अजित पवार यांच्या वेगवान निर्णयक्षमतेचा प्रत्यय
पुणे : महाराष्ट्रातील कृषी आणि पशुपालन क्षेत्राच्या विकासासाठी राज्य सरकारने एक मोठा निर्णय घेतला आहे. उपमुख्यमंत्री आणि पुणे-बीड जिल्ह्यांचे पालकमंत्री अजित पवार यांच्या पुढाकाराने या दोन्ही जिल्ह्यांत नवीन पशुवैद्यकीय महाविद्यालये स्थापन करण्यास राज्य मंत्रिमंडळाने मान्यता दिली आहे.
बारामती येथे जानेवारी महिन्यात पार पडलेल्या ‘कृषिक-२०२५’ प्रदर्शनात शेतकरी आणि पशुपालकांनी बारामतीत पशुवैद्यकीय महाविद्यालय सुरू करण्याची मागणी केली होती. त्यास तातडीने प्रतिसाद देत अजित पवार यांनी बारामती आणि बीड जिल्ह्यातील परळी येथे दोन नवीन शासकीय पशुवैद्यकीय महाविद्यालये स्थापन करण्याची घोषणा केली होती. मागील महिनाभरातच सर्व प्रक्रिया पूर्ण करून मंत्रिमंडळ बैठकीत त्यास मंजुरी देण्यात आली.
राज्यातील पशुधन विकासाला गती
महाराष्ट्र हे शेतीप्रधान राज्य असल्याने कृषी क्षेत्रासोबतच पशुपालन आणि दुग्ध व्यवसायालाही मोठे महत्त्व आहे. राज्यातील पशुवैद्यकीय सेवांमध्ये सुधारणा करण्यासाठी आणि प्रशिक्षित पशुवैद्यकांची संख्या वाढवण्यासाठी ही महाविद्यालये महत्त्वाची ठरणार आहेत. या नव्या प्रकल्पामुळे राज्यातील पशुधनाच्या आरोग्याची अधिक चांगली काळजी घेता येणार असून, आधुनिक पशुवैद्यकीय सेवा सहज उपलब्ध होतील.
बारामती आणि परळी येथे मोठ्या प्रमाणावर पायाभूत सुविधा
बारामती तालुक्यातील कऱ्हावागज येथे ८२ एकर, तर परळी तालुक्यातील लोणी येथे ७५ एकर जागेवर ही दोन नवीन महाविद्यालये उभारली जाणार आहेत.
११२९ कोटी रुपयांची आर्थिक तरतूद
या महाविद्यालयांसाठी राज्य सरकारने ११२९.१ कोटी रुपयांचा निधी मंजूर केला असून, प्रत्येकी ५६४.५८ कोटी रुपये खर्च करण्यात येणार आहेत. यामध्ये अत्याधुनिक प्रयोगशाळा, प्रगत संशोधन केंद्रे आणि शिक्षणासाठी आवश्यक सर्व आधुनिक सुविधा उभारल्या जाणार आहेत.
२३४ नियमित आणि ४२ मानधनावरील पदे मंजूर
या शासकीय पशुवैद्यकीय महाविद्यालयांसाठी मोठ्या प्रमाणावर पदनिर्मिती करण्यात आली आहे.
- शिक्षकवर्ग: ९६ पदे
- शिक्षकेत्तर कर्मचारी: १३८ पदे
- मानधन तत्त्वावर भरती: ४२ पदे
पशुपालक आणि कृषी क्षेत्रातील आनंद
राज्यातील पशुपालकांना उत्तम दर्जाच्या वैद्यकीय सुविधा आणि तांत्रिक मदत मिळणार असल्याने हा निर्णय स्वागतार्ह ठरत आहे. यामुळे कृषिपूरक व्यवसायांना चालना मिळेल आणि पशुधन संगोपनासाठी संशोधन व नव्या तंत्रज्ञानाचा मार्ग मोकळा होईल.
अजित पवार यांच्या वेगवान निर्णयक्षमतेचा प्रत्यय
अजित पवार यांनी राज्याच्या अर्थव्यवस्थेला एक ट्रिलियन डॉलर वर नेण्याचे उद्दिष्ट ठेवले आहे. त्याचाच भाग म्हणून शेती आणि पशुपालनास चालना देण्यासाठी या दोन महाविद्यालयांना मंजुरी मिळवण्याचा ऐतिहासिक निर्णय त्यांनी एका महिन्यात घेतला.
राज्यातील पशुधनासाठी ऐतिहासिक पाऊल
या निर्णयामुळे महाराष्ट्रातील पशुवैद्यकीय क्षेत्रात मोठी सुधारणा होणार असून, प्रशिक्षित पशुवैद्यकांची संख्या वाढणार आहे. विशेषतः, बारामती आणि परळी परिसरातील पशुपालकांसाठी हा निर्णय एक मोठी संधी ठरणार आहे. राज्यातील कृषी व पशुपालन क्षेत्राच्या उज्ज्वल भविष्यासाठी ही नवी महाविद्यालये महत्त्वाची भूमिका बजावतील.
