मुंबई : फलटण येथील महिला डॉक्टर आत्महत्येच्या प्रकरणात मोठी घडामोड झाली आहे. या प्रकरणाचा तपास आता विशेष तपास पथकाकडे (SIT) सोपवण्यात आला आहे. राज्याचे उपमुख्यमंत्री आणि गृहमंत्री देवेंद्र फडणवीस यांनी राज्याच्या पोलीस महासंचालकांना याबाबत स्पष्ट निर्देश दिले आहेत. विशेष म्हणजे, या प्रकरणाची चौकशी महिला आयपीएस अधिकाऱ्याच्या नेतृत्वाखालील एसआयटीमार्फत होणार आहे.
काही दिवसांपूर्वी फलटण उपजिल्हा रुग्णालयातील महिला डॉक्टरने आत्महत्या केली होती. या घटनेनंतर राज्यभरात संताप व्यक्त झाला. डॉक्टरच्या हातावर लिहिलेली सुसाईड नोट आणि वरिष्ठ अधिकारी तसेच पोलिसांकडून झालेल्या दबावाच्या आरोपांमुळे या प्रकरणाने वादळ निर्माण केले होते.
या आत्महत्येत भाजपचे माजी खासदार रणजितसिंह नाईक निंबाळकर यांचे दोन पीए आणि पोलीस उपनिरीक्षक गोपाळ बदने यांच्यावर गंभीर आरोप करण्यात आले आहेत. महिला डॉक्टरने आपल्या आत्महत्येपूर्वी बदने याने चार वेळा बलात्कार केल्याचा दावा केला होता. तसेच पोस्टमॉर्टम अहवाल बदलण्यासाठी वरिष्ठांकडून दबाव आणला गेला असल्याचेही नमूद केले होते.
विरोधकांनी या प्रकरणात सातत्याने एसआयटी चौकशीची मागणी केली होती. स्थानिक पोलिसांवर दबाव येऊ शकतो, असा दावा करत स्वतंत्र तपास पथकाकडे चौकशी सोपवावी, अशी मागणी करण्यात आली होती.
शिवसेना (ठाकरे गट) नेत्या सुषमा अंधारे यांनी माजी खासदार रणजितसिंह नाईक निंबाळकर यांच्यावर थेट आरोप करत हे प्रकरण आत्महत्या नसून हत्या असल्याचा दावा केला होता. अखेर सरकारने त्यांच्या मागणीप्रमाणे महिला आयपीएस अधिकाऱ्याच्या नेतृत्वाखाली एसआयटी स्थापन करण्याचा निर्णय घेतला आहे.
दरम्यान, राज्याचे मंत्री जयकुमार गोरे यांनी प्रतिक्रिया देताना सांगितले की, “आम्ही त्या भगिनीचा आदर करतो, मात्र या प्रकरणातील इतर दोन आरोपींसोबतचे तिचे काही चॅट्स समोर आले, तर एक गंभीर त्रिकोणी संबंध प्रकरण समोर येईल. त्यामुळे पोलीस शांत आहेत,” असे त्यांनी स्पष्ट केले.
