महाबळेश्वर; पुढारी वृत्तसेवा : स्वातंत्र्य दिन व सलग आलेल्या सुट्ट्यांमुळे महाबळेश्वर पर्यटनस्थळी पर्यटकांची चांगलीच रेलचेल अनुभवायास मिळत आहे. पावसाची रिमझिम बरसात, कडाक्याची थंडी, हिरवागार निसर्ग अन् धुक्यात लपटलेले वातावरण, याचा पर्यटक मनमुराद आनंद घेताना दिसत आहेत. रिसॉर्टस्, लॉजिंगचे दर वाढले असून अनेकांनी आधीच रूम आरक्षित केलेल्या आहेत.

महाबळेश्वर व पाचगणीत वर्षा पर्यटनाचा माहोल असून महाबळेश्वरचा प्रसिद्ध लिंगमळा धबधबा दाट धुक्यात ओसंडून वाहत आहे. या धबधब्याचे विलोभनीय रूप पाहण्यासाठी पर्यटकांची तुफान गर्दी होत आहे. नौकाविहारासाठी प्रसिद्ध असलेले वेण्णालेक दाट धुक्यात हरवले आहे. वेण्णालेकसह क्षेत्र महाबळेश्वर मंदिर तसेच विविध पॉईंटवर पर्यटकांची रेलचेल आहे महाबळेश्वर, पाचगणी या पर्यटकांचे माहेरघर असलेल्या निसर्गरम्य पर्यटनस्थळी स्वातंत्र्य दिन व सलग आलेल्या सुट्ट्यांमुळे वर्षा पर्यटनासाठी पर्यटकांची रेलचेल आहे. हिरव्यागार वनश्रीने महाबळेश्वरचे रूप पूर्णपणे पालटले असून डोंगर कपारीतून उंचावरून वाहणारे धबधबे, दाट धुक्याची चादर पसरली आहे. या सुखद व रम्य वातावरणाची मजा लुटण्यासोबतच पावसात भिजण्याचा आनंद पर्यटक लुटत आहेत.

पाऊस व दाट धुक्यात पर्यटक वेण्णालेक येथे नौकाविहार करत असून अनेक हौशी पर्यटक घोडसवारी करताना दिसत आहेत. धुंद वातावरणात खवय्ये पर्यटक गरमागरम मका पकोडा, कांदा भजी, मका कणीस, आलेदार चहासह गरमागरम मॅगीचा आस्वाद घेताना पहावयास मिळत आहेत. मुख्य बाजारपेठेत गरमागरम चणे, चिक्की फजसोबतच उबदार ब्लँकेट, कानटोपी, मफलर, येथील प्रसिद्ध चप्पल्स खरेदीसाठी पर्यटकांची पावले बाजारपेठेकडे वळत आहेत.

सातारा; पुढारी वृत्तसेवा :  जिल्ह्याच्या सर्वांगीण विकासासाठी पालकमंत्री शंभूराज देसाई यांच्या मार्गदर्शनाखाली जिल्हाधिकारी जितेंद्र डुडी यांनी अत्यंत चांगला विकास आराखडा सादर केला आहे. या विकास आराखड्यामुळे जिल्ह्यातील पर्यटन क्षमता वृद्धिंगत होणार आहे. त्याद्वारे जिल्ह्यात रोजगार निर्मितीसाठी शासन सर्वतोपरी मदत करेल, अशी ग्वाही मुख्यमंत्री एकनाथ शिंदे यांनी दिली. सातारा जिल्ह्याच्या सर्वांगीण विकासासाठी तयार करण्यात आलेल्या आराखड्याचे सादरीकरण मुख्यमंत्री एकनाथ शिंदे यांच्यासमोर जिल्हाधिकारी जितेंद्र डुडी यांनी केले. यावेळी पालकमंत्री शंभूराज देसाई उपस्थित होते.

मुख्यमंत्री एकनाथ शिंदे म्हणाले, सातारा जिल्हा हा अत्यंत वैविध्यपूर्ण निसर्गसंपदा लाभलेला संपन्न जिल्हा आहे. या जिल्ह्याला 110 किलोमीटरचा कोयनेचा बॅकवॉटरचा पट्टा लाभला आहे. या जिल्ह्यात जंगले आहेत, प्राणी आणि पक्षी अभयारण्य आहे. मंदिरे, गड, किल्ले, धबधबे, पठारे आहेत. अशा स्थितीत पर्यटनाचा विकास झाल्यास जिल्ह्यातून नोकरी, धंद्यासाठी बाहेरगावी जाणार्‍या युवकाला आपल्याच मायभूमीत रोजगार मिळेल. या दृष्टीने जिल्ह्यातील पर्यटन वृद्धीच्या क्षमता ओळखून अत्यंत चांगला आराखडा जिल्हा प्रशासनाने तयार केला आहे. रोजगारानिमित्त इतर शहरात गेलेले तरुण पुन्हा आपल्या मायभूमीत परत यावेत, या उद्देशाने जिल्ह्याच्या पर्यटन विकासासाठी आवश्यक ती सर्व मदत शासनाच्या माध्यमातून दिली जाईल, अशी ग्वाही मुख्यमंत्र्यांनी यावेळी दिली.

मुख्यमंत्री शिंदे म्हणाले, अनेक वर्षापासून रखडलेल्या तापोळा पुलाचे काम युद्ध पातळीवर सुरू आहे. बामणोली ते दरे आणि आपटी ते तापोळा अशा दोन पुलांच्या कामांना मंजुरी देण्यात आली आहे. कोकण आणि पश्चिम महाराष्ट्र जोडण्यासाठी हे पूल अत्यंत महत्त्वाचे ठरतील आणि याचा फायदा पर्यटन वाढीलाही होईल. महाबळेश्वर ते तापोळा रस्त्याचे रुंदीकरण आणि मजबुतीकरण सुरू आहे. मुनावळे येथे पर्यटकांसाठी आकर्षण स्थळे विकसित करण्यासाठी निधी देण्यात आला आहे. रोजगारासाठी युवकांना उद्युक्त करण्यासाठी जिल्हा प्रशासन व शासन प्रयत्नशील असल्याचे मुख्यमंत्र्यांनी स्पष्ट केले.

संजीव कदम

सातारा : घरी जाण्यासाठी एस.टीची वाट पाहणार्‍या श्रावणी अहिवळे हिला बसमध्ये जागा पकडण्यासाठीच्या गर्दीने देवाघरी नेले. वाईच्या एस.टी. स्टँडमधील ही दुर्घटना काळजात कालवाकालव करून गेली. समाजमनाला सुन्न करणार्‍या या घटनेने अनेक प्रश्न उपस्थित केले. एस.टी.मध्ये जागा पकडण्यासाठी दररोज सुरू असणारी विद्यार्थी व प्रवाशांची जीवघेणी चढाओढ थांबणार आहे का?. श्रावणी गेली, आता उपाययोजनांचे कागदी घोडे नाचवले जातील, नुकसान भरपाईची तजवीज केली जाईल, श्रावणीच्या कुटुंबाला आधार देण्याचा प्रयत्नही होईल. पण, खरोखरच श्रावणी माघारी येणार आहे का? जीवघेणी गर्दी श्रावणीसारखे आणखी किती बळी घेणार आहे?

श्रावणीच्या किंकाळ्या कुणालाच का ऐकू आल्या नाहीत?

वाईच्या एस.टी. स्टँडवर शनिवारी घडलेली दुर्घटना काळजाचा ठाव चुकवणारी होती. लवकर शाळा सुटल्याने घरी जाण्यासाठी विद्यार्थ्यांनी वाई बसस्थानकात गर्दी केली होती. तर्कतीर्थ लक्ष्मणशास्त्री विद्यालयात इयत्ता सातवीत शिकणारी श्रावणी अहिवळे ही घराकडे जाणार्‍या बसची वाट पाहत उभी होती. गावाकडे जाणारी वाई-बालेघर ही बस लागल्यानंतर श्रावणी बसजवळ आली. मात्र, एस.टीत चढत असताना गर्दीमुळे ती खाली कोसळली अन् कायमची देवाघरी गेली. त्यावेळी तिच्या किंकाळ्या गर्दीत अन् बसमधील जागा पकडण्यासाठी सुरू असणार्‍या चढाओढीच्या वातावरणात विरून गेल्या. कुणालाही तिच्या किंकाळ्या ऐकू आल्या नाहीत. कारण त्या गर्दीतल्या प्रत्येकाला एस.टी.मध्ये बसण्यासाठी जागा पकडायची होती. श्रावणी जीवाच्या आकांताने बचावासाठी टाहो फोडत होती. पण कुणालाच काही समजत नव्हते. लाखमोलाचा जीव गर्दीमुळे हिरावून गेला. या दुर्घटनेने भेदरलेले वातावरण आता निवळेलही, पण श्रावणी परत येणार आहे का? त्या गर्दीला पश्चाताप होईलही, पण श्रावणीच्या आई-वडिलांना तळहाताच्या फोडाप्रमाणे जपलेला पोटचा गोळा पुन्हा मिळणार आहे का?. या घटनेतून विद्यार्थी व एसटी प्रशासन बोध घेणार आहे का?

तीन फुटांच्या दरवाजातून पाच-पन्नास जणांच्या घोळक्याची घुसखोरी

एस.टी.तील जागा पकडण्यासाठीची जीवघेणी रस्सीखेच जिल्ह्याच्या प्रत्येक बसस्थानकात रोजच पाहायला मिळते. ग्रामीण भागातील विद्यार्थी अगदी सकाळी 6 वाजल्यापासून शाळा, कॉलेजसाठी शहरात येत असतात. पुन्हा घरी माघारी जाताना लवकर पोहोचण्याची प्रत्येकालाच आस असते. विद्यार्थ्यांची एवढी गर्दी होते की बसमधील जागाही अपुरी पडते. मग सुरू होते ती जीवघेणी चढाओढ. विद्यार्थ्यांचा जथ्था जागा पकडण्यासाठी इरेला पेटतो. त्यातून अघटीत घडू लागले आहे.
जागा पकडण्यासाठी प्रत्येकजण इर्षेने बसमध्ये चढत असतो. त्यामुळे होणारी तुडूंब गर्दी दरवाजाच्या दिशेने धावत असते. एसटीच्या सुमारे तीन फुटाच्या दरवाजातून घुसण्यासाठी पाच-पन्नास जणांचा घोळका एकाचवेळी प्रयत्न करत असतो. एकमेकाला ढकलून, मागे ओढून जीवाच्या आकांताने प्रत्येकजण दरवाजातून आतमध्ये घुसत असतो. त्यातूनच श्रावणीसारखे काही जीव गेले आहेत. ही जीवघेणी चढाओढ थांबणार आहे की नाही? याचे उत्तर कोण देणार?

विभाग नियंत्रक निर्णय घ्या आता..

• बसमध्ये चढताना होणार्‍या गर्दीवर नियंत्रण ठेवता येईल का? विद्यार्थ्यांना शिस्त लागेल का?
• आलेले प्रवासी उतरल्यानंतरच एसटी फलाटावर लागेल का?
• विभाग नियंत्रक रोहन पलंगे यावर काय निर्णय घेणार? हे पहावे लागेल.

• एस.टी फलाटावर लागण्यापूर्वी बसमधून आलेले प्रवासी अगोदरच उतरवणे गरजेचे असते. मात्र, तसे होत नाही. बस थेट फलाटावर नेली जाते. त्यामुळे बसमधून उतरणारे प्रवासी व बसमध्ये घुसण्यासाठी प्रयत्न करणारे विद्यार्थी यांच्यात बाका प्रसंग उद्भवतो. अनेकदा उतरणार्‍या शेवटच्या चार ते पाच प्रवाशांना बसमध्ये घुसणारी गर्दी पुन्हा आत घेऊन जाते.
• वाई बसस्थानकातील दुर्घटना हा काही पहिला अपघात नव्हता. यापूर्वीही अशा घटना घडूनही त्यावर ठोस उपाययोजना झालेल्या नाहीत. दुर्घटनेच्या चौकशीचा फार्स करून काय उपयोग? घटनेची तीव्रता ओसरली की पुन्हा ‘ये रे माझ्या मागल्या’ हे सुरूच. हे कधी थांबणार आहे? एस.टी प्रशासन यावर विचार करणार आहे की नाही?