पुणे: भाजप आमदार आणि ग्रामविकास मंत्री जयकुमार गोरे यांना खंडणी मागितल्याच्या प्रकरणात नवी महत्त्वाची घडामोड घडली आहे. आयएएस अधिकारी प्रभाकर देशमुख यांची सातारा पोलिसांकडून तब्बल तीन तास चौकशी करण्यात आली. पुण्यातील कोरेगाव पार्क येथील त्यांच्या निवासस्थानी पोलीस दाखल झाल्याची माहिती आहे.
या प्रकरणात काही दिवसांपूर्वी एका महिलेला खंडणी स्वीकारताना रंगेहात पकडून अटक करण्यात आली होती. त्यानंतर पोलिसांनी पत्रकार तुषार खरात यांनाही अटक केली, ज्यांनी मंत्री गोरे यांच्यावर सातत्याने आरोप केले होते. आता प्रभाकर देशमुख यांच्या चौकशीमुळे प्रकरणाला नवा कलाटणी मिळू शकते.
मुख्यमंत्री देवेंद्र फडणवीस यांनी विधानसभेत देशमुख हे खंडणी मागणाऱ्या महिलेच्या संपर्कात होते, असा दावा केल्यानंतर पोलिसांनी त्यांची चौकशी केली. तीन तासांच्या चौकशीनंतर सातारा पोलीस त्यांच्या घरातून रवाना झाले असून या प्रकरणात पुढे काय होतं, याकडे साऱ्यांचे लक्ष लागले आहे.
मंत्री जयकुमार गोरे यांची प्रतिक्रिया
या कारवाईबाबत मंत्री जयकुमार गोरे यांनी प्रतिक्रिया देताना सांगितले, “मुख्यमंत्र्यांनी याबाबत अनेक गोष्टी स्पष्ट केल्या आहेत. सध्या पोलीस तपास सुरू आहे. यावर माझ्याकडे बरीच माहिती आहे, पण आत्ता काही बोलणार नाही. पोलिसांचा तपास पूर्ण होऊ द्या, त्यानंतर योग्य वेळी मी भूमिका मांडेल.”
