामुळेही घोरण्याची समस्या होऊ शकते. 

2. वाढलेले वजन: ज्यांचे वजन अधिक असते, त्यांच्या मानेभोवती चरबीचे प्रमाण अधिक असते. या चरबीमुळे झोपताना श्वसननलिकेवर दबाव निर्माण होतो. ज्यामुळे श्वसनप्रक्रियेत अडथळा येतो. 

3. झोपण्याची चुकीची पद्धत: जेव्हा तुम्ही पाठीवर झोपता तेव्हा, गुरुत्वाकर्षणामुळे जीभ घशाच्या मागील बाजून झुकली जाते. यामुळे श्वास घेताना अडथळा निर्माण होऊन घोरण्यचा आवाज येतो. 

4. धूम्रपान किंवा थकवा: झोपण्यापूर्वी धूम्रपान केल्याने सिगारेटमुळे श्वसननलिकेला सूज आल्यामुळे श्वास घेण्यास त्रास होतो. तसेच खूप जास्त थकवा असल्यास शरीर गाढ झोपेत असल्यामुळे स्नायू जास्त सैल पडतात आणि घोरण्याचा त्रास होतो. 

5. स्लीप अॅप्निया: ही झोपेची एक गंभीर वैद्यकीय समस्या आहे. या स्थितीत झोपेत काही सेकंदांसाठी श्वास पूर्णपणे थांबतो. या समस्येकडे दुर्लक्ष केल्यास हृदयाच्या आरोग्यावर परिणाम होऊ शकतो. 

सततच्या घोरण्यामुळे आरोग्याच्या कोणत्या समस्या जाणवतात? 

सतत घोरण्यामुळे रात्री झोपेत रक्तदाब वाढतो, जे हृदयासाठी घातक ठरते. तसेच जर तुम्ही दीर्घकाळापासून या समस्येला सामोरे जात असाल तर, हृदयाच्या स्नायूंवर ताण येऊन हृदयाचा आकार वाढू शकतो. घोरण्यामुळे हृदयाचे ठोके अनियमितही होऊ शकतात. याशिवाय इतरही धोके उद्भवतात जसे की, दिवसभर थकवा जाणवणे आणि सतत डुलकी येणे, एकाग्रतेची क्षमता कमी होणे आणि चिडचिड वाढणे, मधुमेहाचा धोका वाढण्याची शक्यता. 

घोरणे कमी करण्यासाठी सोपे उपाय: 

पाठीवर झोपण्याऐवजी डाव्या किंवा उजव्या कुशीवर झोपण्याची सवय करा. निरोगी पचनसंस्था आणि हृदयाच्या आरोग्यासाठी डाव्या कुशीवर झोपणे अधिक फायदेशीर ठरते. मानेभोवती अतिरिक्त चरबी असेल तर, वजन कमी करण्यासाठी नियमित व्यायाम करा. झोपताना डोक्याखाली उंच थोडी उंच उशी घ्या. तसेच महत्त्वाचे म्हणजे, स्लीप अॅप्निया सारख्या समस्येची लक्षणे दिसल्यास त्वरीत डॉक्टरांना संपर्क करा. 

(Disclaimer: वरील माहिती सामान्य संदर्भांवरून घेण्यात आली आहे. ‘झी २४ तास’ याची खातरजमा करत नाही. यामधून कोणत्याही प्रकारच्या उपचाराचा दावा केला गेलेला नाही. कुठलीही लक्षणं जाणवल्यास डॉक्टरांचा सल्ला घ्या.)