परळी; पुढारी वृत्तसेवा :  पावसामुळे कास-ठोसेघर परिसरातील डोंगरदर्‍यात विलोभनीय निसर्गसौंदर्य अवतरले आहे. संततधार सरींमुळे निर्माण झालेल्या विहंगम निसर्ग सौंदर्याने हा परिसर प्रत्येकाच्या मनात घर करून राहिला आहे. येथील डोंगरदर्‍यांनी हिरवाईची शाल पांघरून घेतली आहे. परिसरातील निसर्ग हिरवागार बनला आहे. उंच उंच डोंगर जे उन्हाळ्यात वणव्यामुळे काळेकुट्ट पडले होते ते आता हिरवीगार निसर्ग नवलाई दाखवू लागले असून, हा परिसर पर्यटकांना खुणावू लागला आहे.

डोंगररांगांनी रूपडे पालटले… सर्वत्र हिरवा गालिचा…

जून महिना सुरू झाला की पाऊस सुरू होतो आणि निसर्ग बहरू लागतो. यंदा पावसाने ओढ दिल्याने पावसाळी पर्यटनही लांबले होते. गेल्या काही दिवसांपासून पावसाने हजेरी लावली असून, येथील डोंगररांगा संततधार पावसामुळे आता हिरवळल्या आहेत. सर्व परिसरात हिरवा गालिच्छा पसरू लागला आहे. सर्वत्र रानफुले फुलू लागली आहे. येथील वाराही सुसाट वेगाने मदमस्त बेधुंदपणे वाहू लागला आहे. डोंगर पर्वतांवर धुक्याची शाल पसरली असून हा परिसर तरुणांबरोबरच निसर्गप्रेमींना खुणावत आहे. खास पावसाळ्यातील निसर्गाचा आनंद लुटण्यासाठी नवविवाहित, तरुणांई, निसर्गप्रेमी कास-ठोसेघर येथे येत आहेत.

धबधब्याचे सौंदर्य मोबाईलमध्ये

निसर्गाच्या जादुई कुंचल्याची किमया टिपताना कास-ठोसेघरचे विहंमग रूप पाहण्याची मजा काही औरच असते. उंचावरून कोसळणारे छोटे-मोठे धबधबे पर्यटकांना खुणावू लागले आहेत. डोंगररांगांमधून फेसाळणार्‍या धबधब्याचे द़ृश्य पाहण्यासाठी दुचाकी तसेच चार चाकीमधून फिरायला येणार्‍यांची संख्या वाढली असून परिसरात भात लावणीच्या कामास वेग धरला आहे.

ठोसेघर धबधब्याकडे पर्यटकांचा कल

निसर्ग सौंदर्याची मुक्त उधळण, आकाशाशी स्पर्धा करणारे मोठाले वृक्ष, झोेका घेऊन अंगावर रोमांच उभा करणारा खट्याळ वारा, हिरवा शालू परिधान करून पावसाच्या वर्षावाने चिंब चिंब भिजणारा निसर्ग असे विहंगम द़ृश्य महाबळेश्वर-पाचगणी, कास, ठोसेघर, बामणोली परिसरात पाहावयास मिळत असून, ऐन पावसातही अनेकजण पर्यटनाचा आनंद लुटत आहेत. परळी खोर्‍यातील पर्यटनस्थळी पर्यटकांची रिघ लागत असून, विकेंडला तुडुंब गर्दी होत आहे. विशेषत: ठोसेघर धबधबा पाहण्यासाठी अनेकांचा कल वाढला आहे. येथील गॅलरी तर विकेंडला हाऊसफुल्ल होत आहे.

सातारा; पुढारी वृत्तसेवा :  वीज बिल भरण्यासाठी आता नागरिकांना महावितरण कार्यालयात अथवा बँकेतील रांगेत उभे राहण्याची गरज नाही. ग्राहकांना घरगुती वीज बिल किराणा दुकानातही भरता येणार आहे. परंतु, यासाठी किराणा दुकानदाराला महावितरणकडे अर्ज करून डिजिटल पेमेंट वॉलेट घ्यावे लागणार आहे.

महावितरणने वीज ग्राहकांसाठी ऑनलाईन वीज बिल भरण्याची सुविधा उपलब्ध केली आहे. त्यामुळे ग्राहकांना संगणक अथवा मोबाईलवरून हवे तेव्हा वीज बिल भरता येते. मात्र, ज्या नागरिकांना ऑनलाईन प्रणालीचा वापर करता येत नाही, त्यांना महावितरण कार्यालयात अथवा बँकेत जाऊनच वीज बिल भरावे लागते. त्यामुळे मनस्ताप तर होतोच, शिवाय वेळही वाया जातो. ही परवड थांबवण्यासाठी महावितरणने ग्राहकांसाठी आणखी एक सुविधा उपलब्ध करून दिली आहे.

वीज ग्राहकांना किराणा दुकानात देखील वीज बिल भरता येणार असून यासाठी संबंधित दुकानदाराला डिजिटल पेमेंट वॉलेट घ्यावे लागणार आहे. या वॉलेटमध्ये किमान पाच हजार रुपये भरावे लागणार आहेत. म्हणजे महावितरणच्या या डिजिटल वॉलेटमध्ये पैसे भरणा करून दुकानदारांना वीज बिल भरून घेता येणार आहे.

असे भरता येणार बिल…

ग्राहकांना महावितरणकडून दर महिन्याला वीज बिल दिले जाते. तसेच नोंदणीकृत मोबाईल क्रमांकावर बिलाचा मेसेज पाठवला जातो. हे बिल किंवा मेसेज दाखवल्यास दुकानदाराकडून वीज बिल भरले जाईल, पावतीही दिली जाणार आहे.

शिवथर; पुढारी वृत्तसेवा :  मायलेकराचं भांडण सोडवायला गेलेल्या वृद्ध शेजार्‍याचा निर्घृण खून झाल्याची घटना वडूथ, ता. सातारा येथे रविवारी रात्री साडेनऊच्या दरम्यान घडली. मध्यस्थी करणे जीवावर बेतल्याने हळहळ व्यक्त होत आहे. संशयिताला अटक केली आहे.
पोपट गुलाब मदने (वय 64) असे मृत वृद्धाचे तर उमेश गुलाब राठोड (वय 29, रा. वडूथ) असे अटक केलेल्या संशयिताचे नाव आहे.

घटनास्थळावरून मिळालेली माहिती अशी, मृत पोपट मदने यांच्या शेजारी उमेश राठोड हा कुटुंबासह रहात आहे. रविवारी रात्री नऊच्या दरम्यान उमेश त्याच्या आईबरोबर मोठमोठ्याने भांडत होता. पोपट मदने हे त्यांना समजावण्यासाठी गेले. यावेळी त्यांनी भांडण न करण्याबाबत सांगितले. ‘तू मोठ्या मोठ्याने ओरडू नकोस आमच्या घरात लहान मुले झोपली आहेत’, असेही मदने यांनी त्यांना सांगितले. मात्र, उमेश राठोड याचा राग अनावर झाला. त्याने पोपट मदने यांच्या छातीवर चाकूने वार केले. हे वार पोपट यांच्या वर्मी लागून ते गंभीर जखमी झाले. त्यांना उपचारासाठी रुग्णालयात नेण्यात आले. मात्र तोपर्यंत त्यांचा मृत्यू झाला होता. पोलिस निरीक्षक विश्वजित घोडके, पोलीस उपनिरीक्षक फरांदे व त्यांच्या सहकार्‍यांनी संशयिताला अटक केली. न्यायालयाने त्याला पोलिस कोठडी सुनावली.

कराड; पुढारी वृत्तसेवा :  विधानसभेच्या अधिवेशनामध्ये संभाजी भिडे यांच्या अटकेची मागणी केल्यावरुन माजी मुख्यमंत्री, आमदार पृथ्वीराज चव्हाण यांना धमकी देणारा मेल पाठवण्यात आला होता. याप्रकरणातील मेल पाठवणार्‍या संशयित तरुणास पोलिसांनी राजगड येथून अटक केली. अंकुश सवरटे (वय 23, रा. आलेगाव, पो. कावळगाव, ता. पूर्णा, जिल्हा परभणी, सध्या रा. बालाजीनगर धनकवडी पुणे) असे त्याचे नाव आहे.

दरम्यान, यावरून काँग्रेस आक्रमक झाली असून या घटनेचा निषेध करत अशा प्रवृत्तीला जशास तसे उत्तर देण्याचा इशारा दिला आहे. शिवप्रतिष्ठान हिंदुस्थानचे संभाजी भिडे हे काही दिवसांपासून सातत्याने वादग्रस्त वक्तव्ये करत आहेत. या वक्तव्यावरून माजी मुख्यमंत्री पृथ्वीराज चव्हाण यांच्यासह काँग्रेस नेत्यांनी आक्रमक भूमिका घेतली आहे. आमदार चव्हाण यांनी संभाजी भिडे यांना अटक करण्याची मागणी केली होती. त्यानंतर दोन दिवसापूर्वी त्यांना धमकी देणारा मेल पाठवण्यात आला होता. हा मेल अंकुश सरवटे याच्या मेलवरून नांदेड येथून पाठविण्यात आला होता. त्यानंतरच्या चौकशीत संशयित पुणे परिसरात असल्याचे समोर आल्यानंतर कराड पोलिसांनी त्यास अटक केली. सोमवारी संशयितास प्रथमवर्ग न्यायदंडाधिकार्‍यांपुढे हजर करण्यात आले होते. त्यानंतर जामीन मंजूर झाला.

गणेशचंद्र पिसाळ

पाटण :  यावर्षी 15 जुलैपर्यंत महाराष्ट्रासह कर्नाटक, आंध्र प्रदेश या राज्यांचे डोळे पांढरे करायला लावणार्‍या कोयना धरणात जुलैच्या दुसर्‍या पंधरवड्यात अपेक्षित पाऊस व पाण्याची आवक झाल्याने पाणीसाठ्यात वाढ झाली आहे. गतवर्षीच्या तुलनेत यावर्षी आत्तापर्यंत सरासरीपेक्षा जास्त पाऊस, पाण्याची आवक व सध्याचा पाणीसाठा जास्त असल्याने सार्वत्रिक समाधान व्यक्त होत आहे. हे धरण पूर्ण क्षमतेने भरण्यासाठी आता 32.44 टीएमसी पाण्याची आवश्यकता असून अजूनही तब्बल दोन ते अडीच महिन्यांचा पावसाचा कालावधी शिल्लक असल्याने हे धरण पूर्ण क्षमतेने भरण्याच्या आशा पल्लवीत झाल्या आहेत.

महाराष्ट्राची वरदायिनी मानल्या जाणार्‍या कोयना धरणाचे तांत्रिक वर्ष 1 जून ते 31 मे कालावधीत गणले जाते. या तांत्रिक वर्षारंभाला म्हणजेच 1 जूनला कोयना धरणात 18.09 टीएमसी पाणीसाठा शिल्लक होता. जून महिन्यात अपेक्षित पाऊस झाला नाही, तर अगदी जुलै महिन्याच्या पहिल्या पंधरवड्यापर्यंतही पावसाने पाठ फिरवल्याने कोयना धरणात अपेक्षित पाण्याची आवकही झाली नव्हती. मात्र, 15 जुलैनंतर पावसाने जोरदार हजेरी लावण्यास प्रारंभ केला आणि धरणात अपेक्षित पाणीसाठा होण्यास मदत झाली. त्याचवेळी या दोन महिन्यांत सिंचन व पश्चिम वीज निर्मितीसाठी 11.13 टीएमसी पाणीवापर झाला आहे. तरीही धरणात सध्या उपलब्ध पाणीसाठा 72.81 टीएमसी तर त्यापैकी उपयुक्त पाणीसाठा 67.81 टीएमसी इतका आहे.

105.25 टीएमसी पाणी साठवण क्षमता असलेल्या कोयना धरणातील एकूण पाणीसाठ्यापैकी 67.50 टीएमसी पाणी साठा पश्चिम वीज निर्मितीसाठी आरक्षित आहे. गतवर्षी पूर्वेकडे सिंचनासाठी धरण निर्मितीनंतर पहिल्यांदाच ऐतिहासिक असा तब्बल 36.05 टीएमसी पाणीवापर झाला. निश्चितच या पाणी वापरामुळे नव्या वर्षारंभाला तुलनात्मक कमी पाणीसाठा शिल्लक राहिला होत .