फलटण शहर पोलीस ठाण्याचे निरीक्षक अरविंद काळे यांची उचलबांगडी; एसपी निखिल पिंगळे यांची धडक कारवाई
फलटण | प्रतिनिधी :- फलटण शहरातील वाढत्या अवैध धंद्यांच्या पार्श्वभूमीवर जिल्हा पोलीस प्रशासनाने महत्त्वाचा निर्णय घेत माजी पोलीस निरीक्षक अरविंद काळे यांची बदली केली आहे. जिल्हा पोलीस अधीक्षक निखिल पिंगळे यांनी घेतलेल्या या निर्णयामुळे पोलीस विभागात चर्चा रंगली असून, शहरातील अवैध कारवायांवर आळा बसण्याच्या दृष्टीने ही कारवाई महत्त्वाची मानली जात आहे.
कराड शहर पोलीस ठाण्यातून सुमारे आठ महिन्यांपूर्वी फलटण शहर पोलीस ठाण्यात रुजू झालेल्या अरविंद काळे यांच्याकडून नागरिकांना प्रभावी कायदा व सुव्यवस्थेची अपेक्षा होती. मात्र, त्यांच्या कार्यकाळात शहरात विविध अवैध धंदे वाढल्याच्या तक्रारी सातत्याने पुढे येत राहिल्या. याबाबत नागरिकांनी तसेच विविध सामाजिक संघटनांनी नाराजी व्यक्त केली होती.
स्थानिक पातळीवर अवैध व्यवसायांना संरक्षण मिळत असल्याच्या चर्चांमुळे पोलीस प्रशासनाच्या कार्यपद्धतीवर प्रश्न उपस्थित केले जात होते. शहरात यापूर्वी कमी प्रमाणात दिसणाऱ्या काही बेकायदेशीर प्रकारांमध्ये वाढ झाल्याचा आरोपही केला जात होता. त्यामुळे कायदा व सुव्यवस्थेच्या अंमलबजावणीबाबत नागरिकांमध्ये असंतोष निर्माण झाला होता.
यापूर्वीच्या कार्यकाळातही अरविंद काळे यांच्यावर अशाच प्रकारच्या आरोपांच्या पार्श्वभूमीवर वरिष्ठ स्तरावर कारवाई झाल्याची चर्चा होती. फलटणमध्येही अशाच स्वरूपाच्या तक्रारी वाढत गेल्याने प्रशासनावर योग्य निर्णय घेण्याचा दबाव वाढला होता.
स्थानिक माध्यमांमधून अवैध धंद्यांबाबत सातत्याने वृत्तांकन होत असताना आणि नागरिकांचा रोष वाढत असताना जिल्हा पोलीस अधीक्षक निखिल पिंगळे यांनी अखेर बदलीचा निर्णय घेतला. या निर्णयामुळे पोलीस विभागात खळबळ उडाली असून, शहरातील अवैध धंद्यांवर प्रभावी नियंत्रण आणण्यासाठी पुढील काळात अधिक कठोर कारवाई होईल, अशी अपेक्षा व्यक्त केली जात आहे.
दरम्यान, फलटणकर नागरिकांनी या निर्णयाचे स्वागत केले असून, शहरातील कायदा व सुव्यवस्था अधिक सक्षम करण्यासाठी आणि अवैध कारवायांवर कायमस्वरूपी आळा घालण्यासाठी प्रशासनाने सातत्याने कठोर पावले उचलावीत, अशी मागणी नागरिकांकडून केली जात आहे.
