निंभोरे (ता. फलटण) : पुणे-पंढरपूर पालखी महामार्गालगत निंभोरे गावाच्या हद्दीत गव्हाच्या शेतात एक बिबट्या मृतावस्थेत आढळून आला आहे. ही घटना २६ जानेवारी रोजी दुपारी नागरिकांच्या निदर्शनास आली. घटनेची माहिती मिळताच फलटण वनविभागाचे अधिकारी आणि कर्मचारी घटनास्थळी दाखल झाले असून बिबट्याच्या मृत्यूचे नेमके कारण शोधण्याचे काम सुरू आहे.
घटनास्थळावर मोठी गर्दी
निंभोरे गावालगत अष्टविनायक हॉटेलच्या समोरील बाजूस गव्हाच्या शेतात बिबट्याचा मृतदेह आढळून आल्याची माहिती मिळताच नागरिकांनी वनविभागाला कळवले. वनविभागाच्या पथकाने तातडीने घटनास्थळी जाऊन बिबट्याचा मृतदेह ताब्यात घेतला. या घटनेची माहिती मिळताच परिसरातील नागरिकांनी मोठी गर्दी केली होती.
शिवविच्छेदनानंतर स्पष्ट होणार मृत्यूचे कारण
बिबट्याच्या मृत्यूचे कारण अद्याप स्पष्ट झालेले नाही. वनविभागाच्या अधिकाऱ्यांनी सांगितले की, बिबट्याच्या शवविच्छेदनानंतरच त्याच्या मृत्यूमागील कारण स्पष्ट होईल. प्राथमिक अंदाजानुसार विषबाधा किंवा अपघाताचा संशय व्यक्त केला जात आहे.
परिसरात भीतीचे वातावरण
फलटण तालुक्यातील निंबळक, मुंजवडी, गिरवी या भागात यापूर्वी अनेकदा बिबट्या आढळल्याची प्रकरणे समोर आली आहेत. अनेक वेळा वन विभागाच्या कॅमेरातही बिबट्या कैद झाला होता. मात्र, आता महामार्गालगत बिबट्या मृतावस्थेत आढळल्याने स्थानिक नागरिकांमध्ये भीतीचे वातावरण निर्माण झाले आहे.
वनविभागाच्या अधिकाऱ्यांनी नागरिकांना सतर्क राहण्याचे आणि जंगल विभागाच्या सूचनांचे पालन करण्याचे आवाहन केले आहे. पुढील तपास वनविभाग आणि स्थानिक प्रशासन करीत आहे.
