“एका हातात पुस्तक, दुसऱ्या हातात मेंढ्यांची काठी… आणि डोळ्यात देशसेवेचं स्वप्न!”
फलटण :- ही गोष्ट आहे बिरुदेव सिद्धाप्पा डोणे यांची – कोल्हापूर जिल्ह्यातील कागल तालुक्यातील यमगे गावातल्या मेंढपाळाच्या पोटी जन्मलेल्या एका सामान्य मुलाची, ज्याने असामान्य यश मिळवून दाखवलं. भारतातील सर्वात कठीण समजल्या जाणाऱ्या यूपीएससी परीक्षेत 551 वा क्रमांक पटकावत बिरुदेवने आयपीएस अधिकारी होण्याचं स्वप्न साकार केलं.
गरिबी, उपासमार, चाकरी यांचा सामना करत, वडिलांसोबत माळरानावर मेंढ्या राखतच त्याने अभ्यास केला. मोठ्या क्लासेस, खास सुविधा या सगळ्यांपासून दूर राहून, फक्त मेहनत, चिकाटी आणि स्वप्नांवर विश्वास ठेऊन त्याने इतिहास घडवला. निकाल जाहीर झाला तेव्हा तो एका माळरानावर होता आणि त्याचे वडील आजारी – पण त्याच्या डोळ्यात मात्र देशसेवेचा झळाळता तेज होता.
बिरुदेव डोणे आज हजारो तरुणांसाठी एक जीवंत प्रेरणास्थान ठरत आहे. त्याचा प्रवास केवळ एक यशोगाथा नाही, तर तो आहे प्रत्येक ग्रामीण, गरीब, पण जिद्दी तरुणाच्या स्वप्नांना दिलेली नवी दिशा.
