खेड; अजय कदम :  राष्ट्रवादी काँग्रेसमध्ये उभी फूट पाडत अजितदादांनी केलेले बंड व शिंदे – फडणवीस सरकारमध्ये सत्तेत सहभागी होण्याच्या घेतलेल्या निर्णयामुळे सातारा तालुक्यातील राजकीय समीकरणे बदलणार आहेत. दोन्ही गट सातारा तालुक्यात कमकुवत आहे. त्यामुळे गटाची पुनर्बांधणी करण्यासाठी संघर्ष करावा लागणार आहे. त्यामुळे दोन्ही गटात राजकीय रस्सीखेच होणार आहे. अजितदादांचा हा निर्णय आ. शिवेंद्रराजेंच्या पथ्यावर पडणार की त्यांचीही समीकरणे बिघडवणार, हे पाहणे औत्सुक्याचे आहे.

सातारा हा राष्ट्रवादीचा बालेकिल्ला आता खा. शरद पवार व ना. अजित पवार या दोन गटांमध्ये विभागला गेला आहे. 1999 पासून या तालुक्याने शरद पवार यांना साथ दिली. परंतु 2019 मध्ये आ. शिवेंद्रराजेंनी राष्ट्रवादीला सोडचिठ्ठी देत भाजपचा झेंडा हाती घेतला. महाविकास आघाडी काळात उपमुख्यमंत्री असताना ना. अजित पवार यांनी आ. शिवेंद्रराजेंना मोठा निधी दिला. तसेच शिवेंद्रराजे व अजितदादांचे संबध सलोख्यााचे आहेत. शिवेंद्रराजे राष्ट्रवादीतून गेल्यानंतर सातारा तालुक्यात राष्ट्रवादी औषधालाही शिल्लक राहिली नव्हती. सातार्‍यात अजितदादा व शरद पवार या दोन्ही गटाचे जेमतेम कार्यकर्ते आहेत.

त्यामुळे दोन्ही गटाकडून आपला गट मजबूत करण्यावर भर दिला जाणार आहे. सातारा तालुक्यात अजितदादांना मानणारे कार्यकर्ते आहेत. तर शरद पवारांची बाजू घेणार्‍या पदाधिकार्‍यांची संख्याही मोठी आहे. त्यामुळे पुनर्बांधणीसाठी दोन्ही गटांना खूप संघर्ष करावा लागणार आहे.

राष्ट्रवादी काँग्रेसच्या फुटीनंतर या तालुक्यात शरद पवार यांना मानणार्‍या गटामध्ये द्धिधा मनस्थिती निर्माण झाली आहे. शरद पवार यांच्याविषयी प्रेम तर अजितदादा करत असलेली कामे, यामुळे प्रेम की जनतेची कामे याच ओझं कार्यकर्त्यांवर येऊन पडलं आहे. तालुक्यातील कोरेगाव मतदारसंघात विभागलेल्या 36 गावांवर आ. शिवेंद्रराजे, आ. शशिकांत शिंदे व आ. महेश शिंदे यांचा पगडा आहे. या ठिकाणी शशिकांत शिंदे हे शरद पवार यांच्यासोबत आहेत. त्यामुळे या ठिकाणी अजितदादांना नवीन कार्यकर्त्यांची फळी निर्माण करावी लागणार आहे. अजितदादा कामे वेगाने करत असल्याने बहुतांश पदाधिकार्‍यांची पहिली पसंती अजितदादाच आहेत. त्यामुळे शरद पवारांचा गट वाढवण्यासाठी शशिकांत शिंदेंना जीवाचे रान करावे लागणार आहे.

या भागात पवार विरुद्ध पवार असा संघर्ष उफाळून येणार असून शरद पवार गटाच्या आ. शशिकांत शिंदे व कार्यकर्त्यांची पक्षसंघटनात्मक बांधणीसाठी कसोटी लागणार आहे. भविष्यात या भागातील आणखी कोण कोण उपमुख्यमंत्री अजित पवार यांच्यासोबत जाणार याचीही उत्सुकता आहे. त्यामुळे या 36 गावांमध्ये राजकीय वणवा पेटणार असल्याचे चित्र आहे.

संघर्ष जाणार विकोपाला

अजित पवार आणि शरद पवार यांच्या गटातील राजकीय संघर्ष आगामी काळात विकोपाला जाणार आहे. दोन्ही नेते पदाधिकार्‍यांना आपल्याकडे खेचण्याचा प्रयत्न करतील. या परिस्थितीत राष्ट्रवादीतील ही फूट कुणाच्या पथ्यावर पडणार? हे निकालानंतरच समोर येणार आहे. असे असले तरी दोन्ही गटांना आपला गट मजबूत करण्यासाठी नवीन आव्हानांचा सामना करावा लागणार आहे.

सातारा; पुढारी वृत्तसेवा :  देशातील सर्वात उंच असलेला भांबवली- वजराई धबधबा फेसाळू लागला आहे. हा धबधबा पर्यटकांना पाहण्यासाठी आजपासून खुला होत आहे. भांबवली, वजराई हा परिसर डोंगराळ असून घनदाट झाडीचा आहे. त्यामुळे पर्यटकांना धबधब्यापर्यंत पोहचण्यासाठी जांभ्या दगडाची पायवाट करण्यात आली आहे.

पर्यटकांना हिरव्यागर्द झाडीतील धुवांधार पावसाचा व धबधब्याचा थ्रीलींग अनुभव घ्यायचा असेल तर जुलै व ऑगस्ट महिन्यांत भांबवली वजराई धबधब्याला भेट दिली पाहिजे. भांबवलीतील आताचे वातावरण मनोरम आहे, धुवांधार पावसाच्या सरी, गार-गार वारा, रानकिड्यांचे आवाज, हिरवी गर्द झाडी, धबधब्याच्या पाण्याचा प्रचंड प्रपात, निसर्गाचा खुललेला नजारा पाहून मन प्रफुल्लीत होते.

भांबवली वजराई धबधब्याला दि. 5 जानेवारी 2018 रोजी क वर्ग पर्यटन म्हणून मान्यता मिळाली. त्यानंतर धबधब्याच्या विकासाचे काम चालु झाले. घनदाट जंगल व दुर्गम डोंगरातून जाताना पर्यटकांना कसरत करावी लागते. ही कसरत पहिल्या टप्यातील पायर्‍या व रेलिंग केल्याने दुर झाली आहे. दुसर्‍या टप्यात वॉच टॉवर व पॅगोडाचे काम झाले असून निसर्गाचा मनमुराद आनंद लुटता येतो. तिसर्‍या टप्यातील बाम्बु (गेस्ट) हाऊसचे काम चालु असून लवकरच पुर्णत्वास जाईल व पर्यटकांना निसर्गाच्या सानिध्यात राहण्याचा आनंद मिळेल.

पर्यटकांना निसर्गाचा आनंद लुटण्याची पर्वणी ठरणारा हा मौसम आहे. निसर्गाचा अमूल्य ठेवा असलेला हा परिसर पर्यटन विकासामुळे खुलायला लागला असून पर्यटकांना खुणावत आहे. भांबवली हे अलिकडेच प्रसिध्दीस आलेले एक निसर्गसंपन्न पर्यटनस्थळ आहे. भांबवली वजराई धबधबा व भांबवली पठार ही येथील प्रमुख प्रेक्षणिय स्थळे आहेत. हा संपुर्ण परिसर दाट जंगल व विपुल निसर्ग संपदेने नटलेला आहे. आगामी काळात मंगळावरील अनुभवासारखा भास होणार्‍या भांबवली पठाराचा सुध्दा जागतिक पातळीवर लौकिक होईल व पूर्ण परिसाचा पर्यटन विकास होईल, अशी आशा स्थानिकांना लागून राहिली आहे.

सातारा; पुढारी वृत्तसेवा :  दै. ‘पुढारी’ कस्तुरी क्लब व स्टार प्रवाह यांच्या संयुक्त विद्यमाने रविवार दि. 9 जुलै रोजी दुपारी 3 वा. सैनिक स्कूल सभागृह, सदरबझार, सातारा येथे हळदी-कुंकू सोहळ्याचे आयोजन करण्यात आले आहे. यावेळी धम्माल गेम शो, लकी ड्रॉ व हमखास गिफ्ट कूपन्सचा वर्षाव होणार आहे.

कस्तुरी क्लब नेहमीच महिलांच्या कलागुणांना वाव मिळण्यासाठी व्यासपीठ उपलब्ध करुन देते. याचाच एक भाग म्हणजे दै.‘पुढारी’ कस्तुरी क्लब आयोजित आणि स्टार प्रवाह प्रस्तुत हा रंगतदार कार्यक्रम होत असून कस्तुरी सदस्यांसाठी धम्माल वन मिनिट गेम शो होणार आहे. स्टार प्रवाहवरील लोकप्रिय मालिका ‘ठरलं तर मग’ यातील मुख्य कलाकार सायली व कल्पना हे कस्तुरींशी या मालिकेबद्दल दिलखुलास संवाद साधणार आहेत. धम्माल मनोरंजनाबरोबरच बक्षीसांची लयलूट करण्याची संधी महिलांना मिळणार आहे. तसेच तनिष फार्मिंग ज्वेलरीकडून प्रथम येणार्‍या 500 महिलांना हमखास गिफ्ट कूपन दिले जाणार आहे.

लकी ड्रॉमध्ये शिंदे स्टील फर्निचर- ड्रेसिंग टेबल, गणेश गोल्ड ज्वेलर्स-2 चांदीचे पैंजन, तनिष फर्मिंग ज्वेलरी-2 गंठन दिली जाणार आहेत. हा कार्यक्रम सर्व महिलांसाठी खुला असून महिलांनी याचा लाभ घ्यावा. महिलांनी येताना केशरी, लाल व निळा या रंगातीलच साडी किंवा ड्रेस परिधान करावा. अधिक माहितीसाठी 8104322958 या नंबरवर संपर्क साधावा, असे आवाहन दै. ‘पुढारी’ कस्तुरी क्लबतर्फे करण्यात आले आहे.

कोण होणार स्टार प्रवाहची महाराणी?

कार्यक्रमातील मुख्य आकर्षण म्हणजे स्टार प्रवाहची महाराणी ही स्पर्धा आहे. स्पर्धेतील अंतिम विजेत्यांना स्टार प्रवाहची महाराणी किताब पटकावण्याची संधी मिळणार आहे. हा किताब पटकावणार्‍या महिलेस क्राऊन आणि आकर्षक भेटवस्तू मिळणार आहे.