सातारा: महाबळेश्वरमध्ये सध्या ढगफुटीसदृश्य पाऊस सुरू झाला आहे. तुफान वाऱ्यासह मुसळधार पावसाने हजेरी लावल्याने जनजीवन विस्कळीत झाल्याचं चित्र आहे. महाबळेश्वरमध्ये फिरायला आलेल्या पर्यटकांना याचा मोठा फटका बसला आहे. राज्यातही अनेक ठिकाणी अवकाळी पावसाने हजेरी लावल्याने शेतकऱ्यांना मोठा फटका बसल्याचं चित्र आहे. 

आज सकाळपासूनच महाबळेश्वरमध्ये पावसाचं वातावरण दिसत होतं. त्यात दुपारनंतर मुसळधार पावसाने हजेरी लावली. हा पाऊस ढगफुटीसदृश्य असल्याचं दिसून येतंय. अचानक आलेल्या या मुसळधार पावसामुळे जनजीवन विस्कळीत झालेलं आहे. 

पुढील चार दिवसात राज्यात उष्णतेत मोठी घट

राज्यातील नागरिकांची उकाड्यापासून सुटका होणार आहे. उद्यापासून म्हणजे गुरुवारपासून पुढील चार दिवसात राज्यातील उष्णतेत मोठी घट होणार असून उन्हाळ्यामुळे हैराण झालेल्यांना मोठा दिलासा मिळणार आहे. संपूर्ण राज्यातील कमाल तापमानात उद्यापासून पुढील चार दिवस घट होणार आहे. पुढील चार दिवस राज्यभरतील तापमानात मोठी घट होणार असल्याची माहिती पुणे वेध शाळेचे प्रमुख डॉ. के एस होसाळीकर यांनी दिली आहे.

दुसऱ्या बाजूला, गेल्या काही दिवसात पुण्याचे तापमान 40 च्या वर जात आहे. पुण्यात एप्रिल किंवा मे महिन्यात 40 अंश तापमान बऱ्याचदा नोंदी झाल्या आहेत. 40 अंशापेक्षा जास्त तापमान गेल्यावर नागरिकांनी काळजी घ्यावी. दुपारी 12 ते 4 वाजेपर्यंत लोकांनी गरज नसेल तर बाहेर पडू नये असे देखील आवाहन हवामान विभागाने केले आहे. 

कोल्हापुरात उष्णतेचा पारा 39 अंशावर 

कोल्हापूरसारख्या हिरव्यागार जिल्ह्यात उन्हाचा पारा 39 अंशांवर पोहचला आहे. त्यामुळे नागरिकांच्या अंगाची अक्षरशः लाहीलाही होत आहे. घरातून बाहेर पडणे म्हणजे शिक्षा असं समजलं जातं आहे. गेल्या काही दिवसांपूर्वी कोल्हापुरात धुक्याची चादर पसरली होती. त्यानंतर चारच दिवसांपूर्वी करवीर तालुक्यातील काही गावात गारांचा पाऊस झाला. मात्र आता कोल्हापूरचे तापमान 39 अंशांवर पोहचले आहे. नागरिकांना चक्कर येणे, धाप लागणे, डोकं दुखणे असे त्रास होऊ लागले आहेत. कामानिमित्त बाहेर येणारे अनेकजण गॉगल आणि कॅपचा वापर करत आहेत.

हिंगोलीत गारांसह पाऊस

हिंगोली जिल्ह्यातील आनेक भागात मंगळवारी सायंकाळच्या सुमारास वादळी वाऱ्यासह जोरदार पावसाची हजेरी लावली आहे. काही भागात तर गारांचा सुद्धा पाऊस झाला आहे. या पावसाने शेतातील पिकांचेसुद्धा मोठ्या प्रमाणावर नुकसान झालं आहे. शेतातील भाजीपालावर्गीय फळबागांचे मोठ्या प्रमाणावर नुकसान झालं आहे. यामुळे शेतकरी पुन्हा एकदा संकटात सापडला आहे. 

सातारा; पुढारी वृत्तसेवा :  सातारा कृषी उत्पन्न बाजार समितीत घोटाळा झालाय, असं सांगणार्‍या खासदारांनी त्यावेळच्या चौकशीचे काय झालं, हे सांगावं. सातारा शहरातील नेत्याच्या सांगण्यावरूनच मेडिकल कॉलेजचे काम बंद पाडण्यात आले. खिंडवाडीतील खाणीचा खाणपट्टा मंजूर नसून बेकायदा सुरू असलेल्या या खाणीच्या चौकशीची मागणी जिल्हाधिकार्‍यांकडे केली आहे. या खाणीवर खासदारांनी बोलावे. ‘मी नाय त्यातली अन् कडी लाव आतली’, असा काही जणांमध्ये प्रकार आहे, असे टीकास्त्र आ. शिवेंद्रराजे भोसले यांनी पत्रकार परिषदेत सोडले.

मंगळवारी आ. शिवेंद्रराजे यांनी जिल्हाधिकार्‍यांची भेट घेतली. यावेळी त्यांनी प्रसारमाध्यमांशी संवाद साधला. आ. शिवेंद्रराजे म्हणाले, सातारा मेडिकल कॉलेजच्या कामाला संरक्षण मिळणे आवश्यक आहे. काही दिवसांपूर्वी शहरातील राजकीय नेत्यांच्या सांगण्यावरून कार्यकर्त्यांनी काम बंद पाडले. त्यामागचा हेतू काय होता, हे कळत नाही. ठेकेदाराची हॅरेशमेंट होऊ नये आणि आर्थिक मागणीचा प्रकार असेल किंवा राजकीय हेतूने आडकाठी आणली जात असेल तर ते चुकीचे आहे. खिंडवाडी येथील खाणीतून बेकायदा उत्खनन सुरू आहे. या खाणीचा खाणपट्टा मंजूर नाही, रॉयल्टी भरलेली नसून याप्रकरणाची चौकशी करावी. जिल्हा बँकेला ईडीची नोटीस आली, भ्रष्टाचार झालाय का, असे विचारले असता आ. शिवेंद्रराजे म्हणाले, ईडीची नोटीस आली नाही; पण माहिती घेऊन गेले होते. त्याचवेळी हा विषय संपला. खिंडवाडीत सुरू असलेल्या बेकायदा उत्खननाबाबत खासदारांनी बोलावे. बोलायचं भरपूर पण काम करण्याचा प्रकार वेगळा आहे. सातार्‍यातील काही लोकांमध्ये मराठीतील म्हणीप्रमाणे, ‘मी नाय त्यातली आणि कडी लाव आतली,’ असा प्रकार सुरू आहे. मेडिकल कॉलेजचे काम रखडवू नये याचा विचार लोकप्रतिनिधींनी करायला हवा.

बाजार समितीच्या प्रस्तावित इमारतीबाबत विचारले असता आ. शिवेंद्रराजे म्हणाले, खिंडवाडीतील 17 एकर जागेवर सातारा कृषी उत्पन्न बाजार समितीचे नियोजन आहे. ही जागा परत मिळावी, असा काही लोकांचा प्रयत्न होता. प्लॉट पाडून कोट्यवधी रूपये मिळवण्याचा प्रयत्न होता पण आम्ही त्यांना साथ दिली नाही. त्यामुळे काही नेतेमंडळी नाराज होवून बाजूला गेली. निवडणुकीनंतर प्लॅन तयार करणार आहे. जागा परत दिली नाही म्हणून मनोमीलन तुटले का?, हे त्यांनाच विचारायला हवे, असेही त्यांनी स्पष्ट केले.

खा. उदयनराजे यांनी राष्ट्रवादीच्या नेत्यांच्याही गाठीभेटी घ्यायला सुरूवात केली आहे, असे विचारले असता आ. शिवेंद्रराजे म्हणाले, गेली 15 वर्षे खासदार म्हणून कुणाला निवडून दिले, हे लोकांना या निमित्ताने कळेल. गाठीभेटी घेणे, मिठ्या मारण्याची वेळ निघून गेली आहे. पाणी पुलाखालून नाहीतर पूलच पाण्यात गेला आहे. गाठीभेटीचा काहीही परिणाम लोकांवर होणार नाही. केविलवाणा प्रयत्न सुरू आहे. त्यांनी सगळीकडे फिरावे, असा सल्लाही त्यांनी दिला. यावेळी माजी जि. प. सदस्य राजू भोसले, फिरोज पठाण, विक्रम पवार, सौरभ शिंदे, विरेंद्र शिंदे आदि उपस्थित होते.

कोर्टाच्या निकालावर विश्वास नाही का?

बाजार समितीबाबत बोलताना आ. शिवेंद्रराजे म्हणाले, मार्केट कमिटीच्या भ्रष्टाचाराच्या मुद्द्यावरून दंगा करत त्यांनी त्यांच्या लोकांचे राजीनामे घेतले आणि बाहेर पडले. त्यांनी त्यावेळी मागणी केलेल्या चौकशीचे काय झाले? कोर्टाचा निकाल मनवे यांच्या बाजूने लागला आहे. खा. उदयनराजे मनवेबद्दल बोलत असतील, तर त्यांचा कोर्टाच्या निकालावर विश्वास नाही का? तसे नसेल तर त्यांनी निकाल कसा दिला, याचा जाब कोर्टाला विचारावा. कोर्टाच्या निकालानंतर मनवे यांना कामावर हजर करून घेतले. खासदार कोर्टापेक्षा वर आहेत का? ते म्हणतील तेच खरं का, असा सवालही त्यांनी उपस्थित केला.