बारामती: बारामती नगरपरिषदेतील नगररचनाकार विकास किसनराव ढेकळे (वय ५०) यांना लाच घेताना रंगेहात पकडण्यात आले आहे. लाचलुचपत प्रतिबंधक विभागाने ही कारवाई केली असून, त्यांच्याविरुद्ध बारामती शहर पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.

एका ४५ वर्षीय बांधकाम व्यावसायिकाने या प्रकरणात तक्रार दिली होती. तक्रारदाराने बारामती नगरपरिषदेत गृह प्रकल्पाचा प्रस्ताव दाखल केला होता. हा प्रस्ताव मंजूर करण्यासाठी ढेकळे यांनी दोन लाख रुपयांची लाच मागितली होती. तडजोडीनंतर एक लाख ७५ हजार रुपये देण्याचे ठरले. त्यानंतर तक्रारदाराने मंगळवारी (१८ मार्च) पुणे विभागीय लाचलुचपत प्रतिबंधक विभागाकडे तक्रार दाखल केली.

बुधवारी (१९ मार्च) ढेकळे यांनी एक लाखाचा पहिला हप्ता बारामतीतील ‘ऑक्सीजन जीम’ येथे घेण्याचे ठरवले होते. ठरल्याप्रमाणे त्यांनी लाच घेतली आणि त्याचवेळी लाचलुचपत प्रतिबंधक विभागाच्या अधिकाऱ्यांनी त्यांना रंगेहात पकडले.

ही कारवाई पुणे परिक्षेत्राचे पोलीस अधीक्षक शिरीष सरदेशपांडे, अतिरिक्त पोलीस अधीक्षक डॉ. शीतल जानवे यांच्या मार्गदर्शनाखाली करण्यात आली. भ्रष्टाचारविरोधी मोहिमेअंतर्गत लाचलुचपत प्रतिबंधक विभागाने लोकसेवक अथवा सरकारी कर्मचाऱ्यांकडून लाच मागितली जात असल्यास त्वरित संपर्क साधण्याचे आवाहन केले आहे.