मिळालेल्या माहितीनुसार, शुक्रवारी रात्री उशिरा कुर्ल्यातील झोपडपट्टी पुनर्वसन प्राधिकरण इमारतीत अचानक आग लागली. कोहिनूर रुग्णालयासमोर घडलेल्या या घटनेनंतर नागरिकांनी जीवाच्या आकांताने घराबाहेर पळ काढण्याचा प्रयत्न केला. आगीचे लोळ आणि धुराचे लोट इमारतीतून बाहेर पडू लागताच परिसरातील नागरिकांनी तातडीने घटनास्थळी धाव घेत मदत व बचावकार्य सुरू केलं. त्यानंतर अग्निशमन दलाच्या गाड्या घटनास्थळी दाखल झाल्या. जवांनांनी इमारतीतील ५० लोकांना सुखरुप बाहेर काढलं असून त्यांना किरकोळ इजा झालेली आहे. सर्वांना उपचारासाठी नजीकच्या रुग्णालयात दाखल करण्यात आलं आहे. आग कशामुळं लागली, याचं कारण अद्याप कळू शकलेलं नाही.
