सातारा: प्रजासत्ताक दिनी राष्ट्रध्वजारोहण करताना भारतीय संविधानाचे शिल्पकार डॉ. बाबासाहेब आंबेडकर यांची प्रतिमा लावून संविधान उद्देशिकेचे सामूहिक वाचन करावे, अन्यथा आमरण उपोषण छेडले जाईल, असा इशारा सामाजिक कार्यकर्ते हरिष उर्फ आप्पा काकडे यांनी सहकाऱ्यांसह जिल्हाधिकारी सातारा यांना दिलेल्या निवेदनाद्वारे दिला आहे.
हरिष काकडे, राकेश जगताप, दत्तात्रय अब्दागिरे, राजू कांबळे, सनी कदम यांनी जिल्हाधिकारी तथा अध्यक्ष, जिल्हा दक्षता व संनियंत्रण समिती, सातारा यांच्या कार्यालयात जाऊन हे निवेदन सादर केले.
संविधानाच्या सन्मानासाठी आंदोलनाची भूमिका
डॉ. बाबासाहेब आंबेडकर यांनी 26 नोव्हेंबर 1949 रोजी भारतीय संविधान संविधान सभेसमोर सादर केले, ज्याचा अंमल 26 जानेवारी 1950 पासून सुरू झाला आणि भारत प्रजासत्ताक बनला. या ऐतिहासिक घटनेच्या स्मरणार्थ दरवर्षी प्रजासत्ताक दिन मोठ्या उत्साहात साजरा केला जातो. मात्र, या दिवशी राष्ट्रध्वजारोहणावेळी डॉ. आंबेडकर यांचा उल्लेख वा त्यांची प्रतिमा लावली जात नाही, याकडे शासन व प्रशासनाचा दुर्लक्ष होत असल्याचा आरोप काकडे व त्यांच्या सहकाऱ्यांनी केला आहे.
त्यामुळे यंदा प्रजासत्ताक दिनी राष्ट्रध्वजारोहणावेळी डॉ. बाबासाहेब आंबेडकर यांची प्रतिमा लावून संविधान उद्देशिकेचे वाचन करावे, अशी मागणी त्यांनी केली. जर प्रशासनाने या मागणीची दखल घेतली नाही, तर आमरण उपोषण करण्याचा इशाराही त्यांनी निवेदनाद्वारे दिला आहे.
या निवेदनावर हरिष काकडे, राकेश जगताप, दत्तात्रय अब्दागिरे, राजू कांबळे, सनी कदम यांच्या स्वाक्षऱ्या आहेत. प्रशासन यावर काय निर्णय घेते, याकडे आता लक्ष लागले आहे.
