सातारा : साताऱ्यात रिक्षा चालकाने महिला पोलीस कॉन्स्टेबलला फरफटत नेल्याची घटना घडली. साताऱ्यातील मध्यवर्ती ठिकाणी असलेल्या खंडोबा माळपासून मार्केट यार्डपर्यंतचा हा थरार सीसीटीव्हीमध्ये कैद झाला आहे. या घटनेत महिला पोलीस कॉन्स्टेबल रक्तबंबाळ झाली असून तिच्यावर उपचार सुरू आहेत. दारुच्या नशेत टल्ली झालेल्या रिक्षावाल्याला अटकाव करताच चालकाने हे कृत्य केल्याची प्राथमिक माहिती समोर येत आहे.

महिला पोलिसाला फरफटत नेणाऱ्या रिक्षा चालकाला पकडून नागरिकांनी चोप दिला. नंतर या ठिकाणी पोलीस आल्यानंतर त्यांनी त्या रिक्षाचालकाला अटक केली. या घटनेमुळे साताऱ्यात एकच खळबळ उडाल्याचं दिसून आलं.

दारु पिऊन रिक्षा चालवली

दारुच्या नशेत माळाचा ओढा परिसरात बेभान झालेल्या रिक्षाचालकाने अनेक वाहनांना धडक दिल्याची माहिती वाहतूक पोलिसांना मिळाली. भाग्यश्री जाधव या महिला पोलीस कॉन्स्टेबल यांनी रिक्षाचा पाठलाग करत या रिक्षा चालकाला अडविण्याचा प्रयत्न केला. मात्र रिक्षा चालकाने कॉलर पकडत हिसका देऊन त्यांना खाली पाडले.

या झटापटीत महिला कॉन्स्टेबलचा रेनकोट रिक्षाचा मागील अँगलमध्ये अडकला. त्यानंतर रिक्षासोबत महिला पोलीस कॉन्स्टेबल 200 मीटर हून अधिक फरफटत गेल्याची धक्कादायक घटना घडली. हा संपूर्ण थरार साताऱ्यातील मध्यवर्ती ठिकाण म्हणजेच खंडोबाचा माळ येथून मनाली कॉर्नरपर्यंत घडला. या रस्त्यांवर असलेल्या दुकानांमधील सीसीटीव्हीत ही घटना कैद झाली आहे.

जमावाकडून रिक्षा चालकाला चोप

या घटनेत ती महिला कॉन्स्टेबल चांगलीच जखमी झाली असून ती रक्तबंबाळ झाल्याचं दिसून आलं. दरम्यान त्या रिक्षाचालकाने तीन ते चार गाड्यांनाही धडक दिली. महिला कॉन्स्टेबलला फरफटत नेत असताना त्या रिक्षाचालकाला अडवण्यासाठी काही नागरिकांनी प्रयत्न केला. नागरिकांनी त्या रिक्षाचालकाला पकडलं आणि चांगलाच चोपही दिला.

महिला कॉन्स्टेबलला उपचारासाठी रुग्णालयात दाखल

या घटनेची माहिती मिळताच सातारा पोलिसांनी घटनास्थळी धाव घेतली. त्यांनी आरोपीला ताब्यात घेतलं आणि त्याच्याविरोधात गुन्हा नोंद केला. तसेच जखमी महिला कॉन्स्टेबलला उपचारासाठी रुग्णालयात दाखल करण्यात आलं असून तिची प्रकृत्ती सध्या स्थिर आहे. 

आणखी वाचा

सातारा : राज्यात मुसळधार पाऊस सुरू असून मुंबईसह (mumbai) विविध जिल्ह्यात पावसाने धुमाकूळ घातला आहे. पावसामुळे जनजीवन विस्कळीत झाले असून मुंबईतील रस्त्यांना वाहत्या नद्यांचे रुप आल्याचं दिसून येत आहे. मराठवाडा, विदर्भात मुसळधार पावसामुळे (Rain) शेती पिकांचे आणि बळीराजाचे मोठं नुकसान झालं आहे. नदीच्या प्रवाहात जनावरे वाहून गेली असून शेतातही पाणीच पाणी झाल्याने बळीराजाला अतिवृष्टीचा फटका बसल्याचं चित्र दिसून येत आहे. त्याच पार्श्वभूमीवर राज्यात ओला दुष्काळ जाहीर करावा, अशी मागणी शरद पवारांच्या राष्ट्रवादी काँग्रेसचे प्रदेशाध्यक्ष शशिकांत शिंदे (Shashikant shinde) यांनी केली आहे. तसेच, सरकारने विशेष अधिवेशन बोलवून शेतकऱ्यांना मदत द्यावी, असेही त्यांनी म्हटलं आहे.  

राज्यात ओला दुष्काळ जाहीर करावा या मागणीसाठी तात्काळ विशेष अधिवेशन घेण्याची मागणी शरद पवार पक्षाचे प्रदेशाध्यक्ष शशिकांत शिंदे यांनी केला आहे. राज्यात विदर्भ, मराठवाडा तसेच पश्चिम महाराष्ट्रातील अनेक भागात अतिवृष्टी झाली आहे. मात्र, अद्याप पंचनामे देखील झालेले नाहीत. ज्या ठिकाणचे पंचनामे झाले आहेत त्यांना अद्याप मदत झालेली नाही. त्यामुळे, राज्य सरकारने तात्काळ ओला दुष्काळ जाहीर करुन एकरी 50 हजारांची मदत करावी, अशी मागणी आमदार शशिकांत शिंदे यांनी केली आहे. 

शेतकऱ्यांना सोबत घेऊन आंदोलन उभारू 

महायुती सरकारची घोषणाच कर्जमाफीची होती. मात्र, मुख्यमंत्री देवेंद्र फडणवीस म्हणतायत वेळ आली तर कर्जमाफी करू, महसूलमंत्री चंद्रशेखर बावनकुळे यांनी सरसकट कर्जमाफी करता येत नाही, असं वक्तव्य केलं आहे. त्यामुळे, जर सरकारने लवकरच सरसकट कर्जमाफीची घोषणा केली नाही तर आम्ही शेतकऱ्यांना सोबत घेऊन मोठं आंदोलन उभारू, असा इशारा शशिकांत शिंदे यांनी दिला आहे.

आपत्ती व्यवस्थापन विभागात मुख्यमंत्री 

दरम्यान, मुख्यमंत्री देवेंद्र फडणवीस हे राज्यातील पावसाचा आढावा घेण्यासाठी आपत्ती व्यवस्थापन विभागात येऊन पाहणी केली. राज्यातील विविध भागात जी अतिवृष्टी होत आहे त्यात कंट्रोल रुममधून संवाद साधला. यावेळी, विभागीय आयुक्त, जिल्हाधिकारी उपलब्ध होते. राज्यात दोन दिवसांपासून अतिवृष्टी होते आहे, 18 ते 21 ऑगस्टमध्ये पाऊस अधिक असणार आहे. त्यामुळे, काही जिल्ह्यात रेड अलर्ट आणि ऑरेंज अलर्ट आहे. अंबा जगबुडी नदी इशारा पातळीपर्यंत पोहचली आहे, वशिष्टी नदीवर देखील लक्ष ठेऊन आहे. तापी आणि हतनूरला अधिक पाणी आल्याने रावेरमध्ये पाणी शिरलंय. तसेच, जळगाव सर्वाधिक अफेक्टेड आहे, पुणे जिल्ह्यात सर्वच धरणात चांगले पाणी आहे, अशी माहिती मुख्यमंत्र्‍यांनी दिली. 

आदिती तटकरेंचंही आवाहन

भारतीय हवामान खात्याने दिलेल्या सूचनेनुसार मुंबई महानगर व परिसरात पुढील 3-4 तास अतिमुसळधार पाऊस पडण्याची दाट शक्यता आहे. 
या पार्श्वभूमीवर सर्व मुंबईकरांना कळकळीची विनंती, आपण सर्वांनी आवश्यक ती काळजी घ्यावी, शक्यतो घराबाहेर जाणे टाळावे. आपत्कालीन परिस्थितीत मदतीसाठी बृहन्मुंबई महानगरपालिकेच्या मुख्य नियंत्रण कक्षातील 1916 या मदत सेवा क्रमांकावर संपर्क साधावा, असे आवाहन मंत्री आदिती तटकरे यांनी केले आहे. 

आणखी वाचा

Maharashtra Weather Update : सातारा जिल्ह्यातील घाटमाथ्यावर रेड अलर्ट देण्यात आला आहे. सातारा जिल्ह्यातील पश्चिम भागामध्ये असलेल्या घाट माथ्यावर गेले दोन दिवसापासून मुसळधार पाऊस (Weather Update) सुरू झाला असून या भागातील धरण परिसरामध्ये मोठा पाऊस झाला आहे. त्यामुळे या धरणातून पाण्याचा विसर्ग नदीपात्रात सुरू करण्यात आला आहे. तसेच महाराष्ट्राची भाग्यलक्ष्मी म्हणून ओळखल्या जाणाऱ्या कोयना धरणातून 12 हजार 100 क्यूसेस पाण्याचा विसर्ग सुरू करण्यात आला आहे.

तर दुसरीकडे, धोम-बालकवडी धरणातून 2,330 क्यूसेक, धोम धरणातून 2, 268 क्यूसेक पाणी सोडले जात आहे. कनेर धरणातून 740 क्यूसेक विसर्ग सुरू आहे. त्यामुळे जिल्हा प्रशासनाने नागरिकांना सतर्कतेचा इशारा दिला आहे. परिणामी नदीनाल्यांच्या काठावरील नागरिकांनी सतर्क राहावे, नदी पात्रात जाण्याचे टाळावे आणि प्रशासनाच्या सूचनांचे काटेकोर पालन करावे. असा इशारा देखील यावेळी नागरिकांना देण्यात आला आहे.

कोल्हापूर जिल्ह्यातील सर्वच नद्या दुथडी, 32 बंधारे पूर्णपणे पाण्याखाली

अशातच, कोल्हापूर जिल्ह्यामध्ये गेल्या 24 तासांपासून पावसाचा जोर वाढला आहे. त्यामुळेच पंचगंगा नदीच्या पाणी पातळीत वाढ होत आहे. सध्या पंचगंगा नदीची पाणी पातळी 29 फूट पाच इंच इतकी आहे. तर आणखी एक फूट पाणी पातळी वाढल्यास पंचगंगा पुन्हा एकदा पत्राच्या बाहेर पडू शकते. दरम्यान, घाटमाथ्यावर पावसाचा जोर प्रचंड वाढला आहे. त्यामुळेच राधानगरी धरणाचे सातही स्वयंचलित दरवाजे उघडले आहेत. यंदाच्या पावसाळ्यामध्ये पहिल्यांदाच राधानगरी धरणाचे सात स्वयंचलित दरवाजे उघडले. त्यामुळे भोगावती नदीपात्रामध्ये पाण्याचा मोठ्या प्रमाणात विसर्ग होत आहे. परिणामी, जिल्हा प्रशासनाने भोगावती नदीकाठच्या गावांना सतर्कतेचा इशारा दिला आहे. कोल्हापूर जिल्ह्यातील सर्वच नद्या दुथडी भरून वाहत असल्याने सुमारे 32 बंधारे पूर्णपणे पाण्याखाली गेले आहेत.

सिंधुदुर्ग जिल्ह्यातील कणकवलीत सर्वाधिक पावसाची नोंद

सिंधुदुर्ग जिल्ह्यात पावसाचा जोर वाढला आहे. कालपासून झालेल्या मुसळधार पावसामुळे नद्यांच्या पाणी पातळीत कमालीची वाढ झाली होती. मात्र आता कणकवलीमध्ये कोसळणाऱ्या मुसळधार पावसामुळे गडनदीने इशारा पातळी ओलांडली असून नदीचे पाणी कणकवली-मालवण राज्य मार्गांवर आल्याने वाहतूक विस्कळीत झाली आहे. काही वाहन चालक त्याच पाण्यातून वाट काढत जातं आहेत. जिल्ह्यात आज देखील ऑरेंज अलर्ट जारी करण्यात आला आहे. त्यामुळे नागरिकांनी सतर्क राहवं, असं आवाहन जिल्हा प्रशासनाच्या वतीने करण्यात आलं आहे. गेल्या 24 तासांत 86 मी.मी. सरासरी जिल्ह्यात पाऊस कोसळला असून सर्वाधिक पाऊस 172 मी.मी पाऊस कणकवलीत कोसळला आहे.

कुंभी आणि वारणा धरणातून विसर्ग वाढणार

दुसरीकडे, वारणा धरणाच्या पाणलोट क्षेत्रामध्ये  होत असलेल्या पावसाच्या प्रमाणात वाढ झाल्याने धरणाच्या पाणी पातळीत होणारी वाढ  होत आहे. जलाशय परिचलन सूची प्रमाणे धरणाची पाणी पातळी नियंत्रीत ठेवण्यासाठी आजपासून सकाळी 10 वाजता वक्र द्वाराद्वारे 5000 क्युसेक विसर्ग  सुरू करण्यात येत आहे व विद्युतगृहातून सोडण्यात आलेल्या विसर्गात वाढ करून तो 1630 क्युसेक असून एकूण  6630 क्युसेक विसर्ग वारणा नदीपात्रात सोडण्यात येणार आहे. परिस्थितीनुसार विसर्ग सुरू करण्यात येईल.

दरम्यान, कुंभी धरणाच्या पाणलोट क्षेत्रामध्ये जोरदार अतिवृष्टी होत असल्याने धरणाच्या पाणी पातळीत वाढ होत आहे. कुंभी धरणातूनही आज वक्रद्वाराद्वारे 1000  क्युसेक व विद्युतगृहातून चालू असणारा 300 क्युसेक असा एकूण 1300 क्युसेक विसर्ग कुंभी नदीपात्रात सोडण्यात येणार आहे, त्यामुळे नदीच्या पाणी पातळीमध्ये वाढ होणार आहे.

इतर महत्वाच्या बातम्या 

आणखी वाचा