भिगवण, ता. २५: “आमच्यावर दाखल गुन्हा मागे घ्या” असे म्हणत पाच जणांच्या टोळीने शहाजी काळे यांच्यावर कोयत्याने हल्ला केला. ही घटना घडल्याने परिसरात तणावाचे वातावरण निर्माण झाले आहे. या हल्ल्यात शहाजी काळे गंभीर जखमी झाले असून, त्यांना सोडवण्याचा प्रयत्न करणाऱ्या त्यांच्या पत्नी मालन यांच्या उजव्या मनगटावरही कोयत्याने वार करण्यात आला. तसेच, पती-पत्नीला लाथाबुक्क्यांनी मारहाण करत, त्यांच्या मुलाला जीवंत सोडणार नाही, अशी धमकी देण्यात आल्याचे फिर्यादीत नमूद आहे.
याप्रकरणी किशोर गजरे, राजेश मोरे व त्यांच्या इतर साथीदारांविरोधात भिगवण पोलिस ठाण्यात गुन्हा दाखल करण्यात आला आहे. संबंधित आरोपींवर अनुसूचित जाती-जमाती अत्याचार प्रतिबंधक कायदा, बेकायदेशीर जमाव जमवणे, हत्यार घेऊन दंगल माजवणे, जिवे मारण्याचा प्रयत्न करणे या गंभीर कलमांतर्गत कारवाई करण्यात आली आहे.
घटनेनंतर पोलिसांनी घटनास्थळी भेट दिली असून, उपविभागीय पोलिस अधिकारी सुदर्शन राठोड पुढील तपास करत आहेत. या हल्ल्यामुळे गावात भीतीचे वातावरण असून, नागरिकांमध्ये संताप व्यक्त केला जात आहे.
