सातारा; पुढारी वृत्तसेवा : जिल्ह्यातील पुसेसावळी, ता. खटाव येथे सोशल मीडियावरील आक्षेपार्ह पोस्टमुळे उद्भवलेल्या हिंसाचाराच्या पार्श्वभूमीवर जिल्ह्यातील इंटरनेट सेवा तास बंद ठेवण्यात आली आहे. त्यामुळे शासकीय, निमसरकारी, खासगी कार्यालयांसह बँकांचे दिवसभराचे कामकाज कोलमडून गेले. बँकांचे ऑनलाईन व्यवहारही ठप्प झाले. दरम्यान, 72 तास इंटरनेट सेवा बंद राहणार असून कायदा व सुव्यवस्था राखण्यासाठी नागरिकांनी सहकार्य करावे, असे आवाहन जिल्हा पोलिस प्रशासनातर्फे करण्यात आले आहे.

पुसेसावळी येथील काही समाज कंटकांनी सोशल मीडियावर आक्षेपार्ह पोस्टवरून पुसेसावळी येथे रविवारी रात्री उशिरा तणावपूर्ण वातावरण निर्माण झाले. तसेच जाळपोळही करण्यात आली. परिसरात प्रचंड तणाव निर्माण झाल्यानंतर स्थानिक पोलिस प्रशासनाने परिस्थिती नियंत्रण आणली. मात्र, या घटनेचे पडसाद जिल्ह्यात उमटू नयेत, यासाठी जिल्हा प्रशासनाने खबरदारीसाठी या परिसरासह संपूर्ण जिल्ह्यातील इंटरनेट सेवा 72 तासांसाठी बंद ठेवली आहे.

सध्या बँकांसह सर्व शासकीय कार्यालये पेपरलेस झाली असून सर्वच कामकाज ऑनलाईन केले जाते. मात्र सोमवारी सकाळी अचानक इंटरनेट सेवा बंद झाल्याने सर्व शासकीय, निमशासकीय तसेच खासगी कार्यालयांमधील कामकाज विस्कळीत झाले. बँकांचे ऑनलाईन आर्थिक व्यवहार ठप्प झाल्याने नागरिकांना गैरसोयीला सामोरे जावे लागले. अचानक इंटरनेट बंद झाल्याने सर्वच कार्यालयांमध्ये गोंधळ उडाला. शासकीय कार्यालयांमध्ये कामासाठी आलेल्या नागरिकांना सर्व्हर बंदमुळे माघारी फिरावे लागले. दस्त नोंदणी, दाखले काढणे तसेच बँकेतील एनएफटी व चेक वटवणे ही कामेही बंदच राहिली.

ऑनलाईन पेमेंटही बंद असल्याने गैरसोय

कोरोना काळापासून नेट बँकिंग सुविधेचा मोठ्या प्रमाणावर वापर होत असून चहाच्या टपरीवरदेखीलऑनलाईन पेमेंटला प्राधान्य दिले जात आहे. नेट बँकिंग अंगवळणी पडल्याने अनेकांची खिशात पैसे ठेवायची सवयच मोडली आहे. सोमवारी मात्र नेट बंद झाल्याने ऑनलाई पेमेंटही बंद पडले. त्यामुळे अनेकांना रोख व्यवहार करावे लागले. परिणामी अनेकांची पंचाईत झाली. नागरिकांना दैनंदिन व्यवहारामध्ये कुठे उधारीवर तर कुठे उसनवारीवर निभवावे लागले.

शाळांबाहेर पालकांची गर्दी…

पुसेसावळीतील घटनेच्या पार्श्वभूमीवर जिल्हा बंदी होतोय की काय, अशी धास्ती पालकांमध्ये निर्माण झाली होती. शिक्षण अधिकार्‍यांनीही स्थानिक स्तरावर शाळा प्रशासनांना परिस्थितीनुसार शाळा बंद किंवा सुरू ठेवण्याचे निर्णय स्वातंत्र्य दिले. सातारा शहर व परिसरातील बहुतांश शाळांनी आपापल्या स्तरावर विद्यार्थ्यांना घेवून जाऊ शकता, असे पालकांना निरोप पाठवले होते. त्यामुळे दुपारपर्यंत शहरातील शाळांबाहेर पालकांची गर्दी झाली होती.

अस्वस्थ नेटकर्‍यांची त्रेधा

इंटरनेट जीवनशैलीचा अविभाज्य भाग बनला आहे. अनेकांच्या दिनचर्येचा शुभारंभच सोशल मीडियाने होतो. सकाळी उठल्या उठल्या मोबाईलवर व्हॉट्सअ‍ॅप, इन्स्टा, फेसबुक उघडल्याशिवाय दिवसाची सुरुवातच होत नाही. महत्वाचे निरोप, कामाचे नियोजनही या माध्यमातून होत असते. मात्र सोमवारी अशा नेटकर्‍यांची त्रेधा उडाली. इंटरनेट गंडलंय म्हणत अनेकांनी फोन दोन-तीनदा रिस्टार्ट केले, कोणी सीम काढून पाहिले. रविवारी रात्री पासून एकही अपडेट न पडल्याने नेटकर्‍यांमध्ये अस्वस्थता होती. सकाळी 11 पर्यंत सर्व चित्र स्पष्ट झाले अन् पुढील दोन दिवस इंटरनेटशिवाय रहावे लागणार असल्याची नेटकर्‍यांना खात्री पटली.

पुसेसावळी; पुढारी वृत्तसेवा : समाजमाध्यमावर प्रसिद्ध झालेल्या आक्षेपार्ह मेसेजवरून सातारा जिल्ह्यातील पुसेसावळीत दोन गटांत झालेल्या दंगलीत एकाचा मृत्यू झाला असून १० जण जखमी झाले आहेत. याप्रकरणी पोलिसांनी १९ जणांना अटक केली असून चौघांना ताब्यात घेतले आहे. नूरहसन लियाकत शिकलगार (वय ३२) असे ठार झालेल्याचे नाव आहे. संपूर्ण पुसेसावळी गावात कर्फ्यू लावण्यात आला आहे. जिल्ह्यातही १३ तारखेपर्यंत जमावबंदी आदेश लागू करण्यात आला आहे. घटनेचे पडसाद सातारा जिल्ह्यात उमटत असून सर्वत्र तणावपूर्ण शांतता आहे. इंटरनेट सेवा बंद करून पोलिसांनी परिस्थिती नियंत्रणात आणली आहे.

दंगलप्रकरणी ३९ जणांची नावे निष्पन्न झाली असून एकूण १०० संशयितांवर गुन्हा दाखल झाला आहे. त्यातील १९ जणांना अटक केली असून न्यायालयाने त्यांना ४ दिवसांची पोलिस कोठडी सुनावली आहे. तर आणखी ४ जणांना पोलिसांनी ताब्यात घेतले आहे.

याबाबत घटनास्थळावरुन मिळालेल्या माहितीनुसार, पुसेसावळी गावात काही दिवसांपूर्वी समाजमाध्यमांवर देवदेवतांच्या आक्षेपार्ह पोस्ट ठेवण्यात आल्या होत्या. याप्रकरणावरुन गावात गेले काही दिवस धुसफूस सुरु होती. त्यातच रविवारी सायंकाळी दोन युवकांच्या इन्स्टाग्राम या समाजमाध्यमावर महापुरुषांसंदर्भात आक्षेपार्ह पोस्ट आढळून आली. त्याला उत्तर देणारी पोस्ट लगेचच सोशल मीडियावर व्हायरल झाली. तद्नंतर मोठ्या प्रमाणावर जमाव जमला आणि दंगलीला सुरुवात झाली. जमावाने मोठ्या प्रमाणात तोडफोड करुन वाहने जाळली. व्यावसायिकांच्या हातगाड्यांची मोडतोड केली. त्यानंतर संतप्त जमाव मशिदीकडे गेला. तेथे उपस्थित असणार्‍या नागरिकांना जमावाकडून मारहाण करण्यात आली. जाळपोळ करणारा जमाव कमालीचा हिंस्त्र बनला. आरडाओरडा ऐकून मशिदीमधून काहीजण बाहेर आले. तेथे मशिदीतून बाहेर आलेल्यांवर संतप्त जमाव अक्षरश: तुटून पडला आणि हाणामारीला सुरुवात झाली. प्राथमिक माहितीनुसार फरशी, दांडकी, दगडांनी मारहाण करण्यात आली. यात नूरहसन लियाकत शिकलगार (वय 32) यांना गंभीर दुखापत झाल्याने त्यांचा मृत्यू झाला. याशिवाय इतर दहाहून अधिक जण जखमी झाले. यामध्ये अब्दुल कादर जैलानी (वय 55), वसीम बालम मुल्ला (वय 30, दोघे रा. वाघेरी, ता. कराड), सरफराज ईलाही बागवान (वय 45), सोहेल नजीर बागवान (वय 22), अमन असिफ बागवान (वय 20), समीर ईलाही बागवान (वय 50), अस्लम बाबासाहेब शेख (वय 32), अकिल नजीर इनामदार (वय 40), इस्माईल बशिर बागवान (वय 33), सैफअली हारुण बागवान (वय 29, सर्व रा. पुसेसावळी, ता. खटाव) अशी जखमींची नावे आहेत. सर्व जखमींवर सातारा व कराड येथे उपचार सुरु आहेत.

या घटनेची माहिती मिळताच औंध पोलिसांनी तत्काळ घटनास्थळी धाव घेऊन परिस्थिती नियंत्रणात आणली. मात्र, अचानक जमाव वाढल्याने परिस्थिती हाताबाहेर गेली. त्यानंतर तातडीने सातारा जिल्हा पोलिसांकडून मोठ्या प्रमाणावर पोलिस कुमक पाठवण्यात आली. पोलिसांनी शांततेचे आवाहन करत जमाव पांगवला. रात्रभर पोलिसांनी गस्त केली. जिल्हा पोलिस अधिक्षक समीर शेख स्वत: घटनास्थळी राहिले. संपूर्ण रात्रभर ते ठाण मांडून होते. यावेळी त्यांच्यासोबत अप्पर पोलिस अधिक्षक बापू बांगर, डी. वाय. एस. पी. अश्विनी शेंडगे व अन्य अधिकारीही तळ ठोकून होते. विभागातील सर्व पोलिस ठाण्यांचे प्रभारी, राखीव फोर्सने परिस्थितीवर नियंत्रण ठेवले आहे. सद्यस्थितीला पुसेसावळीतील परिस्थिती नियंत्रणात असून सर्वत्र तणावपूर्ण शांतता आहे.

पुसेसावळीतले वातावरण तणावपूर्ण असून गावात कर्फ्यू लावण्यात आला आहे. अफवांवर विश्वास न ठेवण्याचे आवाहन करण्यात आले आहे.

• जिल्ह्यातील इंटरनेट सेवा ७२ तास बंद राहणार
• छत्रपती उदयनराजे यांचे एकोप्याचे आवाहन
• जिल्ह्यात १३ तारखेपर्यंत जमावबंदी आदेश
• अफवांवर विश्वास न ठेवण्याचे पोलिसांचे आवाहन
• अ‍ॅड. देशपांडे व सामाजिक संघटनांचा आज सातारा बंद