सातारा :- सातारा जिल्ह्यात शिवसेना मधील अंतर्गत मतभेद आता उघडपणे समोर आले आहेत. पालकमंत्री शंभूराज देसाई आणि कोरेगावचे आमदार महेश शिंदे यांच्यातील वाद अधिकच तीव्र होत असल्याचे दिसत आहे. बॅनर वाद, कार्यक्रमांच्या निमंत्रणाचा मुद्दा आणि परस्पर आरोप-प्रत्यारोपांमुळे दोन्ही नेते आमनेसामने आले आहेत.
महेश शिंदे यांनी आरोप केला की, त्यांना सातत्याने दुय्यम वागणूक दिली जाते आणि महत्त्वाच्या कार्यक्रमांना बोलावले जात नाही. उपमुख्यमंत्री एकनाथ शिंदे यांच्या सातारा दौऱ्यावेळीही आपल्याला निमंत्रण मिळाले नसल्याचा दावा त्यांनी केला.
यावर प्रत्युत्तर देताना शंभूराज देसाई यांनी पक्ष शिस्तीवर भर दिला. शिवसेनेत वेगळे निमंत्रण देण्याची पद्धत नसून कार्यक्रम निश्चित झाल्यानंतर सर्व पदाधिकाऱ्यांनी उपस्थित राहणे अपेक्षित असते, असे त्यांनी स्पष्ट केले. काही बॅनरवर महेश शिंदे यांचे फोटो नसले तरी त्यांना माहिती देण्याचे आदेश दिले होते, असेही त्यांनी सांगितले.
महेश शिंदे यांना जाणीवपूर्वक डावलल्याचा आरोप फेटाळताना देसाई म्हणाले की, अनेक बैठकीत त्यांनी शिंदे उपस्थित आहेत का याची चौकशी केली होती. निमंत्रण न मिळाल्याच्या दाव्याची चौकशी केली जाईल, असेही त्यांनी नमूद केले.
दरम्यान, “आपण स्वतःच्या ताकदीवर निवडून आलो,” असे विधान केले असेल तर तो शिवसैनिकांचा अपमान ठरेल, असा इशारा देसाई यांनी दिला. जिल्ह्यातील सर्व लोकप्रतिनिधी हे शिवसैनिकांच्या बळावरच निवडून आल्याचे त्यांनी अधोरेखित केले.
सातारा जिल्ह्यात शिवसेना-राष्ट्रवादी काँग्रेस आघाडीला मोठा पाठिंबा मिळाल्याचा उल्लेख करत देसाई यांनी 37 जागांवरील विजय आणि 100 हून अधिक लोकप्रतिनिधी निवडून आल्याचे सांगत पक्षाची ताकद अधोरेखित केली.
जिल्हा परिषद निवडणुकीपासूनच सुरू असलेला हा वाद आगामी काळात आणखी चिघळण्याची शक्यता आहे. या प्रकरणात पक्षश्रेष्ठी काय भूमिका घेतात, याकडे सर्वांचे लक्ष लागले आहे.
साताऱ्यात शिवसेनेत अंतर्गत संघर्ष उफाळला; देसाई–शिंदे आमनेसामने
