सातारा; पुढारी वृत्तसेवा :  राज्याचे मुख्यमंत्री एकनाथ शिंदे हे गुरुवार व शुक्रवार या दोन दिवसाच्या खाजगी दौर्‍यावर दरे तर्फ तांब (ता. महाबळेश्वर) गावी आले आहेत. बुधवारी रात्री ते कारमधून सातारा दौर्‍यावर येणार होते. मात्र उशीर झाल्याने त्यांनी बुधवारी रात्री येणे टाळले. त्यानंतर गुरुवारी सकाळी हेलिकॉप्टरमधून येत असताना खराब हवामानामुळे त्यांचे हेलिकॉप्टर भरकटले. त्यामुळे मुख्यमंत्र्यांना पुन्हा मुंबईला माघारी जावे लागले. तेथून पुन्हा हेलिकॉप्टरने सातार्‍यात उतरून कारमधून ते गावी रवाना झाले.

मुख्यमंत्री एकनाथ शिंदे बुधवार, गुरुवार व शुक्रवार या तीन दिवसाच्या सातारा जिल्हा दौर्‍यावर येणार होते. त्यांचे कुटुंबीय बुधवारीच त्यांच्या दरे तर्फ तांब या मूळ गावी पोहोचले आहे. बुधवारी दिवसभरातील आपल्या बैठका व कार्यक्रम संपवून रात्री 10 वाजता ते वाहनाने बाय रोड दरे तर्फ तांब येथे येणार होते. रात्री उशिर झाल्याने त्यांनी गावी येण्याचा निर्णय बदलत गुरुवारी सकाळी वाहनाने निघण्याचा निर्णय घेतला होता. मात्र बैठका व कार्यक्रमामुळे त्यांनी हेलिकॉप्टरने जाण्याचा निर्णय घेतला. सकाळी हेलिकॉप्टरने मुंबईमधून दर्‍याकडे ते निघाले. मात्र खराब हवामानामुळे त्यांना पुन्हा मुंबईला माघारी फिरावे लागले. दरे या ठिकाणी खराब वातावरण होते. तसेच अधूनमधून पावसाच्या जोरदार सरी कोसळत होत्या. त्यामुळे त्यांनी हवामानाच्या अंदाजानुसार सातार्‍यात किंवा कराड येथे हेलिकॉप्टरने उतरण्याचा निर्णय घेतला. सातार्‍यातील सैनिक स्कूल मैदानावरील हेलिपॅडवर सायंकाळी 4.45 वाजण्याच्या सुमारास त्यांचे हेलिकॉप्टर उतरले.

यावेळी जिल्हा प्रशासनाच्या वतीने त्यांचे स्वागत करण्यात आले. मुख्यमंत्री एकनाथ शिंदे यांचा ताफा शासकीय विश्रामगृहाकडे मार्गस्थ झाला. याठिकाणीही प्रशासनाच्या वतीने स्वागत करण्यात आले. त्यानंतर विश्रामगृहावर त्यांनी जिल्हातील अधिकार्‍यांशी व नागरिकांशी चर्चा केली. त्यानंतर त्यांचा ताफा सातारा शहरातून यवतेश्वर, कास मार्गे बामणोलीकडे रवाना झाला. बामणोलीतून तराफ्यातून दरे या गावी सायंकाळी उशिरा पोहोचले.

जिल्हा प्रशासनाचा कस…

मुख्यमंत्री जिल्हा दौर्‍यावर येणार हे समजताच बुधवारी रात्रीपासून महसूल, पोलिस, जिल्हा परिषद, सार्वजनिक बांधकाम, आरोग्य व अन्य विभागाच्या अधिकार्‍यांची तारांबळ उडाली. काही अधिकारी बुधवारी सायंकाळीच दरे येथे मुक्कामी पोहचले होते. तर विविध विभागाचे वरिष्ठ अधिकारी गुरुवारी सकाळीच खंडाळा येथे त्यानंतर दरे तर्फ तांब येथे गेले होते. मात्र मुख्यमंत्र्यांचा दौरा बदलल्याने त्यांना पुन्हा सातार्‍यात यावे लागले. मुख्यमंत्री आल्यावर पुन्हा त्यांच्याबरोबर दर्‍याकडे जावे लागले. त्यामुळे सर्व अधिकार्‍यांची चांगलीच तारांबळ उडाली.

प्रतिभा राजे

कराड :  नूतनीकरणानंतरही अनेक समस्यांनी ग्रस्त असणार्‍या स्व. यशवंतराव चव्हाण स्मृतिसदन (टाऊन हॉल)मध्ये असणार्‍या बुकिंग रूममध्ये गेल्या चार ते पाच वर्षांपासून गळती लागली आहे. पावसाळ्यात या रूममध्ये तळे साचत असून बुकिंग रूमच्या स्लॅबमधून पाणी पाझरत असते. त्यामुळे या स्लॅबचे लोखंडी पिलर गंजत चालले असून, या स्लॅबवर असणारा स्व. यशवंतराव चव्हाण यांच्या पुतळ्याला धोका निर्माण झाला आहे. कराडचे वैभव असणार्‍या टाऊन हॉलकडे नगरपालिकेचे अक्षम्य दुर्लक्ष होत असल्याने रंगकर्मी तसेच नागरिकांमधून तीव्र संताप व्यक्त केला जात आहे.

टाऊन हॉलमध्ये वर्षभरात विविध कार्यक्रम होत असतात. अनेक नाटके, विविध कार्यक्रम होणार्‍या या टाऊन हॉलला समस्यांनी ग्रासले आहे. मुळातच याठिकाणी अनेक सुविधांची वानवा आहे. महाराष्ट्राचे शिल्पकार स्व. यशवंतराव चव्हाण यांचा पुतळा ज्या इमारतीवर उभारण्यात आला आहे. त्या बुकिंग रूमची अवस्था दयनीय आहे. सुमारे 30 फूट असणार्‍या या रूममध्ये गेल्या चार ते पाच वर्षांपूर्वीपासून पावसाळ्यात गळती लागलेली आहे. या रूमच्या वर टाऊन हॉलमध्ये जाण्यासाठी पायर्‍या आहेत. या पायर्‍यांच्या मधोमध स्व. यशवंतराव चव्हाण यांचा पुतळा आहे. या पुतळ्याचा बराचसा भाग या बुकिंग रूमच्या स्लॅबवर आहे. बुकिंग रूममध्ये गेल्यावरच जुन्या हवेलीमध्ये प्रवेश केल्यासारखे वाटते. स्लॅबच्या गळतीमुळे भिंतींचा रंग तर उडालाच आहे. परंतु या भिंतीवरचे सिमेंटही खराब झाले आहे. रूममध्ये असणार्‍या लाईटच्या पाईप्स तुटलेल्या आहेत. लोखंडी पिलर तर अक्षरश: गंजून काही ठिकाणी फुटलेले आहेत. बुकिंग रूममधील कपाटाची अवस्था अत्यंत घाणेरडी झालेली आहे. जुन्या काळातील हे कपाट बदलून नवीन कपाट देणे पालिकेला शक्य झालेले नाही. टेबलला बँडेज केले आहेत, तर खुर्ची निकामी झालेली आहे. बुकिंग रूमच्या बाहेरच्या भिंतीलाही तडे गेलेले आहेत. दरवाजा मोडकळीत आलेला आहे. बाहेरून अत्यंत देखण्या दिसणार्‍या टाऊन हॉलच्या इमारतीमधील या बुकिंग रूमची अवस्था पाहिल्यावर पालिकेच्या कारभाराबाबत शंका उपस्थित होत आहे.

याबरोबरच टाऊन हॉलमध्ये अनेक असुविधा असून मेकअप रूममध्ये पाणी साचून राहते. बुकिंग रूम पुढच्या बाजूस असणे गरजेचे होते. मात्र आतील बाजूस असल्याने बुकिंगसाठी येणार्‍या लोकांना बुकिंगची रूम शोधावी लागते. हॉलमधील कॅन्टीनचीही तीच अवस्था आहे. कॅन्टीन शेजारीच स्वच्छतागृह असल्याने स्वच्छतागृहाची दुर्गंधी कॅन्टीनमध्ये येत असते.

30 फुटांपैकी 5 फूट सुस्थितीत

बुकिंग रूममधील 30 फुटांपैकी केवळ 5 फूट जागा बर्‍या अवस्थेत आहे. 25 फूट जागेत पावसाळ्यात बसणे म्हणजे शॉवरखाली बसण्यासारखी अवस्था असते. केवळ 5 फुटांची जागा शिल्लक आहे. त्या जागेवर बसून कर्मचारी कसेबसे जेवण करतात. रंगकर्मी, कर्मचार्‍यांनी अनेकदा पालिकेकडे या बुकिंगरूमच्या अवस्थेबाबत माहिती देऊन गळती काढण्याबाबतची मागणी केली आहे. तत्कालिन मुख्याधिकारी यशवंत डांगे यांनी दुरुस्ती केली होती. मात्र ती दुरुस्तीही तात्पुरती झाली होती. त्यानंतरही अनेकदा पालिकेला कळवूनही याकडे दुर्लक्ष केले आहे.

पायर्‍यांना गेलेत तडे

बुकिंग रूमच्यावरूनच टाऊन हॉलमध्ये जाण्यासाठी पायर्‍या आहेत. या पायर्‍यांना खालच्या बाजूने तडे गेलेले आहेत. ज्या सिमेंटच्या खांबावर या पायर्‍या उभ्या केल्या आहेत, त्या खांबालाही चिरा पडलेल्या आहेत.