सातारा : पुढारी वृत्तसेवा : माजी मुख्यमंत्री उद्धव ठाकरे यांनी देवेंद्र फडणवीस यांच्यावर टीका करत असताना फडतूस शब्दाचा वापर केला होता. यावरून राजकीय वातावरण चांगलेच तापले आहे. याबाबत बोलत असताना आमदार शिवेंद्रराजे यांनी देवेंद्र फडणवीस यांना फडतूस म्हणणं म्हणजे उद्धव ठाकरेंचा बालिश पणा असल्याची टीका केली आहे.

देवेंद्र फडणवीस यांचे नेतृत्व महाराष्ट्रामध्ये कार्यक्षम मुख्यमंत्री आणि आता उपमुख्यमंत्री अशी आहे. उद्धव ठाकरेंना सत्तेतून बाहेर जावे लागल्यामुळे ते असे बोलत असावेत. देवेंद्र फडणवीस यांच्या सारख्या कर्तव्यदक्ष नेतृत्वाबद्दल अशी वक्तव्य करणे, ही दुर्दैवी गोष्ट आहे.
आम्ही सर्व सातारकर या गोष्टीचा निषेध व्यक्त करतो. अशी वक्तव्य थांबवावी, आम्ही देखील उत्तर देऊ शकतो. परंतु, अशी आमची परंपरा नाही. त्यामुळे अशी वक्तव्य थांबवावी. तुम्हाला सुद्धा मुख्यमंत्री म्हणून संधी मिळाली होती. परंतु त्यावेळी तुमची कुठेही जायची इच्छाशक्ती नव्हती.

त्यामुळेच लोकांनी तुम्हाला नाकारले. तसेच तुमच्या आमदारांनी सुद्धा तुम्हाला नाकारले. त्यामुळे दुसऱ्यांना फडतूस म्हणून तुमचा नाकर्तेपणा लपणार नाही, अशी खरमरीत टीका आमदार शिवेंद्रराजे भोसले यांनी माजी मुख्यमंत्री उद्धव ठाकरे यांच्यावर केली आहे.

हेही वाचा 

सातारा; साई सावंत :  सह्याद्री व्याघ्र प्रकल्प म्हणजे निसर्ग सौंदर्य आणि प्राण्यांनी समृद्ध असा भाग. यामधीलच एक असणार्‍या कात्रेवाडी, वाघजाईवाडी, कारगाव, पिसाडी हा दुर्गम भाग ट्रेकर्सना आकर्षित करतो. ट्रेकर्सचे कमी असलेले प्रमाण व या भागात लोकवस्ती विरळ असल्याने येथील निसर्ग सौंदर्य पुढे आलेले नाही. परंतु, काही दिवसांपूर्वी सातार्‍यातील अजिंक्यतारा ट्रेकर्स ग्रुपने येथील निसर्ग सौंदर्य कॅमेराबद्ध केले आहे.

ग्रुपच्या सागर जाधव, सागर माने, दीपक देशमख,गणेश जगताप, दादा भोसले, पिंटू गवळी, जयेंद्र खोले यांच्यासह 12 जणांनी हा ट्रेक केला. सातार्‍यापासून कास गाव, तांबी, जुंगटी, कात्रेवाडी गावापासून केदारेश्वर मंदिरापर्यंत वाहनाने प्रवास केला. याच परिसरातील एका स्थानिक व्क्तीला घेऊन या ट्रेकर्स ग्रुपमधील जवानांनी वाघजाईवाडी, कारगाव व पिसाडी या भागात भ्रमंती केली. या भ्रमंतीमध्ये ग्रुपच्या सदस्यांना शेकडो प्रकारच्या वनस्पती, प्राणी, पक्षी, साप आढळून आले.

हा परिसर बफर क्षेत्रात असून ट्रेकर्स आणि निसर्गाच्या सान्निध्यात राहणार्‍यांसाठी मोठी पर्वणी आहे. या परिसरात लोकवस्ती कमी असल्याने कोणी फारसे फिरकत नाही. दुर्गम भाग असल्याने येथील निसर्गसौंदर्य जगासमोर आले नाही. या परिसरात पर्यटनाच्या दृष्टीने सह्याद्री व्याघ्र प्रकल्याच्या अधिकार्‍यांनी प्रयत्न करणे गरजेचे आहे.

सातारा; पुढारी वृत्तसेवा : सातारा जिल्ह्यात 9 बाजार समित्यांसाठी विक्रमी 913 अर्ज दाखल झाले आहेत. सर्वच पक्ष व गटांनी उमेदवारी अर्ज दाखल केले आहेत. मात्र, यातूनही काही मतदारसंघामध्ये उमेदवार न मिळाल्याने जिल्ह्यातील चार बाजार समित्यांमध्ये 5 जण बिनविरोध निवडून आले आहे. यामध्ये राष्ट्रवादी 4 आणि काँग्रेसचा 1 संचालक निवडून आला आहे.

राज्यातील 257 आणि सातारा जिल्ह्यातील सातारा, वाई, कोरेगाव, लोणंद, फलटण, कराड, पाटण, मेढा, वडूज या बाजार समित्यांचा निवडणुक कार्यक्रम सुरू आहे. सोमवारी अर्ज दाखल करण्याच्या शेवटच्या दिवशी सातारा बाजार समितीसाठी 61, कराड 80, पाटण 60, कोरेगाव 155, वडूज 177, फलटण 121, लोणंद 100, वाई 38 आणि मेढा बाजार समितीसाठी 121 अर्ज दाखल झाले आहेत. जिल्ह्यातील 9 बाजार समित्यांसाठी 162 संचालक निवडून द्यावयाचे आहेत. त्यामुळे निवडणूक चुरशी होणार असल्याची चिन्हे आहेत.
सोमवारी अर्ज दाखल झाल्यानंतर बुधवारी अर्ज छानणी होणार आहे. यामध्ये कोणाचे अर्ज बाद होणार? याकडे लक्ष लागून राहिले आहे. त्यानंतर अर्ज माघारीचा कालावधी सुरू होणार आहे. साधारणत: कोणत्याही निवडणुकीत अर्ज माघारीनंतरच किती जागा बिनविरोध झाल्या हे समजते. मात्र, बाजार समित्यांमध्ये अनेक पक्ष व गटांना उमेदवार मिळाले नाहीत. त्यामुळे पाच जागा बिनविरोध झाल्या आहेत.

यामध्ये वाई बाजार समितीमध्ये भटके विमुक्त आणि हमाल या मतदारसंघामधून राष्ट्रवादीचाच अर्ज आल्याने या दोन जागा बिनविरोध झाल्या आहेत. तसेच पाटणमध्ये हमाल-मापाडी मतदारसंघात पाटणकर गटाचीही एक जागा बिनविरोध निवडून आली आहे. तर कराडमध्येही काँग्रेसची एक व फलटणमध्ये राष्ट्रवादीचा एक संचालक बिनविरोध निवडून आले आहे. बिनविरोधमध्ये राष्ट्रवादीचे चार आणि काँग्रेसचा एक संचालक आहे.

सातारा; विठ्ठल हेंद्रे : सातारा जिल्ह्यात बेकायदा शस्त्रधारकांचा सुळसुळाट असतानाच परवानाधारकांचीही मनमानी सुरु असल्याचे वास्तव समोर येत आहे. परवानाधारक शस्त्रधारकांनाही जिल्हा, राज्य व देश या तीन ठिकाणी त्या-त्या परवानगीनुसार शस्त्र वापरण्याची परवानगी असताना ते कुठेही वापरले जात आहे. यामुळे सर्वच शस्त्रधारकांची झाडाझडती घेण्याची गरज निर्माण झाली आहे. दरम्यान, वर्षानुवर्षे परवानाधारकांवर अपवादात्मकच कारवाई झाली आहे.

कायदा व सुव्यवस्था अबाधित रहावी, यासाठी पोलिस प्रशासन काम करत असते. जिल्हाधिकारी कार्यालय परवानाधारक बंदूक परवाना देण्याचे काम करते. नाहरकतीमध्ये अनेकदा पोलिसांकडून फुलीच मारली जाते. मात्र, वशिला लावून बंदूक परवान्यासाठी खटाटोप केला जातो. आतापर्यंत 6087 जणांनी बंदूक परवान्यासाठी अर्ज केला असता त्यापैकी जिल्ह्यात 4019 जणांना परवाना देण्यात आला आहे.
दरवर्षी बंदूक परवानाधारकांना त्याचे नुतनीकरण करावे लागते. बंदूक वापरताना ती सार्वजनिक ठिकाणी कशी वापरावी? याबाबतही निर्देश आहेत. मात्र अनेक परवाना बहाद्दर ती बंदूक दिसेल अशा पध्दतीने त्याचे प्रदर्शन करत आहे. मात्र प्रशासनाकडून त्यांच्यावर कारवाई केली जात नाही.

जवानांना देशभरासाठी परवाना : बंदूक परवाना घेत असताना कागदपत्रांची चाळण करुनच परवाना दिला जातो. विविध प्रकारची कागदपत्रे व नाहरकत प्रमाणपत्र लागतात. उत्साहापोटी त्याची पुर्तता केली जाते. सुरुवातीला परवाना मिळताना जिल्ह्यासाठी मिळतो. त्यानंतर राज्यभरासाठी परवाना मागणीनुसार मिळतो. अगदी देशभरात कुठेही परवानाधारक बंदूक वापरण्याचा अधिकार आहे. मात्र देशभराऐवजी प्रामुख्याने जिल्हा व राज्यात वापरणार्‍यांची संख्या लक्षणीय आहे. दरम्यान, जवान तसेच आर्मीतील अधिकार्‍यांना बंदूक घेताना ती देशभरासाठी वापरण्याचाच परवाना दिला जातो. याउपर जिल्हा प्रशासनाच्या स्तरावर जिल्हा व राज्यासाठीच परवाना अधिक प्रमाणात दिला जातो.

शेंद्रे फायरिंगची बंदूक परवानाधारक…

शेंद्रे, ता. सातारा येथे 15 दिवसांपूर्वी परवानाधारक बंदुकीला कव्हर घेतले जात असताना बंदुकीतून अचानक फायर झाल्याने त्यातून सुटलेली गोळी थेट कर्मचार्‍याला लागली. क्षणभर मॉल अक्षरश: हादरुन गेला. वास्तविक कव्हर घेतले जात असताना रिव्हॉल्व्हर लोड नसती तर ही दुर्घटना टळली असती. मात्र लोडेड बंदूक सार्वजनिक ठिकाणी काढून कव्हरची हौस भागवताना ती दुसर्‍याच्या जीवावर बेतल्याची घटना घडली.

इलेक्शनवेळी बंदूक पोलिसांच्या कस्टडीत

निवडणूक कालावधीत परवानाधारक व्यक्तींना बंदूक स्थानिक पोलिस ठाण्यांमध्ये जमा करण्याची सक्ती असते. या कालावधीत हजारोंनी बंदूका जमा करण्यासाठी धावपळ असते. परवानाधारक बंदूक पोलिसांच्या कस्टडीत जमा करायची व इलेक्शन संपले की ती बंदूक परत आणायची यासाठी यंत्रणा अक्षरश: कामाला लागते. अनेकदा परवानाधारक व्यक्ती बंदूक जमा करत नसल्याचे समोर आले आहे. वेळ नसणे, परगावी असणे अशी, कारणे देऊन वेळ मारुन नेली जात आहे. दरम्यान, अनेकदा परवानाधारक व्यक्ती सक्षम नसतानाही (अपंग झाली आहे, अधिक वय, अशी कारणे) त्याचे नावे बंदूक असल्याचेही वास्तव आहे.