सातारा; पुढारी वृत्तसेवा : गेल्या रविवारपासून सातारा जिल्ह्यात टाळ-मृदंग व हरिनामाचा जयघोष करत व लाखो वारकरी व भाविकांसह पंढरपूरकडे निघालेला संत ज्ञानेश्वर महाराज पालखी सोहळा पाच दिवस मुक्कामी होता. जिल्ह्यातील बरड येथील अखेरचा मुक्काम आटोपून पालखी सोहळ्याने शुक्रवारी सकाळी सोलापूर जिल्ह्यात प्रवेश करत पंढरपूरकडे प्रस्थान केले. यावेळी सातारा जिल्हावासीयांनी माऊलींना भक्तिमय वातावरणात निरोप दिला.

माऊलींच्या पालखी सोहळ्याचे आळंदी येथून दि. 10 जून रोजी प्रस्थान झाले असून गुरुवार, दि. 29 जुलै रोजी आषाढी एकादशी दिवशी हा सोहळा पंढरपूर येथे पोहोचणार आहे. आळंदी ते पंढरपूर असा या पालखी सोहळ्याचा प्रवास असून हा पालखी सोहळा रविवार, दि. 18 जून रोजी पुणे जिल्ह्यातून सातारा जिल्ह्यात आला. तत्पूर्वी प्रथम नीरा नदीमध्ये माऊलींच्या पादुकांना दत्त घाटावर स्नान घालण्यात आले. त्यानंतर दुपारी 4 वाजता हा पालखी सोहळा लोणंदच्या पालखी स्थळावर स्थिरावला. लोणंद येथे दोन दिवसांचा मुक्काम आटोपल्यावर मंगळवार, दि. 20 रोजी चांदोबाचा लिंब येथे उभा रिंगण सोहळा झाला. हा सोहळा म्हणजे भाविकांसाठी ‘याचि देही याचि डोळा’ असा होता. हा रिंगण सोहळा झाल्यानंतर माऊलींची पालखी तरडगाव येथे एक दिवसाच्या मुक्कामासाठी विसावली. बुधवार, दि. 21 जून रोजी तरडगावचा मुक्काम आटोपून हा पालखी सोहळा काळज, सुरवडी, वडजल, निंभोरे गावामार्गे सायंकाळी 6 वाजण्याच्या सुमारास फलटणनगरीत आला. फलटणमधील प्रशस्त पालखी तळ (विमानतळ) येथे एक दिवसासाठी हा सोहळा विसावला. गुरुवार, दि. 22 जून रोजी फलटण येथील एक दिवसाचा मुक्काम आटोपून या पालखी सोहळ्याने बरडकडे प्रस्थान केले. दरम्यान, विडणी येथे सकाळी 9 वाजता माऊलींच्या पालखी सोहळ्याचे ग्रामस्थांनी स्वागत केले. त्यानंतर पिंप्रद येथे दुपारी माऊलींच्या पादुकांना अभिषेक घालण्यात आला. तसेच नैवेद्य दाखवून हरिनामाचा जयघोष करण्यात आला. त्यानंतर हा सोहळा पुढे निंबळक (वाजेगाव) येथे थांबून नंतर सायंकाळी 7 च्या सुमारास मुक्कामासाठी बरडगाव येथे विसावला. बरड येथेही मोठ्या उत्साहात पालखी सोहळ्याचे स्वागत करण्यात आले. शुक्रवार दि. 23 जून रोजी बरड येथील तसेच सातारा जिल्ह्यातील अखेरचा मुक्काम आटपून माऊलींच्या पालखी सोहळ्याने सकाळी 9 वाजता सोलापूर जिल्ह्यात प्रवेश केला. यावेळी सातारा जिल्हावासियांनी पालखी सोहळ्यास सातारा-सोलापूर जिल्ह्याच्या सिमेवर (धर्मपूरी) येथे भक्तीमय वातावरणात निरोप दिला.

दरम्यान, धर्मपुरी येथे सातारा जिल्हा प्रशासनाकडून जिल्हाधिकारी डुडी यांनी सोलापूरचे जिल्हाधिकारी मिलींद शंभरकर यांच्याकडे संतश्रेष्ठ श्री ज्ञानेश्वर महाराज पालखी हस्तांतरीत केली. यावेळी सातारचे मुख्य कार्यकारी अधिकारी ज्ञानेश्वर खिलारी, पोलिस अधीक्षक समीर शेख, सोलापूरचे जिल्हा परिषदेचे मुख्य कार्यकारी अधिकारी दिलीप स्वामी, सोलापूरचे पोलिस अधीक्षक शिरीष सरदेशपांडे उपस्थित होते.

माऊलींच्या पालखीचे जिल्हाधिकारी जितेंद्र डुडी यांनी केले सारथ्य

जिल्हाधिकारी जितेंद्र डुडी यांनी राजुरी पासून ते सोलापूर जिल्ह्याच्या सीमेपर्यंत माऊलींच्या रथाचे सारथ्य केले. हरी नामाचा गजर करत पालखीला जिल्हा प्रशासनाकडून निरोप देण्यात आला. दरम्यान, सोहळा प्रमुख अ‍ॅड. विकास ढगे पाटील यांनी प्रशासनाने चांगल्या प्रकारे सहकार्य व सोयी-सुविधा उपलब्ध करुन दिल्याबद्दल सातारा जिल्हा प्रशासनाचे आभार मानले.

लोणंद; पुढारी वृत्तसेवा :  लोणंद बाजार समितीच्या आवारातील बोकड व बकरीच्या गुरुवारच्या बाजारात व्यापारी व शेतकर्‍यांनी गर्दी केली होती. पुढील आठवड्यात होणार्‍या बकरी ईदच्या पार्श्वभूमीवर बाजार समितीला जत्रेचे स्वरूप आले होते. या बाजारात बकरी खरेदी-विक्री व्यवहारात कोट्यवधींची उलाढाल झाली.

लोणंद बाजार समितीच्या बकरी व बोकड, जनावरे बाजारात चांगलीच गर्दी झाली होती. पहाटे पाचपासून बाजार आवारावर दुचाकी, चार चाकी व ट्रकमधून शेळी, मेंढी, बकरी व बोकड यांची मोठी आवक सुरू होती. बाजारात बकरी व बोकडांची सुमारे पाच, दहा, पंधरा ते वीस हजारापर्यंत किंमती गेल्या होत्या. एका बोकडाची किंमत एक लाखापेक्षा जास्त गेली होती. बकरी ईदच्या पार्श्वभूमीवर जनावरांचा बाजार फुल्ल झाला. मोठ्या प्रमाणात खरेदी-विक्रीचे व्यवहार झाल्याने सुमारे 3 ते 4 कोटींची उलाढाल झाल्याचे सभापती सुनील शेळके-पाटील यांनी सांगितले. या बाजारात बकरी व बोकड खरेदीसाठी कर्नाटक, गोवा, राज्यासह हुबळी, धारवाड, बेंगलोर, कोकणातील महाड, सिंधुदुर्ग, रत्नागिरी, सातारा, पुणे, सोलापूर, कोल्हापूर, सांगली आदी भागातील सुमारे 15 ते 20 हजार खरेदीदार व्यापारी आले होते.

सातारा; पुढारी वृत्तसेवा :  पंतप्रधान नरेंद्र मोदी यांच्या विरोधात विरोधकांमध्ये खूप वेळा चर्चा झाल्या, अनेकदा एकत्र आले, मोदींच्यावर टिका केली. 2014 ला एकत्र आले, परत 2019ला एकत्र आले. मात्र, काहीही झाले तरी 2024 मध्ये पुन्हा नरेंद्र मोदी हेच पंतप्रधान होणार आहेत. अस्तित्व टिकवण्यासाठी विरोधक एकत्र आले आहेत, अशा शब्दात मुख्यमंत्री एकनाथ शिंदे यांनी विरोधकांचा समाचार घेतला.

सर्व विरोधी पक्षांचे नेते पाटणा येथे एकत्र आले आहेत. या पार्श्वभूमीवर दरे या आपल्या गावी माध्यमांशी बोलताना मुख्यमंत्री शिंदे म्हणाले, मोदी यांचे काम सत्तेसाठी, खुर्चीसाठी नाही ते देशासाठी, जनतेसाठी अहोरात्र काम करत आहेत. लोकांच्या भल्यासाठी ते कार्यरत आहेत. जगभरामध्ये त्यांचा करिष्मा दिसून आला आहे. त्यांना जगात आग्रहाचे स्थान आहे. अमेरिकेच्या सदनामध्ये त्यांना भाषण करण्याची संधी मिळते हे आपणा भारतीयांसाठी अभिमानास्पद आहे. विरोधक वैयक्तिक स्वार्थाने बरबटलेले आहेत. स्व:ताची खुर्ची कशी वाचवायची, आपले अस्तित्व कसे टिकवायचे यासाठी विरोधकांची धडपड सुरू आहे. त्यासाठी ते एकत्र आले आहेत. जेवढी मोदी यांच्यावर टिका झाली तेवढेच जनतेने त्यांना उचलून धरले आहे. जनतेनेच आता ठरवले आहे राष्ट्रभक्त, राष्ट्रप्रेमी नरेंद्र मोदी यांचीच देशाला आवश्यकता आहे, ती काळाची गरज आहे. 2024 ला पूर्ण मजबुतीने, बहुमताने नरेंद्र मोदी यांच्या नेतृत्वाखाली सरकार अस्तित्वात येणार असल्याचा विश्वास मुख्यमंत्री शिंदे यांनी व्यक्त केला.

कराड; पुढारी वृत्तसेवा : 

नको पांडुरंगा मला,
सोन्या – चांदीचं दान रे…,
फक्त भिजव पांडुरंगा,
हे तहानलेलं रान रे…
कमरेवरचा हात सोडून,
आभाळाला लाव तू,
ढगाला थोडं हलवून,
भिजव माझा गाव तू…

कोयना धरण अद्यापही पाण्यासाठी तहानलेले व व्याकुळलेले पहायला मिळत आहे. 105.25 टीएमसी पाणी साठवण क्षमता असलेल्या धरणात सध्या केवळ 10.82 टीएमसी इतका उपलब्ध पाणीसाठा असून यापैकी केवळ 5.82 टीएमसी इतकाच उपयुक्त पाणीसाठा शिल्लक आहे. पश्चिमेकडील वीज निर्मितीसाठी कमालीच्या मर्यादा आल्यानंतर कोयना धरणाचा चौथा टप्पा हा तब्बल एक हजार मेगॅवॅट क्षमतेचा जलविद्युत निर्मिती प्रकल्प बंद ठेवण्यात आला आहे. गरज व मागणीनुसार पोफळी व अलोरे येथून वीज निर्मिती सुरू असून गेल्या काही महिन्यांपासून सिंचनासाठी अव्याहतपणे पूर्वेकडे सोडण्यात येणारे पाणीही गुरुवारपासून चार दिवस मागणी कमी असल्याने बंद करण्यात आले आहे.

महाराष्ट्रासह पूर्वेकडे कर्नाटक, आंध्रप्रदेश राज्याच्या सिंचनाची तर निम्म्याहून अधिक महाराष्ट्राच्या विजेची गरज भागवणार्‍या कोयना धरणात सध्या पाण्याचा सार्वत्रिक ठणठणाट पहायला मिळत आहे. धरणाची समुद्रसपाटीपासूनची पाणी उंची 2029.4 फूट इतकी तर जलपातळी 618.541 मीटर इतकी आहे. ही जलपातळी 618 मीटरवर गेल्यानंतर पश्चिमेकडील एक हजार मेगॅवॅट क्षमतेचा कोयना चौथा टप्प्यातील वीज निर्मिती बंद पडते. मात्र यावर्षी त्या अगोदरच गेल्या काही दिवसांपासून ही वीज निर्मिती बंद ठेवण्यात आली आहे. सध्या केवळ पोफळी व अलोरे प्रकल्पातून मागणीनुसार वीज निर्मिती सुरू आहे. दरम्यान सिंचनासाठी कोयना धरण पायथा वीजगृहातून वीज निर्मिती करून तर वेळप्रसंगी आपत्कालीन दरवाजातून सिंचनासाठी पाणी सोडण्यात येत होते. मात्र पूर्वेकडे सध्या सिंचनाची मागणी कमी झाल्याने चार दिवसांसाठी सिंचनासाठी सोडण्यात येणारे पाणी बंद ठेवण्यात आले आहे.

अत्यल्प पाणीसाठ्यामुळे चिंता वाढली…

एक जूनपासून सुरू झालेल्या धरणाच्या नव्या तांत्रिक जलवर्षात आत्तापर्यंत कोयना 77, नवजा 84 व महाबळेश्वर येथे 100 मिलिमीटर इतक्याच अत्यल्प पावसाची नोंद झाली आहे. धरणात सध्या एकूण उपलब्ध पाणीसाठा 10.82 टीएमसी म्हणजेच एकूण क्षमतेच्या 10.28 टक्के इतका उपलब्ध पाणीसाठा शिल्लक आहे. तर त्यापैकी 5.82 टीएमसी उपयुक्त पाणीसाठा शिल्लक असल्याने चिंता व्यक्त होत आहे.