फलटण | प्रतिनिधी :- फलटण कृषी उत्पन्न बाजार समितीने गाळेधारकांवर लादलेली अन्यायकारक भाडेवाढ तात्काळ रद्द करण्याची मागणी करत आजपासून गाळेधारकांनी तहसील कार्यालयासमोर बेमुदत साखळी उपोषणाला सुरुवात केली आहे. गाळे बंद ठेवत आणि शहरातून पायी चालत गाळेधारकांनी प्रशासनाचा निषेध केला.

या आंदोलनाला पाठिंबा दर्शवण्यासाठी माजी खासदार रणजितसिंह नाईक निंबाळकर व आमदार सचिन पाटील उपस्थित होते. यावेळी रणजितसिंह नाईक निंबाळकर यांनी ठामपणे सांगितले की, “या भाडेवाढीविरोधातील लढ्यात आम्ही गाळेधारकांच्या पाठीशी खंबीरपणे उभे आहोत. एकाही गाळेधारकाच्या गाळ्याला धक्का लागू देणार नाही.”

गाळेधारकांचा संयम संपत चालला आहे – संघर्ष समिती आक्रमक

फलटण तालुका संघर्ष समितीचे अध्यक्ष ॲड. नरसिंह निकम यांनी तीव्र शब्दात बाजार समितीच्या कारभारावर टीका केली. “गाळेधारकांचे हित कधीच पाहिले गेले नाही, संचालक मंडळ त्यांचा आवाज दाबण्याचा प्रयत्न करत आहे,” असा आरोप त्यांनी केला. त्यांनी इशारा दिला की, “जर भाडेवाढ रद्द झाली नाही, तर दिवाळीतसुद्धा आंदोलन अधिक आक्रमक पद्धतीने चालू राहील.”

“उपोषणकर्त्यांना न्याय मिळाल्याशिवाय माघार नाही”

श्रीमंत मालोजीराजे नाईक निंबाळकर यांच्या पुतळा परिसरात उपोषण सुरू असून, तेथे न्याय मिळाल्याशिवाय माघार घेतली जाणार नाही, असे आंदोलकांचे म्हणणे आहे. रणजितसिंह नाईक निंबाळकर यांनी बाजार समितीच्या चेअरमनला गाळेधारकांना न्याय देण्याचे आवाहन करत म्हटले की, “दिवाळी आनंदाने साजरी व्हावी, यासाठी तोडगा लवकर काढा, अन्यथा शिमग्याला निमंत्रण मिळेल.”

उपस्थित मान्यवर – एकतेचा निर्धार

या उपोषणस्थळी माजी नगरसेवक अशोकराव जाधव, कृषी उत्पन्न बाजार समितीचे माजी संचालक सिराजभाई शेख, आमिरभाई शेख, शंकरराव उर्फ बंडू कदम यांच्यासह अनेक गाळेधारक उपस्थित होते. सर्वांनी एकमुखाने भाडेवाढीविरोधात आवाज उठवत संघर्ष अधिक तीव्र करण्याचा निर्धार व्यक्त केला.
गाळेधारकांचा हा लढा केवळ भाडेवाढीविरोधात नाही, तर त्यांच्या हक्कांसाठीचा आहे. बाजार समितीने याचा गांभीर्याने विचार करून तात्काळ निर्णय घेणे गरजेचे आहे, अन्यथा हे आंदोलन अजून तीव्र होण्याची शक्यता आहे.

➤ २८ ऑक्टोबरला पुण्यात चर्चेसाठी बैठक बोलावलेली असतानाही उपोषणाची भूमिका बेकायदेशीर – श्रीमंत रघुनाथराजे यांचा आरोप

फलटण,फलटण कृषी उत्पन्न बाजार समितीच्या गाळे भाडेवाढीविरोधात काही व्यापाऱ्यांनी पुकारलेल्या उपोषणावर सभापती श्रीमंत रघुनाथराजे नाईक निंबाळकर यांनी तीव्र शब्दात टीका केली आहे. आज आयोजित केलेल्या पत्रकार परिषदेत बोलताना त्यांनी हे उपोषण ‘राजकीय स्टंट’ असून, संस्थेची बदनामी करण्याचा प्रयत्न असल्याचा आरोप कागदपत्रांसह केला.

श्रीमंत रघुनाथराजे म्हणाले, “पणन मंत्री जयकुमार रावळ यांच्या सूचनेनुसार, भाडेवाढीबाबत चर्चा करण्यासाठी २८ ऑक्टोबर रोजी पुण्यात सर्व संबंधित घटकांची बैठक पणन संचालकांनी बोलावलेली आहे. असे असताना उपोषण करणे हे केवळ संस्थेवर बेकायदेशीर दबाव टाकण्याचा प्रयत्न आहे.”

📁 उपोषणकर्त्यांचा बाजार समितीशी थेट संबंध नाही – सभापतींचा दावा

यावेळी त्यांनी उपोषणामागील व्यक्तींची पार्श्वभूमी उघड करताना सांगितले, “उपोषणाचे नेतृत्व करणाऱ्यांचा बाजार समितीत एकही गाळा नाही, तसेच ते मूळचे फलटणचे रहिवासीदेखील नाहीत. बहुसंख्य गाळेधारकांनी भाडेवाढीचे करार मान्य केल्याची फाईल आमच्याकडे आहे. हा प्रकार पूर्णपणे राजकीय हेतूने केला जात आहे.”

🏗️ ‘माणुसकी दाखवली, तरीही आंदोलन’

सभापती श्रीमंत रघुनाथराजे यांनी यावेळी अनेक गाळे अनधिकृतपणे उभारण्यात आले असल्याचेही निदर्शनास आणून दिले. त्यांनी सांगितले, “काही गाळे तर बाजाराच्या प्रवेशद्वारावर आणि जनावरांच्या बाजारात बांधले आहेत. आम्ही कठोर कारवाई करू शकलो असतो, मात्र कोणाचाही संसार उद्ध्वस्त होऊ नये म्हणून माणुसकी दाखवली. आम्ही कोणाचेही वैरी नाही.”

🌾 ‘शेतकऱ्यांच्या हितासाठी उत्पन्न वाढ आवश्यक’

ते पुढे म्हणाले, “बाजार समितीला शासनाकडून कोणतेही अनुदान मिळत नाही. त्यामुळे संस्थेचा विकास आणि शेतकऱ्यांच्या हितासाठी उत्पन्न वाढवणे गरजेचे आहे. आम्ही वरच्या मजल्यावर ‘अॅग्रीकल्चरल इन्फॉर्मेशन ट्रान्सक्रिप्शन हॉल’ उभारत आहोत. यामध्ये शेतकऱ्यांना निर्यातीचे आणि आधुनिक शेतीचे प्रशिक्षण दिले जाईल.”

❓ “विकास करायचा की राजकारणात अडकायचं?”

शेवटी श्रीमंत रघुनाथराजे यांनी सवाल केला की, “संस्थेच्या विकासासाठी काम करायचे की अशा राजकीय दबावाला बळी पडायचे?”

.