Udayanraje Viral Video : सातारा म्हटलं तर सर्वात आधी नाव येतं ते खासदार उदयनराजेंचं. पक्ष कोणताही असो, उदयनराजेंचा दरारा आणि दबदबा कायम आहे. त्यामुळेच ते राष्ट्रवादीतून तीन वेळा आणि भाजपमधून दोन वेळा खासदार झालेत. उदनयराजेंनी केलेली अनेक वक्तव्यं व्हायरल होतात, त्यांची स्टाईलही हटके असते. त्यांचा असाच एक जुना व्हिडीओ व्हायरल होत आहे, त्यामध्ये उदयनराजेंनी साताऱ्यातील (Satara) रस्त्यांच्या अवस्थेला सरकार नव्हेत तर थेट वृक्षतोड, ग्लोबल वॉर्मिंग कारणीभूत असल्याचं सांगितलं.

आपण झाडे तोडली, म्हणून कधीही धो धो पाऊस पडतोय, कुठेही पूर येतोय आणि रस्ते वाहून जातात असा अजब युक्तिवाद उदयनराजेंनी केला. पाऊस पडल्यामुळे रस्ते वाहून जातात हे खरं आहे… पण त्याला निकृष्ट दर्जाची कामं, त्यातील भ्रष्टाचार, नेते-अधिकारी-कंत्राटदाराची भ्रष्ट साखळी जबाबदार नसून तुम्ही आम्ही जबाबदार असल्याचं अप्रत्यक्षपणे उदयनराजेंनी म्हटल्याचं दिसतंय.

Satara Election : सरकारचं अपयश नाही

साताऱ्यातील रस्त्यांची झालेली चाळण हे सरकारचे अपयश नाही तर त्याला तुम्ही आम्ही कारणीभूत आहोत. आपण झाडे तोडली, त्यामुळे कधीही पाऊस पडतोय आणि रस्ते धुऊन जातात असं उदयनराजेंनी म्हटलं. त्यामुळे प्रत्येकाने जबाबदारीने वागलं पाहिजे आणि झाडे जगवली पाहिजेत असंही ते म्हणाले.

Udayanraje On Satara Road : तुझं कंबरडं मोडलंय का?

यंदाच्या पहिल्याच पावसात साताऱ्यातील रस्ते वाहून गेले. ठिकठिकाणी खड्ड्यांचं साम्राज्य दिसत होतं. रस्त्यांच्या झालेल्या चाळणीमुळे अनेकांचं कंबरडं मोडलं, अनेकांना दुखण्याचा त्रास सुरू झाला. त्यामुळे लोकही वैतागले आहेत. त्यावर साताऱ्यातील एका स्थानिक पत्रकाराने उदयनराजेंना प्रश्न विचारला. सातारा शहरातील रस्त्यांची अवस्था पाहिली तर सातारकरांचं कंबरडं मोडलं आहे, त्यावर लोक सोशल मीडियावर व्यक्त होत आहेत असं तो म्हणताच उदयनराजेंनी त्यावर ‘तुझं कंबरडं मोडलंय का?’ असा प्रश्न केला.

Udayanraje On Satara : नेमकं काय म्हणाले उदयनराजे?

साताऱ्यातील रस्त्याच्या प्रश्नावर बोलताना उदयनराजे म्हणाले की, “साताऱ्यातील रस्ते धुऊन जातात याला कारणीभूत सरकार नाही. याला कारणीभूत तुम्ही-आम्ही आहोत. तुम्ही जो मला प्रश्न विचारला त्यापेक्षा गंभीर प्रश्न मी तुम्हाला विचारतो. पहिला 3 किंवा 4 जूनला पाऊस पडत होता, आता पडतोय का? ज्या वृक्षांमुळे तुम्ही आम्ही जिवंत आहोत, त्या वृक्षांची तुम्ही तोड केली. आज कधीही गारपीट पडते, पूर येतो, नुकसान होतं, एवढा धो-धो पाऊस कधीही पडतो. त्यामुळे प्रत्येकाने जबाबदारीने वागलं पाहिजे, झाडं जपली पाहिजेत. या गोष्टी काही एका दिवसात होत नाहीत.“

Udayanraje On BJP : भाजपमध्ये सर्वसामान्यांना संधी

उदयनराजे फक्त एवढ्यावरच थांबले नाहीत. साताऱ्यातील रस्त्याच्या प्रश्नावर बोलताना त्यांनी थेट विरोधकांवर टीका केली. ते म्हणाले की, “भारतीय जनता पक्षाचा खासदार म्हणून मी बोलत नाही, तर एक व्यक्ती म्हणून बोलतोय. या आधी पश्चिम महाराष्ट्रातील लोकानी ज्यांना संधी दिली त्यांनी किती लक्ष दिलं? निवडणुका आल्या की लोकांपुढे जायचं आणि सांगायचं की आम्ही हे करतो, ते करतो.”

आज भारतीय जनता पक्षाच्या माध्यमातून सामान्यातील सामान्य कार्यकर्त्याला संधी मिळाली. या आगोदर काय व्हायचं? मी शिफारस करायची आणि कुणाला तरी तिकीट मिळायचं अशी पद्धत होती, असंही उदयनराजे म्हणाले.

Satara Udayanraje Video : व्हिडीओ एक महिन्यापूर्वीचा

खासदार उदयनराजेंचा व्हायरल होणारा हा व्हिडीओ एक महिन्यापूर्वीचा असल्याची माहिती समोर येत आहे. दिवाळीच्या दरम्यान एका स्थानिक पत्रकाराच्या प्रश्नांना उत्तर देताना उदयनराजेंनी वरील वक्तव्य केलं. नगरपालिका निवडणुकीच्या पार्श्वभूमीवर विरोधकांकडून आता तो व्हिडीओ व्हायरल केला जात असल्याची चर्चा आहे.

Satara Problems : साताऱ्यात शिक्षण, रोजगाराच्या संधीचा अभाव

साताऱ्यामध्ये एमआयडीसी आणि शिक्षणाचा अभाव हे दोन मुद्दे सर्वाधिक गंभीर आहेत. साताऱ्यात गुणवत्तापूर्ण शिक्षणाचा अभाव असल्याने विद्यार्थ्यांना शेजारच्या पुण्याला जावं लागतं. त्याचसोबत औद्योगिकीकरण झालं नसल्यानेही युवकांना नोकरीसाठीही पुण्यात जावं लागलं. त्यामुळे खासदार उदयनराजे आणि जिल्ह्यातील मंत्र्यांनी, आमदारांनी या दोन गोष्टींवर काम करावं अशी मागणीही सातत्याने होत आहे.

ही बातमी वाचा:

आणखी वाचा

मुंबई : दोन दिवसांपूर्वी मुंबई क्रिकेट असोसिएशनच्या अध्यक्षांची निवड झाली, तेव्हा नवनिर्वाचित अध्यक्ष अजिंक्य नाईक यांनी राष्ट्रवादीचे सर्वेसर्वा शरद पवार (Sharad pawar) आणि मुख्यमंत्री देवेंद्र फडणवीस (Devendra Fadnavis) यांचे आभार मानले. कारण, या दोन्ही नेत्यांनी एमसीए निवडणुकीत त्यांना मदत केली होती. विशेष म्हणजे याच निवडणुकीसंदर्भाने भाष्य करताना शरद पवारांनी मुख्यमंत्री फडणवीस यांचे कौतुकही केले होते. आता, साताऱ्यातील (Satara) एका लग्नसोहळ्यात शरद पवार आणि देवेंद्र फडणवीस एकत्र आल्याचं पाहायला मिळालं. त्यांच्यासमवेत उद्योगपती गौतम अदानी हेही या लग्नसोहळ्याला हजर होते. सोशल मीडियावर या तीन दिग्गजांचे फोटो व्हायरल होत आहेत. तर, स्वत: शरद पवारांनीही सोशल मीडियातून माहिती दिली.

आयपीएस अधिकारी प्रवीण रामराव पवार यांची कन्या प्राजक्ता व हिमांशू यांच्या लग्न समारंभास उपस्थित राहिलो; नवदाम्पत्यास शुभाशीर्वाद दिले. याप्रसंगी राज्याचे मुख्यमंत्री देवेंद्र फडणवीस व पक्षाचे प्रदेशाध्यक्ष, आमदार शशिकांत शिंदे हेदेखील उपस्थित होते, अशी माहिती शरद पवार यांनी आपल्या फेसबुक पोस्टवरुन दिली आहे. या फोटोमध्ये एका सोफ्यावर शरद पवार आणि उद्योगपती गौतम अदानी बसलेले आहेत. तर, बाजुलाच मुख्यमंत्री देवेंद्र फडणवीस आणि राष्ट्रवादी काँग्रेस शरदचंद्र पवार पक्षाचे प्रदेशाध्यक्ष शशिकांत शिंदे हेही बसल्याचं दिसून येत आहे. विशेष म्हणजे शरद पवारांनी शेअर केलेल्या या फोटोवर नेटीझन्स कमेंट करुन मजा घेत आहेत. तुमच्या पोस्टमध्ये गौतम अदानींचा का उल्लेख केला नाही? असा सवाल कमेंट करुन विचारला जात आहे.

दिग्गजांना जोडणारं शरद पवाराचं राजकारण 

दरम्यान, शरद पवार यांचे सर्वपक्षीय नेत्यांसमवेत मैत्रीपूर्ण संबंध आहेत. मात्र, राजकीय विरोधक म्हणून ते सत्ताधारी व भाजपवर सातत्याने टीकाही करतात. यापूर्वी मुख्यमंत्री देवेंद्र फडणवीस यांच्यावरही त्यांनी टीक केली आहे. मात्र, गेल्या काही दिवसांपूर्वीच क्रिकेटच्या मैदानातील निवडणुकीतवरुन त्यांचं कौतुकही केलं होतं. तर, गौतम अदानी यांच्याशीही शरद पवारांची जवळीक आहे. त्यांच्या लोक माझे सांगाती या पुस्तकातही गौतम अदानींचा उल्लेख असून अदानींनी बारामतीलाही भेट दिली होती. त्यामुळे, शरद पवारांचं राजकारण नेहमीच दिग्गजांना जोडण्याचं पाहायला मिळालं आहे. लग्नातील या फोटोमुळे पुन्हा एकदा शरद पवारांच्या राजकारणावर चर्चा होत आहे.   

हेही वाचा

Eknath Shinde: फुकटचा ताठा अन् नाव उबाठा, एकनाथ शिंदेंची बोचरी टीका; म्हणाले, एक बिस्किटचा पुडाही दिला नाही

आणखी वाचा

सातारा : जिल्ह्याच्या फलटण (Satara) तालुक्यातील 35 वर्षीय युवकासोबत बनावट इंस्टाग्राम (Instagram) अकाउंटवरून महिला असल्याचे भासवून चॅटिंग केल्याचा भांडाफोड झाला आहे. विशेष म्हणजे संबंधित युवकाला खंडणीची मागणी करणाऱ्या तीन जणांना शिरवळ पोलिसांनी (Police) अटक केली आहे. सध्या सोशल मीडिया अकाऊंटवरुन फसवणुकीचे अनेक प्रकार समोर येत आहेत. तसेच, ऑनलाईन पैशांची मागणी किंवा आधार ओटीपीच्या कारणाने पैसे लाटण्याचा प्रकारही घडत आहे. त्यातच, आता सातारा जिल्ह्यात त्याने ती बनून एका युवकाला फसवल्याचं उघडकीस आला आहे.

बनावट इंस्टाग्राम अकाउंटवरुन महिला असल्याचे भासवून फलटण येथील युवकाला चॅटींगद्वारे शहरातील वीर धरण परिसरात बोलावण्यात आले होते. त्यानंतर, येथे तीन जणांकडून संबंधित युवकाला मारहाण करत लुटल्याचा प्रकार समोर आला आहे. त्यानंतर संबंधित युवकाने शिरवळ पोलीस ठाण्यात याबाबतची तक्रार दिली असता अवघ्या एक तासात शिरवळ पोलिसांनी तपासाची चक्र फिरवत यामधील तिन्ही आरोपींना अटक केली आहे. धक्कादायक बाब म्हणजे अटक केलेल्यांमध्ये एक युट्यूबर असून एक मसनेचा तालुकाध्यक्ष आहे. याप्रकरणी, पोलिसांकडून अधिक तपास सुरू आहे.

पोलिसांनी अटक केलेल्यांपैकी युट्युबर किरण मोरे, सातारा जिल्ह्यातून तडीपार असलेला संशयित विशाल जाधव आणि मनसे तालुकाध्यक्ष इरफान शेख यांचा समावेश आहे. या घटनेची नोंद शिरवळ पोलीस ठाण्यात करण्यात आली असून आरोपींकडून याआधीही असे प्रकार घडले असल्यामुळे पोलिसांनी कोणाची तक्रार असल्यास पोलीस ठाण्याशी संपर्क साधण्याचे आवाहनही नागरिकांना केले आहे. मात्र, इंस्टाग्रामवरुन किंवा सोशल मिडिया प्लॅटफॉर्मवर महिला अकाऊंटशी मैत्री करताना, चॅटिंग करताना किंवा त्या अकाऊंटवरुन गाठी-भेटी घेताना अगोदर संपूर्ण खात्री करायला हवी, हाच धडा या घटनेतून शिकायला मिळतो.

हेही वाचा

शॉकींग! लग्नात विघ्न, स्टेजवरच नवरदेवावर जीवघेणा हल्ला, नवरीला चक्कर; घटनेचा व्हिडिओ ड्रोनमध्ये शूट

आणखी वाचा