पुढारी ऑनलाईन डेस्क : बाळासाहेब देसाई यांची महाराष्ट्राला लोकनेता म्हणून ओळख होती. मात्र शंभूराज देसाई यांना कधीच लोकनेता होता येणार नाही. ते फेक नेते आहेत, अशी जहरी टीका करत खोक्याचा जो भूकंप झाला त्याचा केंद्रबिंदू पाटण आहे, असा घणाघात उद्धव बाळासाहेब ठाकरे शिवसेनेचे नेते खा. संजय राऊत यांनी केला.

मल्हारपेठ (ता. पाटण) येथे विविध विकासकामांचे उद्घाटन व लोकार्पण सोहळ्याप्रसंगी ते बोलत होते. यावेळी सातारा जिल्हा बँकेचे संचालक सत्यजितसिंह पाटणकर, शिवसेनेचे उपनेते नितीन बानुगडे- आदींची प्रमुख उपस्थिती होती.

खा. संजय राऊत म्हणाले, महाराष्ट्राला बाळासाहेब देसाई यांची ओळख लोकनेते म्हणून होती आणि राहील. स्व. बाळासाहेब ठाकरे यांच्यासोबत त्यांचा अत्यंत घरोबा होता. शिवसेनेच्या स्थापनेपासून बाळासाहेब देसाई हे खंबीरपणे शिवसेनेच्या पाठीशी उभे राहिले होते. महाराष्ट्रामध्ये मराठी माणसांची संघटना, मराठी अस्मितेसाठी काम करणारी शिवसेना, मुंबई राहायला पाहिजे, वाढायला पाहिजे. सातारा, पाटण भागातला तिकडे काम करणारा कष्टकरी मराठी माणूस आहे.

मराठी माणूस मुंबईत टिकला पाहिजे. मुंबई महाराष्ट्राची राजधानी आहे. आपण शिवसेनेच्या मागे उभे राहिला पाहिजे. मात्र शंभूराज देसाईंना कधीच लोकनेता होता येणार नाही.

खोक्याचा जो भूकंप झाला त्याचा केंद्रबिंदू पाटण आहे. महाराष्ट्रात भूकंप झाला की अगोदर पाटणला केंद्रबिंदू शोधला जातो आणि त्याचे केंद्र पाटणच्या आसपासच असते. अनेक धक्के पचवत पाटण, सातारा उभा राहिला आहे. त्यामुळे येथील जनतेला धक्क्याचे फार काही वाटत नाही. हा कसला धक्का आहे. त्याच्यापेक्षा आमच्या मुंबईतील भाऊचा धक्का चांगला आहे. २०२४ ला सर्व हिशोब पूर्ण केला जाईल.

सातारा; पुढारी वृत्तसेवा :  कारंडवाडीतील चार महिलांवर शनिवारी सायंकाळी काळाने घाला घातला. शेतात पैर्‍यावर कामासाठी गेलेल्या वृद्ध महिलांचा कालव्यात ट्रॉली पलटी झाल्याने मृत्यू झाला. या घटनेने शोकसागरात बुडालेली कारंडवाडी अद्यापही सावरलेली नाही. मृत चारही महिलांवर रविवारी अत्यंत शोकाकूल वातावरणात कैलास स्मशानभूमी येथे अंत्यसंस्कार करण्यात आले. नेहमी शेतात पैरा पद्धतीने काम करणार्‍या या चौघींनी अखेरच्या श्वासापर्यंत हा पैरा जपला.

कारंडवाडी हे सातारा शहरापासून अवघ्या 8 ते 10 कि.मी. वर असलेले गाव. सुमारे 900 उंबरठा असलेल्या या गावची लोकसंख्या साडेतीन हजाराच्या आसपास आहे. शेती व एमआयडीसी हे येथील लोकांचे उदरनिर्वाहाचे प्रमुख साधन. या गावासाठी शनिवार हा घातवार ठरला. अरूणा शंकर साळुंखे (वय 58), लिलाबाई शिवाजी साळुंखे (वय 60), सीताबाई निवृत्ती साळुंखे (वय 65) व उल्का भरत माने (वय 55) या चौघींजणी अन्य सहकारी महिलांसोबत शनिवारी शेतात कामाला गेल्या होत्या. सायंकाळी पावसाने जोर धरल्याने ट्रॅक्टर ट्रॉलीमधून त्या घरी परत येत होत्या. त्यावेळी महाडिक कॉलनीजवळ ट्रॉली कालव्यात पलटी झाली अन् या चारही महिलांना काळाने हिरावून नेले.

या घटनेची माहिती कळताच आख्खं गाव घटनास्थळी लोटलं. या महिलांचे मृतदेह पाहून प्रत्येकाच्या अंगावर शहारे येत होते. कुटुंबिय व नातेवाईकांचे अश्रू काहीकेल्या थांबत नव्हते. अवघी कारंडवाडी शोकसागरात बुडाली. रविवारीही गावात निरव शांतता पसरली होती. शोकाकूल वातावरणातच मृत चारही महिलांवर कैलास स्मशानभूमीत अंत्यसंस्कार करण्यात आले. चौघींनाही एकाचवेळी अशा पद्धतीने अखेरचा निरोप देण्याची वेळ आल्याने अनेकांना हुंदका आवरत नव्हता.

सकाळी शेतात जाताना…

शेतात पैरा पद्धतीने काम करत एकमेकींसोबत राहण्याची त्यांची नित्याचीच सवय होती. मात्र, शनिवारी त्यांचा पैरा अखेरचा ठरला. सकाळी शेतात जाताना त्यांना माहितही नव्हते की आज पैर्‍याचा अखेरचा दिवस असेल. एका दुर्घटनेने त्यांना एकाचवेळी कायमचे हिरावून नेले.

ढेबेवाडी; पुढारी वृत्तसेवा :  जनतेच्या मनातील मुख्यमंत्री उद्धव ठाकरे हेच विधानसभा निवडणुकीनंतर पुन्हा मुख्यमंत्री होतील, असा विश्वास व्यक्त करत आम्ही पुन्हा सत्तेवर येऊ; पण फौजदाराचा हवालदार म्हणून नाही. अशा शब्दात खासदार संजय राऊत यांनी उपमुख्यमंत्री देवेंद्र फडणवीस यांच्यावर घणाघाती टीका केली आहे. तर मुख्यमंत्री एकनाथ शिंदे, मंत्री शंभूराज देसाई यांच्यासह गद्दार आमदारांनी गद्दारीचे खरे कारण अजूनही सांगितले नसून, केवळ खोक्यांसाठी शिवसेनेसोबत त्या सर्वांनी गद्दारी केल्याचा पुनरुच्चार खासदार संजय राऊत यांनी केला आहे.

गुढे (तळमावले, ता. पाटण) येथील गणेश मंगल कार्यालयात पश्चिम महाराष्ट्र संपर्कप्रमुख नितीन बानुगडे-पाटील, जिल्हाध्यक्ष हर्षल कदम, सचिन मोहिते, तालुकाध्यक्ष सचिन आचरे यांच्या उपस्थितीत खासदार संजय राऊत यांच्या अध्यक्षतेखाली मेळावा झाला. यावेळी ते बोलत होते.

खासदार संजय राऊत यांनी उत्पादन शुल्क मंत्री शंभूराज देसाई यांच्यासह मुख्यमंत्री शिंदे गटाचे आमदार, भाजपाचे नेते यांच्यावर जोरदार टीका केली. राज्यात पंढरपूरला एक आणि मुंबईत मातोश्रीमध्ये स्व. बाळासाहेब ठाकरे यांच्या रूपाने दोन विठ्ठल आहेत. 40 गद्दार आमदारांपैकी एकही विधानसभा निवडणुकीत विजयी होणार नाही. शंभूराज देसाई यांना लाल दिवा प्रथम बाळासाहेब ठाकरे यांनी तर दुसर्‍यांदा उद्धव ठाकरे यांनी दिला. मात्र त्यानंतरही गद्दारी करून सरकार पाडल्याने त्यांना शिवसेनेत कधीही थारा मिळणार नाही.

गद्दारांचे सरकार आल्यापासून राज्यातील उद्योग गुजरातला जात आहेत. महाराष्ट्रापेक्षा गुजरातचेच हित अधिक पाहिले जात आहे. शिवसेना 40 गद्दारांना देण्याचे पाप केंद्रीय गृहमंत्री अमित शहा यांनी केले आहे. मात्र बचेंगे तो और भी लढेंगे असे सांगत आम्ही केवळ लढणार नाही, तर तुम्हाला खतम करून जिंकणार हा शिवसेनेचा इतिहास आहे, हे लक्षात ठेवा असा इशाराही खा. राऊत यांनी यावेळी दिला.

स्व. लोकनेेते बाळासाहेब देसाई यांनी शिवसेना स्थापनेपासून शिवसेनेला सहकार्य केले. त्यांनी कधीही गद्दारी केली नाही आणि आयुष्यभर निष्ठा जोपासली. मात्र त्यांच्याच घराण्यात शिवसेना फोडणारा गद्दार आहे, हे पाटण तालुक्याचे दुर्दैव आहे. विधानसभा निवडणुकीत निष्ठावंत शिवसैनिक त्यांचा पराभव केल्याशिवाय स्वस्थ बसणार नाही असा दावा खासदार संजय राऊत यांनी केला. यावेळी नितीन बानुगडे-पाटील, हर्षल कदम यांच्यासह प्रमुख पदाधिकार्‍यांनी मनोगत व्यक्त केले.